VOV4.K’ho - Ai mhàm dong kờl cau là broă lơh niam bơnĕ ngan bơh dà lơgar he dê. Mờ gùng dà broă lơh “Tơl ntờc mhàm geh ai, dùl rài kis geh ơm wơl”, broă ai dong kờl gam geh uă mờ pràn tàm Tây Nguyên. Bơh tŭ hơ̆, geh bơtơl khà mhàm geh kwơ ai ală hìu sơnơm in, di pal, di tŭ ai broă sơm kòp cau kòp in.

Mờr 20 nam do, bi Hoàng Minh Trung, atbồ mpồl “Broă lơh pơrhê” kơnhoàl Cư̆ Kuiñ, càr Dăk Lăk ndrờm tus bal ai mhàm dong kờl pah nam 2 dơ̆. Tŭ do, boi neh 38 dơ̆ tus bal ai mhàm dong kờl cau. Bi Trung yal: Lài do, tàm dùl dơ̆ mŭt tàm hìu sơnơm sơm kòp bi bal mờ cau pròc mhàm kờñ geh mhàm. Tŭ hơ̆, tơl kơl dung mhàm kung pal blơi mờ khà priă kas ngan. Di lah ờ geh ală cau ai mhàm dong kờl, hìu nhă bi gơtìp kal ke ngan. Den tàng, tơnơ̆ mờ tŭ neh bời kòp, bi sùm tus bal ai mhàm dong kờl mờ lam sồr ală cau tàm hìu, làng bol tàm ƀòn lòt ai mhàm domng kờl. “Să tờm añ neh dùl dơ̆ kờñ geh mhàm, mờ tàm hìu nhă kung geh mè kờñ geh mhàm den tàng nùs nhơm geh mhàm nàng ai cau pròc mhàm in den gơboh gơbài ngan. Ờ geh priă lơi gơtùi blơi geh ală ntờc mhàm bè hơ̆. Mờ kwơ màng rơlao tai tŭ he ai mhàm, lam sồr ai mhàm mờ geh ală cau dờp bal, hơ̆ là dùl bơta mờ he gơboh gơbài ngan”.

Tàm sơnam 56, ồng Nguyễn Tấn Chờ, kis tàm xã Quảng Tiến, kơnhoàl Cư̆ Mgar kung neh uă dơ̆ tus bal ai mhàm dong kờl. Ồng Chờ pà git, mhàm AB+ ồng dê gơwèt mpồl mhàm kwơ màng ngan den tàng geh ờ uă cau kòp kờñ ngan geh. Ồng chờ hờp ngan tŭ ală ntờc mhàm geh ai neh dong kờl gàr wơl rài kis cau kòp in. “Tus tŭ do, añ geh ai mhàm dong kờl 44 dơ̆. Kah ngan hơ̆ là dơ̆ sơnrờp tàm rài kis añ ai mhàm dong kờl bơh dùl nă cau tàm mpồl lơh broă bal. Mờ tơnơ̆ do tai là ai tiểu cầu dong kờl dùl nă sao dềt 3 sơnam”.

Jăt ồng Y Wem Hwing, Phó Củ tịc UɃÑZ kơnhoàl Cư̆ Mgar yal: Kơnờm mờ broă lơh niam broă lam sồr, den tàng tus tŭ do, làng bol neh wă mờ broă ai mhàm dong kờl ờ gơtìp aniai tus mờ bơta pràn kơl dang să jan mờ gam dong kờl cau gơtìp kòp. “Lài do, làng bol kòn cau Rơđê ngòt ngan mờ broă ai mhàm dong kờl. Mơya tŭ do, bơh ơruh pơnu tus mờ cau kra kòn cau Rơđê đơs is mờ mpồl bơtiàn 24 jơi bơtiàn kòn cau kis bal tàm kơnhoàl Cư̆ Mgar ndrờm tus bal ai mhàm dong kờl. Ală cau do ai mhàm dong kờl uă dơ̆ mờ tŭ geh jơnau tàm tiah lơi kờñ mhàm là geh tus mơ ai mhàm dong kờl”.

Ồng Nguyễn Đức Phú, Kwang atbồ Mpồl lam sồr ai mhàm dong kờl càr Dăk Lăk pà git: Di lah nam 2003, gùt càr mìng geh lam sồr geh mờr 700 kơl dung mhàm, den tus tŭ do pah nam lam sồr geh rơlao 22 rơbô kơl dung mhàm. Ală kơl dung mhàm lam sồr geh neh di tŭ sơm kòp dong kờl uă cau kòp in. “Gơwèt mờ broă lam sồr ai mhàm dong kờl, làng bol geh tus bal uă ngan tŭ geh tam pà ală ntờc mhàm bơh să tờm ai cau kòp in. Nàng cau kòp geh mhàm sơm kòp. Di lah gơtìp ală bơta ờ tơl mhàm den mpồl lam sồr ai mhàm dong kờl càr neh geh ală gùng dà broă lơh nàng mpồl ai mhàm dong kờl in geh rơcang lài bè: Đoàn mpồl ală anih lơh broă càr, hìu bơsram đại học Tây Nguyên, mpồl Mhàm pơrhê bơh kwang àng càr, mpồl bơh ờ uă hìu bơsram geh pơn jăt tai ai mhàm dong kờl nàng ai tơl mgàm sơm kòp in”

Broă ai mhàm dong kờl is tàm càr Dăk Lăk tŭ do neh lơh geh uă tus tàm gùt càr. Ală ntờc mhàm dong kờl ờ mìng cèng geh bơta niam nàng geh kis cau kòp in, mờ gam tơlik nùs nhơm, broă tam pà bal, pơgồp bal lơh geh ală bơta niam bơnĕ.

Pa do, Mpồl đơng lam, lam sồr ai mhàm dong kờl ƀòn dờng Pleiku, càr Gia Lai kung neh pơgồp bal mờ ală mpồl lơh broă geh gơnoar, bơyai lơh lam sồr ai mhàm dong kờl dơ̆ sơnrờp nam 2022. Mờ jơnau “Tam pà ntờc mhàm pơrhê – Jào nùs nhơm kơ̆p kờñ”, dơ̆ ai mhàm dong kờl do geh rơlao 300 nă kwang bàng, kông cứk, viên cứk, cau lơh broă, đoàn viên, cau tàm mpồl, cau ling ală mpồl ling mờ làng bol kis tàm ƀòn dờng Pleiku tus bal. Lŏ Võ Thị Quỳnh Trâm, Phó Ƀí thư Đoàn sơnah ƀòn Tây Sơn, ƀòn dờng Pleiku yal: “Ngai do là dơ̆ 12 ai mhàm dong kờl añ dê, añ tŭ lơi kung geh tàm bơta là kờñ ai ntờc mhàm do nàng dong kờl geh uă cau ndai tàm bơta kal ke, jal mhar. Kung kơ̆p kờñ bơh broă ai mhàm dong kờl dơ̆ sơnrờp do, tơnơ̆ do geh hòi jà uă đoàn viên rơlao tai kung bè ală cau geh nùs nhơm niam uă rơlao tai. Tàm bota kòp kovid-19, den să tờm añ lài mờ tŭ lòt ai mhàm dong kờl kung neh test kòp kovid-19 is, kung bè gàr niam jăt jơnau bơto sồr 5k nàng ờ lơh gơrềng tus mờ mpồl bơtiàn”.

Kung tàm nhai 4 do, Mpồl đơng lam ai mhàm dong kờl càr Kon Tum neh bơyai lơh lam sồr “Ngai gùt làng bol ai mhàm dong kờl nam 2022”. Đơs tàm dơ̆ lam sồr, Phó Củ tịc UɃÑZ càr Kon Tum mò Y Ngọc sồr ală anih lơh broă, mpồl lơh broă bal mờ làng bol tus bal uă ngan, tus dờp bal broă lơh niam bơnĕ dong kờl cau. Tơnơ̆ mờ tŭ lam sồr, geh rơlao 300 kơl dung mhàm geh làng bol càr Kon Tum ai pà pơgồp bal tàm “Anih prăp gàr mhàm ntrờn” drơng tàm broă sơm kòp cau kòp in.

Cau mblàng Ndong Brawl