Cing bơh cau Jrai dê geh tàm tơrbŏ gơs bòr, tơl bòr geh 3 pang cing rlau hơđang, geh rùp hin mờ bơta dờng, dềt krơi is; cing dềt ngan rlau jơh dờng bơh 10 tus 15 phơng, tàm hơ̆ cing me là cing kuơmàng ngan rlau jơh. Ồng Kpă Y Chua, ơm tàm ƀòn Treng, xã Ea Hleo, kơnhoàl Ea Hleo, càr Dăk Lăk pà git: Cau Jrai tàm Ea Hleo geh uă bòr cing krơi is bè cing Mnom, cing Arap, cing Trum, cing Wang. Tơl bòr cing do geh bơta kuơ is tàm rài, geh ngui nàng dròng tàm ală broă lơh yàng, lơh chờ krơi is. Bòr cing Mnom tŭ dròng mìng nggui dùl bă, ai bòr cing Arap geh dròng bal mờ mpồl tamya, den tàng bòr cing Arap gam geh hòi là cing Suang. Ồng Kpă Y Chua pà git: “Cing mồng kuơmàng ngan tàm rài kis bơh cau kòn cau dê, kuơmàng là gơ wèt mờ cau Jrai bol hi dê là kờñ ngan. Tài gơ rềng tus rài kis kòn bơnus dê. Geh uă bơta cing bè cing Mnom, cing Arap, cing Arap lơh pa wơl. Mờng geh ngui bè do, cing Mnom ngui tàm dơ̆ lơh yàng. Lài mờ tŭ lơh yàng den lơh tl mờ broă dròng dùl dơ̆ nàng yal làng bol in git rơcang lài lơh yàng”.

Cing là dùl phan nhơl gùng đơs crih rềp mềr mờ rài kis niam chài, pin dờn bơh cau Jrai dê. Tŭ lam lơh ală bơhiàn lơh yàng mờ lơh chờ pal geh sap ntas cing dê. Sap ntas cing mồng là hiòng dà ròng dờng đah huềng, là bơta pràn, là bơta king crŭ tàm rài kis gah huềng cau Jrai dê. Tài bơta kuơ niam ngan cing dê den tàng ală cau Jrai tàm do neh ngai sơlơ lơh ngan prap gàr mờ bơto wơl dròng cing jañ mồng ai rơnàng tơnơ̆ do in. Ồng Kpă Y Chua pà git tai: “Bơh mạng xã hội, tivi añ kờñ ngan bơto wơl ală cau ơm ngài ờ gơtùi gŏ, ờ gơtùi klo sap ntas cing. Tơnơ̆ do nàng kòn sau in sùm prap gàr wơl niam chài tài cing mồng geh sap ntas kòn bơnus dê, sap cing mpong ntas là jơh tơl nă cau ndrờm đơs chờ, geh tàm nùs cau Jrai dê, klo mờ git tŭ sap cing mpong ntas”.

Đơs bè bơta kuơ cing mồng tàm rài kis niam chài nùs nhơm bơh cau Jrai dê tàm kơnhoàl Ea Hleo, ồng Nguyễn Huy Dũng, kwang atbồ cơldŭ niam chài yal tơnggit jơnau kơnhoàl Ea Hleo pà git, rài kis làng bol kòn cau Jrai tàm do gam kal ke mơya ală nghệ ñân tàm do ki ngàm ngan niam chài kòn cau he dê mờ khi neh bal mờ gơnoar atbồ tàm ƀòn lơgar lơh ngan nàng rơnàng tơnơ̆ do gam git sap ntas cing Jrai dê. Ồng Nguyễn Huy Dũng, pà git: “Gơwèt mờ niam chài cing mồng tàm kơnhoàl Ea Hleo geh cau Rơđê mờ Jrai. Gơ wèt mờ cau Jrai tàm Ea Hleo là kuơmàng ngan, tàm rài kis pah ngai kung ngui cing mồng. Cing cau Jrai dê là cing Arap mờ cing Arap lơh pa wơl. Nàng lơh wơl broă prap gàr cing mồng bol hi neh lam lơh uă broă lơh. Bol hi tìp mat làng bol, jòi git niam chài khi dê mờ să tờm khi là cau sơnơng pal lơh bè lơi nàng prap gàr. Tàm ƀòn geh uă nghệ ñân kờñ niam chài kòn cau he dê den tàng tŭ lam lơh ƀuơn ngan. Tơngai tus bol hi geh pờ 2 ơdŭ bơto dròng cing jañ mồng tàm ƀòn do mờ ală tiah ndai tàm gùt jơnhoàl. Kơp kờñ hời rơhời geh cồng nha prap gàr niam rlau mờ tŭ do tai”.

Cing là phan lời wơl kuơmàng ngan mờ cau Jrai tàm tiah do dờp wơl bơh rài bèp ồng dê. Sap ntas cing chờ hờp, dŏ tơl nă cau ơm rềp wơl mờ gơp, tơrbŏ bal kòn bơnus mờ trồ tiah, brê bơnơm, tê at tê tơrbŏ kơ̆ dar tamya xoang niam bơnĕ.