VOV4.K’ho- Tơngai pa do, Hìu sơnơm dờng tiah Tây Nguyên neh dờp mờ sơm kòp ai gĭt nđờ jơ̆t nă kơnòm dềt gơtìp jơnau MIS-C hơ̆ là gơtìp as sồt uă bơta tơnơ̆ tŭ bơtờp kòp Kovid-19, tàm hơ̆ geh ală kơnòm dềt gơtìp kơn jơ̆, ờ pràn tă nhơm, ờ pràn nùs sơbơng roh tus màng kis.

Sền gàr kòn tàm Hìu sơnơm dờng tiah Tây Nguyên, bi Vũ Thị Hương ơm tàm sơnah ƀòn Tân Lập, ƀòn dờng Buôn Ma Thuột, càr Dăk Lăk pà gĭt: Pơgăp mờ do rlau dùl nhai, kòn klau 7 sơnam geh tơngŏ duh să, hìu bơnhă ai kòn in hùc sơnơm tơrmù duh să mờ gŏ sau ờ huan duh să tai den tàng hìu bơnhă ờ gŏ test kòp Kovid-19 ai kòn in. Mơya, pơgăp 5 poh tơnơ̆, sau gơtìp duh să sùm, ờ gŏ geh broă lơh lơi nàng gơtùi tơrmù geh duh să, den tàng hìu bơnhă jun sau hờ hìu sơnơm nàng sơm kòp. Tơnơ̆ tŭ ală ƀak sĩ kham, lơh ală xét nghiệm pal lơh, cồng nha pà gŏ sau gơtìp MIS-C tơnơ̆ tŭ bơtờp kòp Kovid-19. Bi Vũ Thị Hương, đơs: Sơbơng roh ngan, tài bơh he ờ gŏ gờñ nàng lời tus tŭ do sơm kòp gơtìp jŏ jòng, ai dilah he gĭt gờñ mờ kòn gơtìp tơnơ̆ kòp Kovid-19 he sơm kòp gờñ rlau den kòn geh pràn rlau, ờ huan kơn jơ̆ rlau.

Ndrờm bè bi Hương sơl, bi Nguyễn Chí Quốc ơm tàm sơnah ƀòn Ea Tam, ƀòn dờng Buôn Ma Thuột kung gơlơh kơlôi rơcăng ngan mờ nrơ̆t ndơl ngan tŭ ală ƀak sĩ pà gĭt, kòn ùr he dê bơtờp jơnau MIS-C tơnơ̆ tŭ bơtờp kòp Kovid-19. Bi  Nguyễn Chí Quốc, đơs: Bơta gơ tơngŏ bơh kòn dê den lài ngan là kòn duh să sùm 4 ngai mờ ngai dơ̆ 5 den hơ̆ sồng mŭt hờ hìu sơnơm, duh să gơlik toh pơrhê, sơnguài bồ, bồ swing, pơdar, jê bồ, gơtuh hă, ờ gŏ gơtùi sàu sa phan lơi ờ. Mpồl cau ƀak sĩ kung dong kờl mờ sơm kòp tus tŭ do den kòn kung neh pràn đau wơl, jơh ală bơta gơ tơngŏ ndrờm gơmù jơh, tŭ do kòn neh pràn, sàu sa gơmŭt wơl bè ờs.

Kơnòm dềt gơtìp jơnau gơbàn MIS-C tơnơ̆ tŭ bơtờp kòp Kovid-19 gam geh ƀak sĩ kham kòp tàm Hìu sơnơm dờng tiah Tây Nguyên

Jăt Tiến sĩ, ƀak sĩ Trần Thị Thúy Minh, Kwang ătbồ Khoa Kơnòm dềt tơrgùm bal Hìu sơnơm dờng tiah Tây Nguyên yal, jơnau gơbàn MIS-C là jơnau as sồt ală phan krơi is, tàm hơ̆ geh: nùs, klờm, leh, tơngoh, kơltau, măt halà ală phan gơwèt pròc klung tàm kơnòm dềt tàm tơngai pơgăp bơh 4 tus 8 poh tơnơ̆ tŭ bơtờp kòp Kovid-19. Do là jơnau tơngŏ ờ bơtờp kòp kơn jơ̆ ngan, digơlan lơh gơlik jơnau sơbơng roh ai kòn dềt in, lời wơl uă jơnau gơlời wơl halà gơlam tus chơ̆t să. Tiến sĩ, ƀak sĩ Trần Thị Thúy Minh, đơs: Jơnau gơbàn MIS-C tơnơ̆ tŭ bơtờp kòp Kovid-19 ờ gơ jăt tàm tŭ he bơtờp kòp Kovid-19 kơn jơ̆ halà nggờc. Ală mè bèp geh kòn bơtờp kòp Kovid-19 halà pin bơtờp kòp Kovid-19 lài hơ̆ den tơnơ̆ pơgăp bơh 4 tus 8 poh mờ kòn dềt geh ală bơta tơngŏ duh să rlau 3 ngai sùm, măt pơrhê, bơr pơrhê, lơmpiăt pơrhê, gơlik toh pơrhê, gơjroh è, ngguh ndị, tê gơlik toh dà pơrhê halà bồ mpàng tê as den pal tus dùl hìu sơnơm rềp ngan rlau jơh nàng geh kham mờ sơm kòp di tŭ, pleh ală jơnau gơ aniai pơlai soh ngan digơlan gơlik geh. Jơnau gơbàn MIS-C tơnơ̆ tŭ bơtờp kòp Kovid-19 kơn jơ̆ ngan mờ sơbơng roh ngan mờ kơnòm dềt. Mơya, dilah geh gŏ mờ mŭt piam kòp gờñ, kham kòp di mờ sơm kòp di tŭ, uă ngan ală cau gơtìp kòp geh bơta tơngŏ wơl niam. Nàng kơnòm dềt ờ bơtờp jơnau gơbàn do, hìu bơnhă pal sền gàr, pleh lời kòn bơtờp kòp Kovid-19. Pal ai kòn in cĭt vaccine kòp Kovid-19 nàng tơrmù khà kòp kơn jơ̆ mờ tơrmù khà chơ̆t tŭ bơtờp kòp.

            Cau cih Nam Trang- Cau mblàng Lơ Mu K’Yến