VOV4.K’ho - Càr Dăk Lăk gam chồl pràn broă cit sơnơm vaccine rơcang sơndră mờ kòp Kovid-19 ding bơtơl wơl tus tàm tơl xã, sơnah ƀòn, mờ gùng dà broă lơh lòt tus tơl hìu, tus tơl cau nàng cit sơnơm ai làng bol in.

         Kwang bàng lơh sơnơm kơnhoàl Lăk cit sơnơm vaccine rơcang sơndră mờ kòp Kovid-19 làng bol in

Jăt mờ hơ̆, bơh tŭ do tus jơh nhai 6 do, càr Dăk Lăk lơh ngan cit jơh 260 rơbô ding sơnơm vaccine rơcang sơndră mờ kòp Kovid-19 neh geh tam pà. Khà sơnơm vaccine do geh ngui nàng cit ding dơ̆ 3 mờ ding dơ̆ 4 ai làng bol bơh 18 rơlao hờ đang in, mờ jơnau kờñ geh rơlao 95% khà làng bol bơh 18 sơnam rơlao hờ đang geh cit ding dơ̆ 3; mờ ală cau lam lài tàm broă rơcang sơndră mờ kòp gơtờp, cau geh kòp lài pal cit ding dơ̆ 4. Jăt Anih tờm sền gròi kòp tê jê să càr Dăk Lăk yal, tŭ do khà cit sơnơm vaccine rơcang sơndră mờ kòp Kovid-19 ding dơ̆ 3 tàm càr mìng rơ̆p geh rơlao 32%, mờ ding dơ̆ 4 mìng rơ̆p geh 1,5%. Do là khà ờ uă ngan pơn drờm mờ kơrnoăt geh ai bơh Ƀộ Y tế dê. Ồng Hoàng Hải Phúc, Phó kwang atbồ drơng broă lơh Anih tờm sền gròi kòp tê jê să càr Dăk Lăk pà git, nàng cit sơnơm vaccine rơcang sơndră mờ kòp Kovid-19 di mờ jơnau geh ai, mpồl lơh broă neh dan mờ Sở Y tế jào mùl màl ai 15 kơnhoàl, thị xã, ƀòn dờng in, tàm hơ̆ sồr ală tiah do pal lòt tus tơl hìu, tơl gùng, sền wơl tus tơl nă cau nàng geh cit sơnơm ai làng bol in. “Bol añ jào khà nàng kơnhoàl tus bal mờ UɃÑZ kơnhoàl ai geh broă lơh pràn gơwèt mờ tus tơl xã, tơl ƀòn nàng cit sơnơm. Bol añ tam pà sơnơm vaccine, xã lơi ờ dờp sơnơm vaccine den Mpồl đơng lam kơnhoàl pal hơ mờ UɃÑZ càr di lah lời gơtìp kòp, den tiah hơ̆ pal dờp is kơnòl. Bol añ lơh jăt broă lam sồr bơh tàm ală anih yal tơngit, lam sồr tơn nàng lơh bè lơi nàng làng bol in wă hơ̆ là gùng dà broă lơh bơh Đảng bal mờ gơnoar, kơnòl bơh làng bol dê, den tàng pal tus cit, tài cit sơnơm vaccine do là cit sơnơm vaccine rơcang sơndră mờ kòp Kovid-19”.

Cau mblàng Ndong Brawl