Mò Nguyễn Thái Tường Vân, Kwang lam bồ Kông ty Lòt nhơl Thái Loan, geh hìu lơh broă tàm càr Đồng Nai pà git, mpồl lơh sa kă bro geh Sờh Niam chài, Tàp pràn să jan mờ Lòt nhơl càr Lâm Đồng jà tus bal mờ mpồl lòt sền ală tiah lòt nhơl, tiah tềl kah yau rài lài do – niam chài, phan sa, broă lơh drơng ala nhơl chờ - pơrài bồ tơngoh… pơnrơ ngan tàm 3 tiah: Mũi Né, dà Làc mờ Gia Nghĩa. Mùl màl, mpồl neh tus sền tiah niamdà lơgar Bàu Trắng, Hìu prăp gàr Dà Màn mờ sền broă lơh Fisherman Show (Mũi Né), Delight Park Dà Làc, XQ Sử quán; tiah lòt nhơl LangBiang Land mờ broă lơh đơs crih tamya “Àng gơcrà ù tiah dờng ơnàng” (Dà Làc); Tiah lòt nhơl Tà Dung, Ƀòn niam Eva Village, Hìu ràng tơlik săp đơs (Gia Nghĩa),… gơwèt mờ mò Tường Vân, ală tiah do cèng geh uă bơta kwơ màng: “Đah Phan Thiết (lài do), añ gŏ geh broă lơh Fisherman Show niam bơnĕ ngan mờ làng bol lơgar Việt Nam geh uă cau ờ hềt git tus. Bol añ tus Dà Làc den kung geh ală tiah pa, pa lơh mờ gơs tàm ală nhai pa do. Añ kơ̆p kờñ ngan là ală broă lơh do rơ̆p cèng tus cau năc in ală jơnau lơh niam bơnĕ ngan. Să tờm añ neh lơh tàm gah lòt nhơl 29 nam, kung mùl màl chờ hờp ngan mờ ală jơnau pa geh lơh do”.

Gam ồng Hoàng Công Định, Kwang lam bồ Kông ty Dima-tour đơs nền, càr Lâm Đồng pa là dùl ù tiah niam bơnĕ ngan gơwèt broă lòt nhơl, tơrgùm tơl jơh ală bơta bè bơnơm ñhoa, tơnao dà, dà lềng tơlir bal mờ bồt niam. Den tàng, măt phan lòt nhơl rơ̆p geh lơh rề ơnàng rơlao. Tềng đăp mờ bơta pràn do, ală mpồl lơh sa kă bro rơ̆p lơh phan pơgồp bal tiah ala mờ lơh jăt dơ̆ lòt nhơl krơi is. Mùl màl là lơh ală dơ̆ lòt nhơl bè dà lềng tơlir, brê bơnơm dờng pơgồp bal mờ ơm rơlô să đah Mũi Né, Phú Quý mờ tus lòt nhơl tàm Dà Làc, tiah kơh bơnơm mờ tus nhơl sền ală dơ̆ lòt nhơl mpồl bơtiàn tàm Dăk Nông (lài do). Bŭ lah gam uă bơta kwơ pràn, mơya jăt ồng Công Định đơs, broă gùng lòt gam là bơta lơh gơkòl tus mờ broă pơgồp bal tiah đah Mũi Né, Dà Làc mờ Gia Nghĩa. “Bơh tŭ tơrgùm bal, bol añ neh bơyai lơh dơ̆ lòt đah Mũi Né mờ Dà Làc sùm, mơya gam kwi kwơ tàm broă ai Dăk Nông (lài do) tài gùng lòt ngài ir mờ cau năc lòt nhơl kung ờ hềt gơdờp mờ broă lòt bơh Mũi Né tus Dăk Nông tàm 10 jơ lòt gùng. He gơtùi lơh geh gùng rềp rơlao, ha là tơnơ̆ do tŭ Mũi Né bơtàu tơnguh geh ƀlàng rơndeh par den rơ̆p ai cau năc bơh Mũi Né guh tus Dà Làc, mờ bơh Dà Làc mù tus Dăk Nông mhar rơlao”.

Mờ bơta pràn ù tiah geh is, phan lời wơl geh uă bơta, càr Lâm Đồng gam ai tơngŏ bơngă là anih tus geh uă bơta pràn mờ krơi is. Mơya, nàng pơgồp bal ală phan, broă lơh drơng ala, anih tus lòt nhơl tàm ală tiah gơs mpồl phan lòt nhơl niam bơnĕ, krơi is, geh nùs nhơm tàm pơrlòng uă là broă geh ai tus mờ cau atbồ bal mờ ală cau lơh broă lòt nhơl. PGS.TS. Phạm Thị Huyền, lơh broă tàm Hìu bơsram Đại họk Kinh tế Quốc dân Hà Nội đơs bè do: “Càr Lâm Đồng tŭ do ờ mìng geh 1 ha là 2 kàl, mờ geh tus 4 kàl”. Lơh bè lơi nàng jòi geh dùl bơta pràn, bơta ndrờm bal, nàng tŭ cau năc tus mờ Lâm Đồng geh broă lòt nhơl sền tơl lơm. “Broă mờ càr Lâm Đồng (lài do) rơ̆p pal lơh hơ̆ là tơrgùm gơtùi lơh ală bơta mờ he geh tàm dùl jơnau yal nàng yal tus cau năc lòt nhơl in. Să tờm añ đơs là phan bơna tŭ do tàm càr Lâm Đồng ờ hềt gơtùi tơrbŏ bal nền nòn bal, lơh bơta pràn tàm tơrbŏ bal lòt nhơl đah 3 càr lài do gam ờ pràn ngan. Pal lơh bè lơi nàng geh dùl Lâm Đồng mìng dùl lơm, ala mờ 3 Lâm Đồng bè tŭ do”.

Nàng bơsong broă gùng lòt pơgồp bal ală tiah lòt nhơl tàm càr, Lâm Đồng gam dan mờ Dà lơgar ai tàm broă rơndăp lơh gùng rơneh lòt mhar Đah măt tơngai lik – Đah măt tơngai mŭt tơrbŏ bal Phan Thiết - Bảo Lộc – Gia Nghĩa. Ồng Phạm Văn Mạnh, Phó Kwang lam bồ Sờh Bơ̆t bơtàu càr Lâm Đồng pà git: “Tŭ do, Ƀộ Bơ̆t bơtàu kờñ ngan broă lơh do. Mìng is bè lơh niam wơl gùng tơrbŏ bơh Gia Nghĩa lòt tus Di Linh mờ gùng 28B, den tŭ do gùng 28B gam geh bơcri priă lơh niam wơl; gơl gùng bơh Di Linh tus Gia Nghĩa gam dan mờ Dà lơgar nàng ai tàm khà priă di mơ tơngai nàng lơh niam wơl. Tềng đăp măt, bol añ dan càr ai priă lơh niam wơl nàng ƀuơn tàm broă lòt rê, ƀuơn cau năc lòt lòt”.

Bal mờ broă bơcri priă lơh phan bơna gùng lòt, gah lòt nhơl càr Lâm Đồng kung gam lơh gùng dà broă lơh jŏ jòng ai broă lòt nhơl in geh tơl ală bơta, kơl jăp mờ pràn. Ồng Nguyễn Văn Lộc, Kwang lam bồ Sờh Niam chài, Tàp pràn să jan mờ Lòt nhơl càr Lâm Đồng pà git, gah lòt nhơl neh geh broă rơndăp lơh bơta geh mờ ală bơta pràn pơn drờm bal bơh càr Lâm Đồng dê tàm pang rùp lòt nhơl gùt lơgar dê. “Bol añ rơ̆p bơyai lơh uă broă lơh niam, dùl anih tus 3 tiah tàm càr Lâm Đồng dê. Mờ lơh geh ală dơ̆ lòt nhơl, gơl gùng lòt nhơl pa nàng tơrbŏ 3 tiah; dan Anih duh broă Làng bol càr, Mpồl lơh kơnòl broă sùm Tỉñ ủy ai geh Jơnau lơh nền tàm pơrjum bè broă bơtàu tơnguh lòt nhơl tơngai bơh nam 2025 tus 2030 mờ wèt tus 2045”.

Ală broă lơh di pal tàm broă rơndăp phan bơna, pơgồp tiah mờ gùng dà bơtàu tơnguh phan lòt nhơl krơi is, pà gŏ broă lơh ngan brồ să pràn kơl dang bơh gah lòt nhơl càr Lâm Đồng dê. Bơh tŭ hơ̆ ai tơngŏ bơngă bơh dùl tiah tus geh uă bơta pràn mờ mùl màl krơi is tàm tơl gùng lòt nhơl bơh cau năc dê.