VOV4.K’ho- Tus tŭ do kung gam tus 7 tơlak 600 rbô ding cĭt vaccine kòp Kovid-19 tàm mpồl ling klàng phàu crong mờ làng bol ờ hềt geh cih yal tàm anih cih yal gơrềng tus broă lơh sră cĭt tơl vaccine mờ tơngai tam gơl sồ dà lơgar. Hơ̆ là jơnau yal geh yal tàm Pơrjum pờ tơlik tơn tàm internet gùt lơgar mblàng yal broă “lơh goh” sră nggal cĭt vaccine kòp Kovid-19 bơh Ƀộ Y tế dê pơgồp bal mờ Ƀộ Kwang àng bơyai lơh drim ngai 26/04 tàm Hà Nội.

Jơnau lơh gơlik jơnau geh ngan pa yal là tài bơh ală anih cĭt vaccine ờ hềt cih yal di tŭ jơnau yal bơh cau cĭt vaccine kòp Kovid-19 dê tàm anih cih yal. Jơnau yal tàm sră nggal bơh ală anih cĭt vaccine dê ờ hềt ring bal mờ anih lơh broă sră nggal dà lơgar bè làng bol ơm kis. Ƀộ Kwang àng đơs loh, sră nggal dà lơgar bè làng bol ơm kis là cơng tàng mìng dùl lơm ngan nàng lơh ndrờm bal jơnau yal bè cĭt vaccine kòp Kovid-19 kung bè ală jơnau yal tơngĭt ndai bơh làng bol dê, wèt tus tam gơl sồ dà lơgar. Ƀộ Y tế pà gĭt, wèt tus sơrbì broă yal mờ cau lơh sơnơm in tàm lơgar tài bơh tŭ do ờ gam lơh jăt broă jòi cau F0, F1 tai. Mơya, kung gam lơh sùm broă yal mờ cau lơh sơnơm in gơwèt mờ năc bơh lơgar ndai mŭt tàm Việt Nam.

Cau mblàng Lơ Mu K’Yến