VOV4.K’ho- Anih Jơnau đơs Việt Nam ngai do chờ hờp ngan, pơniờ să ngan tơngkah kir sơnrai 77 nam Ngai crơng gơs. VOV gĭt nđờ nam do neh lòt bal mờ bơta bơtàu tơnguh lòt guh bal mờ dà lơgar, pơniờ să là anih lơh broă mblàng yal jơnau uă gah, yal tơngĭt jơnau ai jơh ală hìu in. Geh dùl mpồl cau ngềt ngơ̆t tă pơgồp dà kơlhề ai jơnau đơs in tus mờ uă tiah, là ală cau drơng măy jơh nùs ngan mờ broă lơh, sơrlèt gan kal ke gàr ai jơnau đơs pờ tơlik in geh pờ sùm, loh làng, ngài, uă, di pal mờ jơnau sồr.

Bơh bồ bơnơm jơnhoa dơ̆ bàr tàm càr tiah kơh bơnơm lồi tiah đah tô dà lơgar dê Hà Giang- Chiêu Lầu Thi. Jăt dà kòn cau Dao dê hơ̆ là Sin cờn mhual tài bơh kờñ hàu guh tus hơđang bồ bơnơm pal hàu gan 9 gùng kwềt... Bè hơ̆ mờ nam 2020 dùl Anih tờm pờ tơlik jơnau đơs dà lơgar neh geh lơh mpờl gŏ loh làng ngan tềng hơđang bồ bơnơm jơnhoa bềng mhual dà sơtŭ hơ̆. Sền drơng broă tàm do mìng geh 2 nă cau drơng măy lơm, khi bơh ală anih pờ tơlik jơnau đơs VN1, CK2 tàm Hà Nội pah nhai tàm ala gơ̆p dùl dơ̆ tus drơng pờ măy. Tàm anih măy pờ tơlik jơnau đơs do, ngài mờ tiah geh dà oh mi pal tàm ala gơ̆p tềm pềr ngan tơl ntờc dà mìu nàng ngui gùt nam sùm. Mơya, sơlơ̆u wơl tiah do sùh iò uă ngan. Cau drơng măy bi Cao Hoàng Tiến, yal: Ngai rañ rơsơh kung bè ngai mìu sơl, dilah pìh phan den ìs dùl poh kung ờ tŭ lơi rañ sơl, mờ dà den ờ huan ngan wơl geh den tàng bè hơ̆ tŭ hồ den pal prăp tàm vali nàng jơh nhai drơng măy cèng rê sồr pơ ùr pìh ƀà.

Tàm tiah ngài làng bol nàng geh biăp, geh phe sa, ală bi kung ơm kơ̆p ngai pờ drà, lòt jăt làng bol mù bơnơm blơi mờ àñ tùng ngui jơh dùl poh. Tàm tiah kơh bơnơm jơnhoa geh dơ̆ mìu dùl nhai tơn, oh mi ờ gơtùi lòt drà den pal sa ƀung mi nàng gơ in ờ huan đau jơgloh ndul. Dơ̆ mìu càl rbŭt dờng sồ 3 pa do neh lời wơl ală bi in jơnau rơngòt ngan gĭt lơh, tàm bơta jơnhoa rlau 2 rbô thơk pơndrờm mờ măt dà lềng, càl khồm pràn ngan, gŏ gơlơh bè gơ pồ pơrdô jơh ală phan, kơnàs còng sùm...nggui tàm hìu pờ măy mờ mìng ngòt gơtìp kơnàs còng lơm lơh ờdiơng măy.

Kơnòl broă bơh ală bi dê là ngai lơi kung hơ̆ lơm, guh bĭc bơh 4 jiơ drim pờ măy pờ gah pờ tơlik jơnau đơs VOV1 mờ gah VOV4 ală dà đơs kòn cau drơng làng bol ală càr: Hà Giang, Tuyên Quang, Yên Bái, Cao Bằng in...Khi gĭt geh là, jơnau đơs bơh Anih pờ tơlik jơnau đơs dê ờ tŭ lơi rơgơi tơn chơ̆t ờ nàng làng bol in geh kơno yal tơngĭt jơnau bơh Hà Nội, ală broă lơh sa, bơ̆t bơtàu rài kis hìu bơnhă... Ală cau drơng măy mờ uă cau kông ñân ndai ndrờm geh kòn dềt...dơ̆ do Anih Jơnau đơs Việt Nam pờ uă jơnau đơs bè ngai sơnđờm mŭt nam bơsram pa lơh ală bi...ơm nggui ñă ntàu ờ suk ờ iang. Dilah jiơ ơm tàm hìu, ngan ngồn khi geh jun kòn lòt blơi sră măy, sră cih, blơi àu mpha niam nàng soh lòt bơsram tàm nam bơsram pa...Ai ơm tàm do ală bi mìng gĭt hòi điện thoại nàng pơndờm pơnđiang ală kòn lơh ngan pơđơl pràn lơm.

Tàm Anih pờ tơlik jơnau đơs tiah đah jum tàm gùl lơgar tàm kơnhoàl Thuận Nam, càr Nình Thuận den tơngai duh tơr ồ sùm gùt ngai, duh sùm jơh gùt nhai. Anih pờ tơlik jơnau đơs tiah đah jum tàm gùl lơgar geh Anih Jơnau đơs Việt Nam ai ngui tàm nam 2021. Kơnòl broă tờm bơh Anih do dê là pờ tơlik jơnau đơs tus làm jơh tiah dà lềng đah mat tơngai lik mờ bàr bồt Hoàng Sa mờ Trường Sa bơh Dà lơgar dê.

Tàm bơta cau lơh broă sa priă nhai ờ gơguh den tàng kâp hơđang neh lơh tàm pơdar cau drơng măy bơh ală anih pờ tơlik jơnau đơs tiah tàm gùl lơgar mờ tiah ring đah jum dà lơgar tus lơh broă. Bi Quảng tơngăc pơ ùr mờ kòn bal mờ oh mi lơh broă tàm Anih pờ tơlik jơnau đơs An Hải, ƀòn dờng Đà Nẵng, do là tiah bi neh lơh broă sùm rlau 20 nam nàng mŭt ndo lơh broă. Bi Quảng, pà gĭt: Hìu oh geh bàr nă kòn gam tàm sơnam mìng gĭt sa mờ bơsram sră lơm (ơdŭ 11 mờ ơdŭ 8) kờñ ngan bơta geh mat bơh cau bèp dê mơya tài bơh kơnòl broă, tài broă lơh pờ tơlik jơnau đơs, oh ờ gŏ ngòt bòl glar kal ke ngài hìu tŭ lơi kung jơh nùs rơcăng mŭt tàm do nàng dờp lơh kơnòl broă.

Ngai sơnrờp tus tàm Anih pờ tơlik jơnau đơs tiah đah jum tàm gùl lơgar bi gơlơh krơi sƀơi ngan tài bơh anih pờ tơlik jơnau đơs do geh lơh tàm dùl bơtul bràs ơm ngài mờ tiah tờm kơnhoàl Thuận Nam tus rlau 30 kơi sồ, pah tŭ lik bơdìh sền swì măy mok, che, jrong là gơtìp bràs duh lơh lơhò jê sra ngan bàr nơm mpàng jơng. Krơi mờ Chiêu Lầu Thi ơm tàm Thuận Nam 4 kàl tơngai duh lơm, àu mpha tàm do pa pìh ìs bàr pe mbrơs mat neh rañ tơn...mơya kung mìng tơnơ̆ bàr pe nhai lơm là àu bò gơtìp gơtìp jù tơn tài bơh tơrlung dà khuàng kung gam hang ngan dà boh bơh dà lềng dê sơl. Bi Quảng neh lơh broă tàm Anih Jơnau đơs Việt Nam di 20 nam. Bi neh geh tŭ geh mat “drơng măy pờ tơlik jơnau đơs” tàm bồ bơnơm Bà Nà, Sơn Trà...den tàng bè hơ̆ bi sùm gĭt geh bơta kwơmàng bơh măy pờ tơlik jơnau đơs dê. Quảng yal bè ală kir sơnrai tŭ drơng măy pờ tơlik jơnau đơs tàm bồ bơnơm Bà Nà, Sơn Trà tàm ƀòn dờng Đà Nẵng mờ gơlơh bè yal bè ală cồng nha lơh geh. “Nam 2021, dơ̆ drơng măy pờ tơlik jơnau đơs tàm anih pờ tơlik jơnau đơs tàm bồt Sơn Trà di tàm ală ngai dơ̆ mìu càl rbŭt dờng sồ 9 pràn ngan tàm ƀòn dờng Đà Nẵng. Jơh gùt mang sùm càl khồm puh pràn ngan bè pồt bơtồ gơ par jơh anih pờ tơlik jơnau đơs. Bơtuah ngan jơ̆t nam do, sơrlèt gan gĭt nđờ dơ̆ mìu càl rbŭt dờng, dềt, măy pờ tơlik jơnau đơs tàm Anih Pờ tơlik jơnau đơs tàm An Hải, Sơn Trà kung gam pờ niam sùm sơl...

Tŭ do rê ndo, Anih pờ tơlik jơnau đơs tiah đah jum tàm gùl lơgar, ală mờng chài kwơ hơ̆ neh geh bi Quảng yal mờ oh mi, bi đơs: Bol añ gĭt măy pờ tơlik jơnau đơs tàm Anih pờ tơlik jơnau đơs tiah đah jum tàm gùl lơgar pờ jơh tus làm gùt dà lềng đah mat tơngai lik, yal tơngĭt jơnau ai làng bol lơh ka, ai kwang bàng, cau ling tàm bồt Trường Sa in den tàng bè hơ̆ sơlơ tàm kơnhai mìu càl rbŭt den măy pờ tơlik jơnau đơs bơh Anih pờ tơlik jơnau đơs dê sơlơ pal kơno loh làng rlau nàng làng bol mờ kwang bàng, cau ling tàm bồt, tàm dà lềng in geh iăt jơnau yal tơngĭt lài bè trồ tiah nàng pleh dòp ờdo ờdă. Pah tŭ oh mi tàm bồt, làng bol lơh ka yal jơnau đơs geh kơno sùm, kơno loh den bol añ brơn brài chờ hờp ngan tài bơh broă lơh ngềt ngơ̆t bơh he dê neh pơgồp bơnah dềt rơhền tàm broă lơh bơtàu tơnguh lơh sa- mpồl bơtiàn bơh dà lơgar dê mờ sền gàr dà lềng, kơlwàng trồ bơh Dà lơgar dê.

Kwang ătbồ dờng Anih Jơnau đơs Việt Nam (VOV) ồng Đỗ Tiến Sỹ lòt còp Anih Pờ tơlik jơnau đơs VN2

Ngai kung bè mang sơl, tềng ală bồ bơnơm jơnhoa ngan hơ̆ bềng lơm mhual dà sơtŭ bò jơm glòm bè Mẫu Sơn, tàm càr Lạng Sơn, Phia Oắc tàm càr Cao Bằng, Cổng Trời tàm càr Hà Giang; Pha Đin tàm càr Lai Châu; Bơnơm Quế tàm càr Quảng Nam; Bà Đen tàm càr Tây Ninh, tềng kơh bơnơm Dăk Lăk, bơtul bràs Ninh Thuận halà tàm gùl tiah ring dà dờng Cửu Long...ală cau drơng măy pờ tơlik jơnau đơs ờ gŏ rơngòt ală ngai mrềt noăt gơ sa gơ mŭt tàm puăc tàm kơltau, mang mìu jĭt mìu jir sùm, tŭ tơngai den duh tơr ồ bè ồs sa, tŭ mìu càl rbŭt den gơlơh bè gơpồt gơ par jơh bal cau kung gam ơm sùm tàm anih pờ tơlik jơnau đơs, drơng gàr măy sùm nàng jơnau đơs geh pờ tơlik niam sùm, pờ tơlik tus ngài ai uă cau in iăt bơh tiah kơh bơnơm tus bồt bơlào, bơh ƀòn dờng, ƀòn drà tus ƀòn lơgar mờ geh pờ tus làm gùt uă ù tiah tàm dunia.

Cau cih Đồng Mạnh Hùng- Cau mblàng Lơ Mu K’Yến