VOV4.K’ho- Ală ngai pa do, ală kòp jơng tê bơr tàm ù tiah càr Dăk Lăk dê sùm dờp sơm kòp uă ngan kơnòm dềt tus kham mờ mŭt piam tàm hìu sơnơm tài bơh kòp jơng tê bơr. Pal sền ngăc ngan là, uă kơnòm dềt gơtìp kòp jơng tê bơr mơya mè bèp ờ gŏ gĭt, tus tŭ mŭt piam tàm hìu sơ nơm den kơnòm dềt neh gơ bàn kòp jroă.

Ròng siam sau dềt rlau 10 nhai gơbàn kòp jơng tê bơr gam sơm kòp tàm Hìu sơnơm dờng tiah Tây Nguyên, mò Vũ Thị Hương ơm tàm kơnhoàl Krông Pách, càr Dăk Lăk pà gĭt, 1 poh lài, hìu bơnhă gŏ sau geh tềl tơngŏ kòp duh să, ñìm nggà, gơlik toh tàm mpàng tê den jun sau tus Hìu sơnơm kơnhoàl sơm kòp.

Ƀák sĩ Hìu sơnơm dờng tiah Tây Nguyên gam kham kòp ai kơnòm dềt gơbàn kòp jơng tê bơr in

Tơnơ̆ 2 ngai ơm tàm hìu sơnơm kơnhoàl, bơta kòp sau dê ờ gơmù den hìu bơnhă jun sau tus Hìu sơnơm dờng tiah Tây Nguyên. Mò Vũ Thị Hương đơs: Lài do sền ti vi, bác sĩ kung đơs là kòp do ngòt rơngơ̆t den gŏ sau gơ lơh bè do den jun tàm hìu sơnơm. Ală mè gŏ oh kòn kòp duh să den jun tus tàm hìu sơnơm mơ nàng ƀák sĩ in kham tơn, bañ lời tàm hìu ngòt rơ ngơ̆t ngan. Kung ròng kòn kòp tàm Khoa Nhi tổng hợp bơh Hìu sơnơm dờng tiah Tây Nguyên dê, bi Nguyễn Thị Thanh Thảo ơm tàm kơnhoàl Cư Kiuñ, càr Dăk Lăk pà gĭt, bi kung gam ờ hềt jơh bơta rơngòt tŭ ală ngai pa do sền gŏ oh kòn he dê gơtìp gơ pơ̆t să sùm tài bơh kòp jơng tê bơr. Bi Nguyễn Thị Thanh Thảo đơs: 7 jiơ drim ƀák sĩ pa mut kham jơh den ƀák sĩ lik bơdìh den sau gơbàn gơ pơ̆t să tơn, gơ pơ̆t să pơgap 10 phuk den sau bè ờs wơl, tàm 2 jiơ mho den sau gơ pơ̆t să dùl dơ̆ tai, pơgap 10 phuk mờ bĭc sùm 30 phuk tơn, do là dơ̆ gơ pơ̆t să kơn jơ̆ ngan tàm ngai. Gơ ngòt rơngơ̆t ngan gơwèt mờ sau añ dê, mhar ngan mờ ờ thàn rcang lài bơta lơi tơn.

Rào tê sàng goh geh là broă lơh geh cồng nha dong kơnòm dềt kơryan kòp jơng tê bơr

Ƀák sĩ Trần Thị Thúy Minh, Kwang atbồ Khoa Nhi tổng hợp Hìu sơnơm dờng tiah Tây Nguyên pà gĭt, tŭ do hìu sơnơm gam dờp mờ sơm kòp uă ngan kơnòm dềt kòp jơng tê bơr, mìng kờp is tàm 1 poh pa do, Khoa neh dờp mờ sơm kòp ai rlau 10 nă kơnòm dềt in. Jat ƀák sĩ Trần Thị Thúy Minh, kòp jơng tê bơr sùm gơtìp tàm kơnòm dềt hơđơm 5 sơnam, ngan là kơnòm dềt hơđơm 3 sơnam. Kòp ƀuơn ngan bơtờp. Kơnòm dềt sùm bơtờp virus lơh gơbàn kòp jơng tê bơr tŭ ơm rềp tơn mờ dà muh hòr, bơr, dà diau, dà bơh ală rơnồng dờ mờ è bơh ală cau kòp halà bơh ală phan ngui bơtờp virus do dê bè phan nhơl, kƀàng, tê at mpồng…

Tŭ gơbàn kòp, kơnòm geh ală tềl tơngŏ bè: jê rơ̆t rơnồng dờ, gơlik toh, gơlik toh dà tàm tê, mpàng jơng halà lur è. Mờ ală cau kòp nggờc, kòp digơlan bời is tơnơ̆ 2, 3 ngai. Mơya, bàr pe nă cau kòp gơlik geh kơn jơ̆, ờ geh sơm kòp di tŭ digơlan gơ aniai tus tàm tơngoh mờ gơ lời wơl bàr pe bơta aniai ai kơnòm dềt in bè as sồt kơltau tơngoh tài bơh virus, as sồt tơngoh.  Ƀák sĩ Trần Thị Thúy Minh đơs: Kòp do tơngŏ uă khà krơi is mờ tơl ală khà digơlan sơm bời di tŭ. Den tàng ală cau mè cau bèp pal sền ngăc tus mờ oh kòn tŭ sau geh tềl tơngŏ kòp duh să, geh ală bơta sồt bơh chờm tàm mpàng tê, mpàng jơng, tàm bơr den tus tàm hìu sơnơm rềp ngan rlau jơh mờ sền gĭt khà kơn jơ̆ bơh kòp dê nàng sơm bời di tŭ.

Kung jat ƀák sĩ Trần Thị Thúy Minh, kòp jơng tê bơr là kòp bơtờp kấp tíñ, ờ hềt geh sơnơm vaccine rcang sơn dră kòp. Broă rcang sơndră kòp uă ngan bơh broă gĭt wă sền gàr kloh niam să jan kơnom dềt in mờ bơh cau ròng siam kơnòm dềt dê bè rào tê sùm mờ dà mờ sơbong, um tu pah ngai mờ ƀồm sơnơm lơh kloh khuẩn phan ngui, phan nhơl kơnòm dềt dê. Gơwèt mờ kơnòm dềt gơtìp kòp jơng tê bơr tàm khà khngờc, digơlan sền gròi mờ sơm kòp tàm hìu. Mơya mè bèp mờ cau ròng siam kơnòm dềt pal jat sền bơta kòp bơh kơnòm dềt dê, dilah sền gŏ ală bơta tềl tơngŏ kòp kơn jơ̆ den tus mơ tơn tàm hìu sơnơm rềp ngan rlau jơh nàng sền gĭt kòp mờ sơm bời di tŭ.

Cau cih Nam Trang- Cau mblàng K’Hạnh