Nàng geh tŭ jiơ lòt mŭt tàm jơnau kah yau hơ̆ là ală ngai lơh broă ờ ơm rlô bơh dùl mpồl kwang bàng dê, tŭ tàm tê mờr bè ờ gŏ geh bơta lơi bơdìh nùs tồr jơh nùs jơh tồr mờ bồ tơnggoh bơceh lơh. Dùl cơldŭ lơh broă ơnàng 30 thơk vuông gời lơm, dùl nơm micro, bàr pe tơngguh săp ntas lơh niam wơl mờ ngui jơh ală pang ồs tơ̆ đềs ndơl căng gùt dar neh gơgơs cơldŭ kŭp săp bơh sơnrờp bơh Anih Jơnau đơs Việt Nam dê.

Ngai 02/09/1945, tŭ Wa Hồ sền Jơnau yal bơr Lơngăp lơngai is, ală cau drơng măy neh yal tơn săp đơs bơh Ƀlàng dờng Ba Đình tus gĭt nđờ tơlak plai nùs, bulah măy mok ƀah rah ƀa rài ngan mờ bơta kal ke ngan gĭt lơh.

Bơh lồi nam 1946, tŭ jơh gùt lơgar ñă ntàu tam lơh dră wơl bol sò tơm Tây, Anih Jơnau đơs Việt Nam mŭt tàm ală nam nhai is ồn: ntrờn sùm nàng sền gàr niam măy mŏk phan ngui, gàr kơnhăp pờ tơlik jơnau đơs. Mìng kờp is 9 nam tam lơh dră wơl bol sò tơm Tây, Anih Jơnau đơs Việt Nam neh 14 dơ̆ ntrờn, bơh Bạch Mai tus hìu Yàng Phờk Trầm, hơ̆ sồng Bó Lù – Ba Bể, Hát Môn…

Tơnơ̆ nam 1975, dà lơgar tơrgùm dùl, Anih Jơnau đơs Việt Nam mŭt tàm tŭ tơngai lơh wơl mờ rề ơnàng. Bơh nam 2009, lơh jăt pờ jơnau đơs Dà lềng đah măt tơngai Lik pờ tàm 3 tiah dà lềng ngài là kơnhoàl ù tiah Hoàng Sa, Trường Sa mờ pòt dà lềng Thái Lan. Nam 2020, Anih Jơnau đơs Việt Nam bơ̆t bơtàu Anih Jơnau đơs pờ tơlik jơnau đơs kơnhoàl ù tiah đah Jum tàm gùl lơgar nàng pờ tơlik jơnau đơs gah VOV1, VOV5 (dà Mỹ mờ dà Lo) pờ tơlik jơnau đơs tiah dà lềng bồt bơlào Trường Sa bơh măy pờ MW, pơgồp bơnah yal tơnggĭt mblàng yal jơnau, gàr niam lơngăp lơngai cíñ trị mờ đơs nền gơnoar tờm ù tiah dà lềng tàm dà lềng.

80 nam do, bơh dùl nơm micro dềt tus ală anih pờ tơlik jơnau đơs jơh gùt lơgar, Jơnau đơs Việt Nam sùm kơno dờng, tơƀă ală rbàng săp đơs tàm tơrbŏ gĭt nđờ tơlak plai nùs. Ồng Phạm Mạnh Hùng- Phó Kwang Lam bồ dờng Anih Jơnau đơs Việt Nam đơs loh: Anih Jơnau đơs Việt Nam sùm pơnyờ să là anih lơh broă sră ƀăo bơh sơnrờp bơh Wa Hồ dê tơnggơs tơnơ̆ Kăc màng Nhai Phàm, đềt mềr mờ jơnau kah yau bơtàu tơngguh dà lơgar dê mờ geh tă pơgồp kwơmàng tàm sùm 80 nam do.

Jơnau kah yau bơtàu tơngguh 80 nam do bơh Anih Jơnau đơs Việt Nam dê, bơh dơ̆ pờ tơlik jơnau đơs bơh sơnrờp ngai 07/09/1945 tus tŭ tơngai tam gơl pa tŭ do. Tŭ hơ̆, Anih Jơnau đơs là anih lơh broă sră ƀăo bơh sơnrờp geh Wa Hồ tơnggơs tàm rài ătbồ pa. Tơnơ̆ hơ̆ là Anih Jơnau đơs tam klăc đềt mềr tơn mờ uă ngan broă dờng màng bơh dà lơgar dê, bè dơ̆ tam lơh dră wơl bol sò tơm Tây, gơlam tus lơh geh cồng nha nam 1954, hơ̆ sồng dơ̆ tam lơh dră wơl bol sò tơm Mỹ dong lơgar gơlam tus pha lin dờng kàl prang nam 1975. Hơ̆ sồng ală tŭ tơngai tam gơl pa den bơta tus bal bơh jơh mpồl cau lòt cih jơnau, cau sền swì jơnau bơh Anih Jơnau đơs dê gơ wèt mờ broă pơnjờng ai ală broă lơh pa bè bơtàu tơngguh lơh sa nàng pơgồp bơnah bal mờ sră ƀău gùt lơgar, bal mờ mpồl bơtiàn, bal mờ Đảng mờ Dà lơgar cơnđoà tus dùl dơ̆ tam gơl pa tơl làm dà lơgar mờ jơh bal tàm rài bè pờ mpồng mŭt gơrờm bal mờ dunia mờ sơnđờm rơcăng ai rài brồ să in.

Mŭt tàm tŭ tơngai pa, Anih Jơnau đơs Việt Nam sền gròi lơh jăt kơnòl broă dờng kwơmàng ngan yal tơnggĭt jơnau, mblàng yal jơnau, pơgồp bơnah sền gàr Dà lơgar mờ bơtàu tơngguh dà lơgar, wèt tus ală tŭ tơngai 100 nam crơnggơs lơgar Kộng hoà Sàh hội Củ nghĩa Việt Nam. Tŭ do, Anih jơnau đơs bơtàu tơngguh bal ƀăo cih, ƀăo internet, pờ tơlik jơnau đơs, tơngume sồ; lơh jăt niam bơta pràn ờs mờng bơh yau nàng gơgơs anih lơh broă sră ƀăo tờm pràn, lơh gơlik tơnggume dipal ngan ngồn, pin dờn, mờng chài, geh tơl pràn tề lam mpồl bơtiàn, dong cau iăt cau sền in wă loh bơta tờm broă tàm lơgar mờ ală lơgar, lơh geh bơta ring bal mpồl bơtiàn, lơh tơngkah wơl bơta tam klăc mờ lơh gơlik jơnau gơdan ai jơh gùt làng bol in. Đơs tàm ù tiah ràng tơlik “80 nam Jơnau đơs Việt Nam lòt bal mờ dà lơgar”, ồng Đỗ Tiến Sỹ, Kwang bàng Đảng Dà lơgar, Kwang Lam bồ dờng Anih Jơnau đơs Việt Nam đơs sùm: Anih Jơnau đơs Việt Nam mờ gơnoar broă là anih lơh broă sră ƀăo tờm pràn dà lơgar rơ̆p pơn jăt tai jăt ngui ală măy mŏk jak chài pa ngan rlau jơh nàng lơh jăt kơnòl broă cíñ trị geh jàu mờ lơh ală rơndăp broă lơh, broă lơh lơh broă bal geh gơrềng, pơgồp bơnah lơh tơngkah wơl nùs nhơm pơnyờ să jơi bơtiàn dê, bơ̆t bơtàu nùs nhơm gơboh lơgar, lơh gơrề uă bơta kơ̆p kờñ ngan ring lơngai mờ bơta pin dờn kơ̆ kơnhăp tàm tơnơ̆ do bơtàu tơngguh pas sơm tàm rài brồ să bơh jơi bơtiàn Việt Nam dê.