VOV4.K’ho- Mho ngai 28/6, Củ tịc lơgar ồng Nguyễn Xuân Phúc tus bal dơ̆ bơyai lơh tơngkah kir sơnrai 50 nam ngai crơng gơs Tổng Kông ty sơnơm tơmba Việt Nam mờ jàu Huân cương lơh broă khà dùl ai Tổng Kông ty in.

Ala mat kwang đơng lam bồ Đảng, dà lơgar, Củ tịc lơgar cih dờp, đơs niam, jờng rơ ală cồng nha mờ Tổng Kông ty sơnơm tơmba Việt Nam mờ ală mpồl lơh sa kă bro geh jơng tàm Tổng Kông ty tàm rlau 50 nam do neh lơh geh, pơgồp bơnah bơtàu tơnguh gah lơh sa mờ măi mok sơnơm tơmba Việt Nam mờ broă lơh gròi sền, sền gàr pràn kơldang să jan làng bol. Pơn rơ ngan là ală tă pơgồp kuơmàng tàm broă gàr kơ̆ kơljap khà priă sơnơm, gàr niam rơndap tap sèng, bơta sơnơm, khà sơnơm, bơta niam sơnơm tơmba mờ tam pà ring broă tac mờ jơnau kờñ blơi sơnơm rơcang sơndră, sơm kòp ai làng bol in; lam lơh jat niam kơnòl broă geh jàu bè prap rơcang gàr lài, tac bro sơnơm dà lơgar. Tàm tŭ tơngai uă anih kham sơm kòp gùt lơgar ờ tơl sơnơm mờ phan lơh sơnơm, Củ tịc lơgar ồng Nguyễn Xuân Phúc sồr Cíñ phủ mờ gah lơh sơnơm pal mhar bơsong bơta do. Củ tịc lơgar đơs bơta geh ngan, kờp ing neh geh 41 càr, ƀòn dờng ờ tơl sơnơm tơmba, phan lơh sơnơm.

Cau mblàng K’Duẩn