Tàm uă nam do, tàm càr Gia Lai, bơdìh mờ kơnòl broă tŭ lơi kung rơcang lài tam dră mờ bơtàu tơnguh lơh sa sền gàr dà lơgar, ală mpồl ling neh lơh uă broă tơrlòng lơh hòi jà làng bol, tam pà bal kal ke, dong kờl làng bol kơl jăp rài kis broă lơh sa, nàng tơnguh uă bơta niam rài kis.

Lơh jăt broă tơrlòng lơh “Pah poh dong kờl dùl hìu rơƀah”, bơh nam 2023 tus tŭ do, Cau ling Sền gàr tiah nhàr lơgar càr Gia Lai neh dong kờl 750 hìu rơƀah, hìu pa lik klàs rơƀah mờ hìu geh broă dong kờl bơh mpồl bơtiàn; pơlam tă geh rơlao 810 tơlăk đong, 1 tấn 700 kĭ phe, 47 nơm phan ngui nàng lơh broă bal mờ mờr 3 rơbô ngai lơh broă dong kờl làng bol lơh niam wơl hìu ơm. Nam 2024, broă tơrlòng lơh geh Mpồl Bơto pơlam Broă Dà lơgar jờng rơ là dùl tàm 7 broă tơrlòng lơh “Hòi jà làng bol jăk chài” pơnrơ ngan gùt lơgar. Đại tá ồng Khuất Bá Cao, Ƀí thư Đảng ủy, Phó Kwang lam bồ Ƀiñ đoàn 15, pà git: mờ gùng dà broă lơh “dong kờl rài kis broă lơh broă sa, sòl àng nùs nhơm pin dờn”, mìng is nam 2024, Ƀiñ đoàn neh lơh gơs 23 broă lơh mờ mờr 45 kơi sồ gùng che ồs đèng, 1 rơbô 500 ñjrong đèng, kờp jơh priă tă 4 tơmàn đong; nam 2025 kờp dŭ lơh tai 13 broă lơh, priă tă geh rơlao 3 tơmàn đong.