Trồ pa rơp rìng àng, ùr bơklau ồng K’Tồch ơm tàm khu phố Kon Tách Đăng, thị trấn Đinh Văn, kơnhoàl Lâm Hà, càr Lâm Đồng neh guh nàng rơcang phan jun kòn klau tơnhua là K’Thái rê hờ hìu pơ ùr mờr bau. Jơh ală phan neh rơcang wil tơl, mơya kung ờ hềt suk sơl, ồng mò kung gam pal sền wơl dùl dơ̆ tai. Ồng K’Tồch pà git: “Bơhiàn jun bơrtơu pal geh lơh tơnơ̆ tŭ neh lap bau. Khi geh yal lài hìu ùr in git. Dilah 2 hìu bơnhă ơm ngài den yal lài hìu ùr in 1 poh. Dilah ơm rềp den khi yal lài hìu ùr in 1, 2 ngai”.

Tàm gùng tam bau cau K’Ho dê, tŭ dùl nă cau ùr neh kờñ dùl nă cau klau lơi den ùr hơ̆ geh yal mè bèp in, sồr mè bèp jà cau lơh gùng tus lùp cai klau nàng bau. Tŭ hơ̆, hìu klau geh dan phan kơt bau mờ hìu ùr. Tŭ bàr nă cau ùr mờ cau klau neh tùi mờ 2 hìu bơnhă neh ring bal bè jơnau kơt bau den geh ală jơnau sồr bè tam bau ndrờm bơh hìu ùr kơlôi rơcang.

Bơhiàn jun bơr tơu rê hờ hìu ùr geh lơh tơnơ̆ lap bau dùl poh. Krơi mờ bơhiàn lap bau geh lơh tàm trồ mang, broă jun bơr tơu rê hìu ùr geh lơh tàm àng drim gờñ. Ồng K’Tồch pà git: Cau K’Ho ờ sơnơng pal rơ wah ngai niam, nhai niam bè cau yoan, mờ mìng lơh nền dùl tŭ tơngai lơi hơ̆ nàng ờ lơh gơ rềng tus broă lơh sa hìu bơnhă dê. Gùng tam bau cau K’ho dê gơ wèt tàm cau lơh gùng den tàng broă jun bơr tơu rê hìu ùr kung bơh cau gùng dê lơh sơl: “Ngai jun bơr tơu den đah hìu klau mìng geh 2, 3 nă cau lòt bal mờ cau lơh gùng. Cau lơh gùng là cau lơh tờm broă jun bơr tơu rê hờ hìu ùr. Lòt bal geh mè bèp, oh mi bơh bơr tơu dê”.

Tàm ngai jun bơr tơu rê hờ hìu ùr den đah hìu ùr geh rơcang sur, iar, tơrnờm nàng wă hìu klau. Ngai hơ̆, hìu ùr geh lơh poac 2 nơm sur. Jat ờs mờng den dùl nơm sur geh lơh poac nàng iờ sa hìu klau in, ai 1 nơm sur den geh tam pà 2 bơnah, dùl bơnah iờ sa hìu klau, dùl bơnah pà hìu klau cèng rê, tam pà bal ai ală cau lòt jun bơr tơu ngai hơ̆ in. Bơta pal geh gơ wèt mờ hìu ùr là drap tơrnờm. Ai đah hìu klau den geh 2, 3 bơta phan nàng tơn dap kòn klau in tŭ rê hìu ùr: “Ngai jun bơr tơu den đah hìu ùr geh cèng sơ̆, yoas, bềl, ồi tơ̆, àu mpha mờ sơlàu. Do là ală phan mờ hìu klau tơn dap kòn in rê hìu ùr”.

Lài mờ tŭ hìu klau mut tàm hìu den đah hìu ùr geh lơh bơhiàn pàc dà nàng wă hìu klau. Hìu ùr dă nha prìt tềng đap mpồng mut tàm hìu, hơ̆ sồng pàc dà tàm tơl nă cau đah hìu klau lòt jun bơr tơu nàng kờñ hòi dan ùr klau pa bau in sùm geh ring lơngai, kis tàm sòr mờ chờ hờp. Tŭ neh mut tàm hìu ùr, hìu klau geh đah hìu ùr pà ñòng tàm tơrbŏ bal 2 jơi nòi. Ồng K’Tồch yal: “Hìu ùr geh wă hìu klau mờ bơhiàn pàc dà. Hìu ùr ntàu tềng đap mpồng hìu, pàc dà nă dùl nă cau đah hìu klau. Khi pàc dà lềng bìng liang halà nau jơng đah hìu klau dê. Hìu ùr geh tơn wan ñòng hìu klau in, sùm là ñòng yau. Mơya ờ di tŭ lơi kung geh ñòng nàng pà hìu klau in, dilah ờ geh ñòng den geh kờp gơs priă nàng pà hìu klau in, mơya ờ dờng màng là kờp priă kàr lơi, mìng pà nàng ai lơh pơn yơu”.

Tŭ neh mut tàm hìu, hơ̆ là bơr tơu neh gơ gơs kòn tờm đah hìu ùr dê. Tŭ do, cau lơh gùng geh at tê bơr tơu tơn kup mờ tê pơ ùr, pơyua kòn klau he dê ai hìu ùr in. Kơp kờñ hìu ùr sền bơr tơu bè kòn tờm tàm hìu. Mờ tơngkah bơr tơu pal lơh nùs kờñ gơboh pơ ùr, ròng siam pô me, pô bàp bè mè bèp tờm he dê. Tơnơ̆ 2 hìu bơnhă geh lơh nền ngai lơh ñô bau: “Jat tàm bơta geh ngan priă jền hìu ùr dê mờ khi lơh ñô bau tơn tơnơ̆ tŭ lơh sir broă jun bơr tơu. Ai dilah hìu bơnhă kal ke den hìu ùr tàm ngai jun bơr tơu geh lơh sur iờ hìu klau sa mờ tam pà nàng hìu klau in cèng rê”.

Tơnơ̆ tŭ lơh sir ală broă wă hìu klau lòt jun bơr tơu, hìu ùr geh tong hìu klau in ală phan kơt bau jat jơnau sồr dilah neh geh. Ai dilah ờ hềt geh phan kơt bau den khi geh pơrgon mờ hìu klau tàm tơngai tơnơ̆. Broă jun bơr tơu tơn jơh mờ broă iờ sa bơh hìu ùr dê. Tơl nă cau bal mờ gơp ñô sa nàng nting bơr gờm chờ ùr bơklau pa bau in.