VOV4.K’ho - Sền wơl ală bơta niam bơh git nđờ nam tơnơ̆ mờ tơnklàs, dà lơgar tơrgùm bal, tàm hơ̆ uă ngan là mờr 3 nam tam dră mờ kòp kovid-19, cồng nha kwơ màng tàm broă lơh jăt broă kòn cau tàm càr Dăk Lăk pal yal tus là broă tơnguh mờ lơh gơs mpồl lơh sơnơm tàm ală tiah, di pal niam mờ broă kờñ kham sơm kòp mờ drơng gàr bơta pràn kơl dang să jan lài ngan ai làng bol in.

                 Ală phan lơh sơnơm neh blơi tơl nàng sền gàr bơta pràn kơl dang să jan làng bol in

Tàm pah dơ̆ gơtìp kòp tê jê să, ồng Y Diệp Uông, kis tàm ƀòn Dơng Bắk, xã Yang Tao, kơnhoàl Lăk, càr Dăk Lăk tus hờ hìu sơnơm xã nàng kham, ai sơnơm nàng rê sơm kòp. Ồng Y Diệp yal: Làng bol tàm ƀòn chờ hờp ngan tŭ gŏ hìu sơnơm xã geh lơh dờng niam, ală y, ƀák sĩ sền gàr jơh nùs, nền nòn: “Lài do di lah gơtìp kòp tê jê să he duh khoai yàng mơ, ha là pin dờn ờ di pal. Tŭ do ờ di bè hơ̆ tai, tŭ do neh sơbì jơh bloh tài Dà lơgar lam sồr geh hìu sơnơm xã, den tàng di lah gơtìp kòp tê jê să he lòt tus tàm hìu sơnơm. Lài do kal ke ir, tŭ do geh rơndeh, geh hìu sơnơm rềp mờ ƀuơn”.

Mờ uă làng bol, Hìu sơnơm xã Yang Tao uă nam do neh gơs tiah kơl dìng iang nùs tŭ gơtìp kòp tê jê să. Y sĩ Nguyễn Văn Hà, Phó kwang atbồ drơng broă hìu sơnơm xã Yang Tao pà git: Uă làng bol ờ bơtoah gơtìp rềs àr tàm tŭ lơh broă, cau kra gơtìp kòp tê jê să, cau ùr geh bun deh kòn tŭ nggùl mang ờ gơtùi tus hờ hìu sơnơm den ală kwang bàng, cau tàm mpồl lơh broă lơh sơnơm ƀòn di tŭ tus tơn tàm hìu nàng kham, sơm lài ngan ai làng bol in. “Do là tiah mìng geh làng bol kòn cau kis bơh yau mờ kis mìng mờ broă lơh sa suơn sre den tàng bơta ngăc ngar ờ uă. Tơngai pa do, bơta git wă bơh làng bol dê neh gơguh uă. Mùl màl, tơngai pa do tàm broă rơcang sơndră mờ kòp kovid-19, làng bol neh git lơh jăt jơnau bơto sồr 5K, git bĭc tàm kơmùng, mus pès chi che jăt gah hìu. Làng bol neh git lơh wàng ròng phan, wàng kơnrồ geh lơh ngài mờ hìu, git ngui ală broă lơh kloh niam. Tŭ do, di lah gơtìp kòp tê jê să làng bol ờ gam duh khoai bè lài do tai mờ làng bol neh tus hờ hìu sơnơm. Dùl nam bol añ kham sơm kòp ai bơh 8 rơbô tus 10 rơbô nă cau kòp bal mờ làng bol kis tàm xã in”.

                                Ƀák sĩ tàm hìu sơnơm kơnhoàl Lăk khăm, sơm kòp cau kòp in

Rơlao 27 nam đềt mềr mờ broă lơh sơnơm, ƀák sĩ Nông Văn Sáng, kwang atbồ hìu sơnơm xã Ea Mdroh, kơnhoàl Cư̆ Mgar gam kah sùm ală jơnau tàm ngai sơnrờp tus tàm tiah do. Ƀák sĩ yal: Lài do, rài kis làng bol gam uă kal ke, uă bơhiàn ờ niam bè kòp tê jê să ờ tus hờ hìu sơnơm, deh is kòn tàm hìu, ờ lơh jăt broă rơcang sơndră mờ kòp gơtờp kung gam geh. Tus tŭ do, mờ broă lơh ngan bơh gah lơh sơnơm, làng bol neh tơnguh uă jơnau git wă tàm broă sền gàr bơta pràn kơl dang să jan, tus is hờ hìu sơnơm nàng kham tŭ gơtìp kòp tê jê să, ală bơhiàn duh khoai, sơm kòp mờ nha chi neh rơhời sơbì. 100% khà cau ùr geh bun ndrờm deh tàm ală hìu sơnơm, ờ gam cau deh kòn is tàm hìu tai. “Tŭ do neh geh măi siêu âm, măi was plai nùs tàp, ală măi bè măi jồp kơnhà, xét nghiệm bè ờs. Tŭ broă sền gàr bơta pràn kơl dang să jan tàm xã geh tơnguh uă, làng bol ờ pal lòt kham kòp tàm ală tiah ngài, geh tơmù ală khà priă blơi xăng rơndeh, tơngai lòt, cau lòt sền gàr ală bơta gơmù uă ngan”.

Jăt khà kờp bơh gah lơh sơnơm càr Dăk Lăk yal, tŭ do geh 100% hìu sơnơm xã neh geh lơh, khà xã geh khà broă dà lơgar bè lơh sơnơm tus tŭ do rơlao 99%. Tàm kơnhoàl Lăk-do là dùl tàm ală tiah kal ke càr Dăk Lăk dê, tus tŭ do broă sền gàr bơta pràn kơl dang să jan ai rơlao 74 rơbô nă làng bol geh uă cồng nha kwơ màng. Ồng Phạm Phú Anh, Phó kwang atbồ hìu sơnơm kơnhoàl Lăk pà git: Tus tŭ do, jơh ală hìu sơnơm xã ndrờm geh lơh jăt broă kham sơm kòp tàm kơnhoàl ndrờm geh tơl khà lơh sơnơm xã tơngai bơh nam 2016 – 2020. Ală hìu sơnơm ndrờm lơh jăt broă kham sơm kòp mờ sră ƀảo hiểm y tế, gàr niam broă ai sơnơm cau kòp in. Bal mờ hơ̆, ală hìu sơnơm sùm lơh jăt niam ală broă sơm kòp lài nganmờ ntrờn tus hờ hìu sơnơm dờng rơlao di tŭ gơwèt mờ ală cau gơtìp kòp jroă. “Muh măt broă lơh sơnơm tàm xã tàm do neh geh tam gơl uă ngan. Bè ală kòp gơtờp geh tàm broă cit sơnơm vaccine tŭ do gơmù loh làng ngan. Tàm broă sền gàr bơta pràn kơl dang să jan deh dùh cau mè mờ kòn se den nùs nhơm cau ùr tàm do tam gơl uă ngan. Bè lài do mìng deh tàm hìu, tŭ do làng bol neh tus tàm ală hìu sơnơm ha là hìu sơnơm dờng nàng deh kòn”.

Tàm càr Dăk Lăk, broă lơh sơnơm tàm ală xã ngai sơlơ di pal mờ broă sơm kòp cau kòp in. ală hìu sơnơm neh pơgồp bal niam tàm broă sền gàr bơta pràn kơl dang să jan, dong kờl làng bol dờp geh broă lơh sơnơm geh bơta niam uă tơn tàm xã, lơh broă lơh sơnơm rềp bal bơh ală tiah dê.

Cau cih Tuấn Anh-Cau mblàng Ndong Brawl