VOV4.K’ho- Tềng đăp broă sền gŏ ală jơi tam gơl să pa BA.4 mờ BA.5 tàm Việt Nam mờ bơta lơh bơtờp mhar rlau mờ ală jơi tam gơl să ndai, bơh ngai 07/07 tus ngai 31/07 nam do, càr Dăk Lăk geh pơn jăt tai dờp rlau 100 rbô ding vaccine kòp Kovid-19 dơ̆ 25 nàng kờñ cĭt tơl jơh vaccine ai làng bol in.

Mờ 110 rbô 100 ding vaccine kòp Kovid-19 dơ̆ do, Dăk Lăk geh lơh jơnau kờñ mpồl cau bơh 12 sơnam rlau hơđang cĭt ding tơngkah wơl dơ̆ 1, dơ̆ 2 rlau 90%; Mpồl cau kơnòm dềt bơh 5 tus 11 sơnam khà cĭt vaccine lơh geh rlau 90%. Nàng dơ̆ cĭt vaccine dơ̆ 25 lơh geh broă jàu neh ai tơlik, Anih tờm Gròi sền kòp tê jê să càr Dăk Lăk neh tă pơgồp jơnau đơs ai Ủy ƀan Ñân zân càr in mờ Sở Y tế in nàng sồr bơta tus bal lơh pràn kơldang rlau tai bơh jơh ală anih lơh broă cíñ trị bơh càr tus kơnhoàl mờ xã dê, mơkung sơlơ tơnguh tai broă lơh mblàng yal ai làng bol in, nàng làng bol gĭt cĭt vaccine là nàng rơcăng sơndră kòp mờ ờ gŏ di là nàng rơcăng lài kòp, broă cĭt vaccine là gơnoar kwơ, kơnòl bơh tơl nă làng bol dê.

            Cau mblàng Lơ Mu K’Yến