VOV4.K’ho- Tơngai pa do, uă tiah tàm gùt lơgar đơs bal mờ càr Dăk Lăk đơs is gơ ơm tàm bơta geh ngan ờ tơl sơnơm mờ phan ngui gah lơh sơnơm neh lơh làng bol in kơlôi rơcăng ngan. Pa do, Thủ tướng Cíñ phủ ồng Phạm Minh Chính neh đơng lam dơ̆ pơrjum Duh broă sùm Cíñ phủ pơrjum bè broă do, tàm hơ̆ đơs tus jơnau bơh tài gơbàn bè lơh sră nggal tàm pơrlòng jòi cau blơi. Thủ tướng sồr tềng đăp măt Ƀộ Y tế đơng lam, pơgồp bal mờ ală ƀộ, ngàñ geh gơrềng mhar kờp sền wơl jơh ală jơnau cih bơh kơrnoăt boh lam dê gam geh ngui tŭ do gơrềng tus broă blơi sơnơm, măy mok, phan ngui gah lơh sơnơm. Jăt tàm bơta hơ̆ rơcăng lài, jơh nùs bơsong, ai lơh jăt ală sră nggal jăt gơnăp gơnoar.

Gam sền gàr bơklau tàm Hìu sơnơm Đại họk Buôn Ma Thuột, càr Dăk Lăk, cau hìu bơnhă bơh dùl nă cau kòp dê pà gĭt, pơgăp mờ do 5 ngai, cau pròc mhàm gơtìp gơdrồl mhàm nùs mờ geh jun mhar sơm kòp tàm Hìu sơnơm dờng tiah Tây Nguyên. Tàm ală tŭ kham, ƀak sĩ pà gĭt, bơta kòp bơh bơklau bi dê pal ơn stent mạc vàñ den hơ̆ sồng gơtùi dong kờl kis. Bulah bè hơ̆, tài bơh hìu sơnơm ờ geh măy mok do den tàng mìng gơtùi dong kờl bơh sơnrờp lơm mờ sồr hìu bơnhă jun hờ hìu sơnơm ndai: Bàr pe nă cau drơng broă tàm hơ̆ khi mìng kham sền dùl êt lơm gời, khi đơs tơn là kòp do tă priă jền uă ngan, tàm do lời jŏ dùl êt lơi là chơ̆t tơn, tŭ do tàm do ờ geh măy mok lơi mờ lơh ờ.

Ờ mìng ờ tơl phan ngui gah lơh sơnơm lơm, uă cau kòp tàm càr Dăk Lăk kung tìp kal ke tŭ blơi sơnơm tàm ală hìu tac sơnơm bơh hìu sơnơm dê. Bơta geh ngan ờ tơl sơnơm sơm kòp mờ phan ngui gah lơh sơnơm geh ồng Nguyễn Đại Phong, Kwang ătbồ Hìu sơnơm dờng Tây Nguyên yal sơl. Ồng Phong yal, jơnau bơh tài gơbàn là tài bơh ờ hềt gơtùi lơh jăt ală bơnah broă blơi phan uă gơwèt gơnăp gơnoar bơh Sở Y tế càr Dăk Lăk dê. Ồng Phong pà gĭt tai: Tus tŭ jiơ do, gam 2 bơnah broă gam gơkòl jơnau cih bơh kơrnoăt boh lam dê, bè bơnah broă kồ ntìng den geh ală bơta phan ờ hềt geh cih yal gơguh giă, ờ hềt geh cih tàm broă rơndăp lơh bơh Ƀộ dê mờ geh ală bơta mờ sră ai gơnoar bơh bol he dê kung ờ hềt sir sơl mờ bơnah broă blơi stent mạc vàñ, tàm tơngai pa do bàr pe hìu sơnơm nùs tàm Hà Nội mờ bàr pe hìu sơnơm ndai geh gơrềng tus kơrnoăt boh lam bè broă stent mạc vàñ den tàng broă tàm pơrlòng blơi bơh stent mạc vàñ dê là ală kông ty khi gam kơrhia ngan, ngan den tàng bè hơ̆ hìu sơnơm tŭ do gam lùp sền. Dilah ờ lơh di den là lơh tìs kơrnoăt boh lam.

Ờ tơl sơnơm mờ phan ngui gah lơh sơnơm neh lơh broă kham sơm kòp tàm Hìu sơnơm dờng tiah Tây Nguyên tìp kal ke

 Ồng Nay Phi La, Kwang ătbồ Sở Y tế càr Dăk Lăk pà gĭt, tơrgùm kờp bơh sơnrờp, tàm bàr pe anih kham sơm kòp tàm ù tiah càr dê gam ờ tơl bàr pe bơta phan gơrềng tus kham mờ sơm kòp, bè: sơnơm kháng siñ, sơnơm gơrềng tus mpồl generic ngan là sơnơm dong kờl sơm kòp lơh pràn wơl să jan. Jăt ồng Nay Phi La đơs, jơnau bơh tài gơbàn bơta geh ngan ờ tơl sơnơm, phan ngui gah lơh sơnơm là tài bơh kòp Kovid-19 jŏ jòng sùm 2 nam do neh lơh gơkòl ală anih lơh gơlik phan kă bro gùt plai ù, giă phan ngui nàng lơh, logistic ndrờm gơguh den tàng kal ke ngan nàng ai geh giă dipal. Bal mờ hơ̆, broă blơi măy mok lơh sơnơm gam kal ke rlau tài bal dùl bơta măy mơya rơndăp mòn krơi is, bơta ngui măy mok krơi den tàng giă geh krơi sơl. Bơta phan sơnơm geh tam pà gơs 5 mpồl nàng tàm pơrlòng jòi cau blơi mơya phan ngui gah lơh sơnơm ờ hềt geh tam pà mpồl loh làng, ờ hềt kơlôi tus jơnau bơngă pin dờn, bơta niam bơh gah lơh gơlik dê den tàng geh giă krơi is. Bơta do kung lơh kơryan broă lơh jăt broă tàm pơrlòng jòi cau blơi.  

Nàng tă bơsong kal ke ing, Sở Y tế càr Dăk Lăk neh sồr ală anih kă bro sơnơm jăt tàm ală sră hơ pơrgon pơn jăt tai dong kờl sơnơm tàm jơh gùt càr in. Bè jŏ jòng, càr geh lơh dùl mpồl tàm pơrlòng jòi cau blơi is nàng dong ai ală hìu sơnơm in ờ gơtìp gơkòl tài bơh ală jơnau cih bơh kơrnoăt boh lam dê. Ồng Nay Phi La, đơs: Bol añ tă pơgồp jơnau đơs ai Ủy ƀan Ñân zân càr in pal lơh tơn anih tờm tàm pơrlòng jòi cau blơi sơnơm phan ngui gah lơh sơnơm tơrgùm ai jơh gùt gah in krơi is jơh. Cih mat sơnơm phan ngui gah lơh sơnơm is ai càr in jăt tàm anih he dê neh bơcri priă blơi măy mok bơh sơnrờp, lơh dùl kơrnoăt sền gàr kung bè dong kờl kơrnoăt boh lam, priă tă lơh ai kwang bàng tus bal tàm pơrlòng jòi cau blơi in.

Ngai 23/06 pa do, Thủ tướng Cíñ phủ ồng Phạm Minh Chính neh đơng lam dơ̆ pơrjum Duh broă sùm Cíñ phủ bè bơta tăc bro sơnơm, phan ngui gah lơh sơnơm mờ ală broă lơh sền gàr mpồl cau lơh broă ai gah lơh sơnơm in. Jăt jơnau yal bơh Ƀộ Y tế dê, tŭ do geh bơta geh ngan ờ tơl sơnơm tàm bàr pe tiah mờ hìu sơnơm kâp dà lơgar. Gơbàn jơnau do là tài bơh phan ngui nàng lơh gơlik, phan kă bro ờ huan ngan geh, giă tăc blơi phan kă bro uă tam gơl, broă blơi sơnơm, phan ngui gah lơh sơnơm, dà sơnơm, ală siñ phẩm ai rơcăng sơndră kòp mờ kham, sơm kòp in sơlơ gơ gơs kal ke rlau tai. Pal sền ngac là geh nùs nhơm kơlôi rơcăng, ngòt tìs, ngòt lùp sền, sền swì, ờ khin lơh, ờ khin blơi bơh bàr pe tiah mờ anih lơh broă dê. Pơndŭt dơ̆ pơrjum, Thủ tướng Cíñ phủ ồng Phạm Minh Chính đơs loh, jơnau gơbàn tài bơh ờ gŏ rơcăng lài là tờm, mờ broă bơyai lơh tàm pơrlòng jòi cau blơi tơrgùm lơyài geh lơh jăt; ờ hềt jơh nùs cribơyai giă sơnơm dipal mờ bơta geh ngan tàm drà. Ồng Phạm Minh Chính, Thủ tướng Cíñ phủ sơñio loh: Añ sồr lơh jăt niam ală jơnau sồr bơh kơrnoăt boh lam dê gam geh ngui tŭ do bè tàm pơrlòng jòi cau blơi tơrgùm tàm jơh bal kâp dà lơgar mờ kâp ƀòn lơgar; jăt tàm nùs nhơm là pal yal loh làng, song dơ pă, ờ ndơ̆p mpồn jăt di mờ drà kă bro, kơryan bơta ờ niam, kơryan bơta sa kwề sa kwà, bơta kwơ mpồl bal nàng kờñ geh ai tơl sơnơm ai ală hìu sơnơm in. Tềng đăp măt là pal gàr geh sơnơm tàm mat bảo hiểm y tế. Kờp sền, sồr sơlơ ătbồ dà lơgar tàm ală anih lơh broă geh gơrềng tus sơnơm tơm ba nàng ờ gŏ di lòi lơh lơyài tàm broă ai sră ai gơnoar sơnơm; di tŭ lơh tam gơl wơl, bơtơl ală jơnau cih nàng gờñ tơrmù ƀà sră nggal. Lơh pràn tam pà kâp nàng blơi ală măy mok lơh sơnơm jăt tàm bơta ai lơh tơl jăt jơnau sồr, broă jàu mờ sơlơ lòt sền, jăt sền.

Cau cih VOV Tây Nguyên- Cau mblàng Lơ Mu K’Yến