VOV4.K’ho - Tơngai pa do, tàm càr Dăk Lăk sùm gơtìp ală dơ̆ bŭ dà lơh uă kơnòm dềt gơtìp chơ̆t. Gah lơh broă geh gơnoar gam lơh jăt uă broă nàng tơmù ờ uă ngan bơta do.

Rơ̆p tàm poh lài, tàm xã Cư̆ Pơng, kơnhoàl Krông Búk, càr Dăk Lăk gơtìp bŭ dà lơh 3 nă oh mờ mi tờm tàm dùl hìu gơtìp chơ̆t. Kòn dờng rơ̆p 9 sơnam, kòn dềt ngan 5 sơnam.

 Tơnao dà Ea Dhung Tiêng, xã Cư̆ Pơng, kơnhoàl Krông Búk-tiah gơtìp 3 nă oh mờ mi tòm gơtìp chơ̆t tài bŭ dà

Lŏ Nguyễn Thị Loan, mơi tờm bơh ală kơnòn dềt gơtìp chơ̆t yal wơl: “Ngai tŭ mè bol khi rê den kòn dờng dan mờ mè lòt nhơl hờ đah ngkời hìu geh tơnao dà nàng nhơl, mè bol khi ờ ai lòt, lòt tus tàm hơ̆ là chơ̆t bŭ dà. Bol khi kung ờ khin lòt sơl, mơya dùl thoa mờ hơ̆ tàm nggùl jơ, ờ gŏ kòn den hơ̆ sồng kah lòt jòi. Tŭ lòt oh añ kah tus hờ tơnao dà hờ ngkời hìu mờ kòn neh dan nti den tàng ntoăt tus, tŭ tus den gŏ jĕp, hơ̆ sồng jòi gŏ dơ̆ lĕ 2 nă kòn dềt gam pơr đồng, kòn dùl nă tai ală cau lơh ngan bùt hơ̆ sồng gŏ, lơh ngan nàng kis wơl mơya ờ jai tai”.

Tàm ală cau gơtìp rềs àr geh 2 nă oh là kơnòm bơsram tàm Hìu bơsram kấp 1 Phạm Hồng Thái, xã Cư̆ Pơng. Pơgru Vũ Thị Vân, Kwang atbồ hìu bơsram pà git, tàm hìu bơsram geh tơnao dà, kờp dŭ tus kàl rơlô bơkang do, tơnơ̆ mờ tŭ kòp kovid-19 gơmù den hơ̆ sồng hìu bơsram geh pờ wơl ală ơdŭ bơto re dà kơnòm bơsram in. Ală kơnòm bơsram geh măt tàm khà măt bơsram re dà, mơya ờ hềt thàn bơsram den neh gơtìp rềs àr. “Di lah kòp gơtờp gơmù den hìu bơsram geh bơyai lơh pờ ală ơdŭ bơto re dà ai ală kơnòm bơsram in. Bè đah drơng broă đội den sùm lam sồr ală kơnòm bơsram bè bơta ngăc ngar rơcang sơndră mờ bŭ dà, rềs àr chơ̆t jê nàng sền gàr ờ do ờ dă ală kơnòm bơsram in. bơh lài tus tŭ do, hìu bơsram ờ hềt tŭ lơi gơtìp bơta chơ̆t jê bè do, moăt jrùng ngan tŭ gơtìp dơ̆ lĕ bàr nă kơnòm bơsram gơlòng sồr, bơsram jăk mờ niam bơnĕ ngan”.

Mpồl lơh broă geh gơnoar tàm ƀòn lơgar tus tam pà bal jơnau moăt jrùng mờ pà mờr 130 tơlăk đong ai hìu nhă 3 nă oh gơtìp chơ̆t bŭ dà in

Jăt khà kờp bơh Sở Lao động-Thương binh mờ Xã hội càr Dăk Lăk pà gŏ, nam 2020 tàm càr do neh gơtìp 54 dơ̆ bŭ dà lơh 73 nă kơnòm dềt gơtìp chơ̆t; khà do bơh nam 2021 là 48 dơ̆ mờ 51 nă kơnòm dềt gơtìp chơ̆t. Mìng is tàm ală ngai lồi nhai 3 nam 2022 pa do neh gơtìp 2 dơ̆ bŭ dà lơh 5 nă kơnòm dềt gơtìp chơ̆t tàm kơnhoàl Ea Súp mờ Krông Búk.

Ồng Nguyễn Duy Tuyết, kwang atbồ phòng dong kờl mpồl bơtiàn gơwèt Sở Lao động-Thương binh mờ Xã hội càr Dăk Lăk yal, tàm 2, 3 nam pa do, bơta bŭ dà tàm kơnòm dềt tàm càr Dăk Lăk bŭ lah gơmù, mơya gam uă, tàm hơ̆ gơtìp uă dơ̆ bŭ dà mpồl bal. Anih lơh broă geh gơnoar bal mờ gơnoar atbồ sùm bơto sồr làng bol gàr niam ờ do ờ dă ai kơnòm dềt in, tàm hơ̆ uă ngan là tàm dơ̆ rơlô bơkang. “Anih lơh broă Lao động-Thương binh mờ Xã hội là anih lơh broă đơng lam, gơnoar atbồ ƀòn lơgar tàm xã là pal lam sồr tus mờ ală cau mè bèp, ha là ală cau dong kờl kơnòm dềt ndai pal sùm sền gròi kơnòm dềt tàm hìu, bañ lời kơnòm dềt lòt is tus ală tiah rềp mờ croh dà, dà dờng, tơnao dà ngòt rơngơ̆t”.

Đơs bè broă rơcang sơndră mờ rềs àr bŭ dà ai kơnòm bơsram in, ồng Đỗ Tường Hiệp, Phó kwang atbồ Sở Giáo dục mờ Đào tạo càr Dăk Lăk yal. “Sở Giáo dục mờ Đào tạo càr đơng lam ală hìu bơsram rơcang bơto bè bơta ngăc ngar tàm rài kis, bè rơcang sơndră mờ bŭ dà ai kơnòm bơsram in; ai ală cau pơgru bơto thể chất lòt bơsram bơtơl nàng rê dong kờl bơto re dà ai ală kơnòm bơsram in. Bơ̆t bơtàu khà broă rơcang sơndră mờ rềs àr chơ̆t jê tàm hơ̆ geh bŭ dà tàm jơh ală hìu bơsram, lơh ngan tus nam 2030 den gơmù 10% ală dơ̆ bŭ dà, tus nam 2025 den geh 50% khà kơnòm bơsram tàm càr Dăk Lăk git re dà”.

Tŭ jơh ală cau tàm hìu, hìu bơsram bal mờ gùt mpồl bơtiàn geh tus bal nàng rơcang sơndră mờ rềs àr chơ̆t jê ai kơnòm dềt in, tàm hơ̆ geh chơ̆t jê tài bŭ dà, kơ̆p kờñ là tàm tơngai tus, tàm càr Dăk Lăk geh ờ gam gŏ ală dơ̆ chơ̆t jê tài bŭ dà tai.

Cau cih Tuấn Long- Cau mblàng Ndong Brawl