Mò Ben pà gĭt, bơh tàm tŭ gam dềt sền gŏ mè bơh he dê sùm ruồi brài mờ tàñ mai ală phan soh kòn cau den mò kung kờñ jòi gĭt ală broă mờ mè he dê lơh nàng lơh jat. Phan soh kòn yau bơh rài ồng mò lài do sùm tàñ mờ mai jat broă bơhiàn yau dê. Ai tŭ do tàm drà kă bro uă ngan ală dăng brài, brài len kông nghiệp. Mò Ben pà gĭt: nàng tàñ geh dùl nơm phan soh bơh yau neh tàñ sir nghệ ñân pal lơh uă ngan broă lơh, bơh broă tàñ, jing kung kal ke ngan. Mò Ben đơs: Lài do, tơnơ̆ tŭ pĭc đềs rê den lơh gơs dăng brài khi sùm trŭ gơm ală dăng brài nàng gơ in sơlơ kơ̆ wền. Añ tŭ do den ờ geh ală bơta nàng lơh bè hơ̆ tai mờ sùm blơi brài len kông nghiệp, sac rơwah dà len mờ tàñ jat phan mờ he kờñ den hơ̆ sồng dăng tàm bơrnơ̆ nàng tàñ lơm, tơnơ̆ tŭ tàñ gơs pang ồi den pal koh mờ tàñ gơ gơs ào yau ai cau klau halà cau ùr in.

Nàng tàñ gơs dùl pang ồi neh lơh sir pal roh jơh dùl poh. Dùl pang ồi bè hơ̆ gơtùi tàñ geh 2 nơm ào. Mò Ben đơs: mờ jơnau kờñ bè phan soh kòn cau dê, pal geh ală broă tàñ jat phan bơka di mờ bơhiàn yau bơh kòn cau Sơdàng dê. Mò Ben pà gĭt: Broă tàñ gơ gơs ồi yau bơh añ dê sùm tàñ biài ơnàng mờ pang ồi tơ̆ den dùl pang gơtùi tam pà gơs bàr gơl, tàñ gơs 2 nơm ào kòn cau ai cau klau in. Dilah tàñ is den sùm tàñ mìng bơnah să đah ngkời, tàñ bơnah đah đap, tơnơ̆ tàñ  2 pang ồi den tàñ tàm tơrbŏ bal gơs dùl pang mờ tàñ gơs 4 nơm ào. Dilah phan soh yau ai cau ùr in den pal ồi tàñ is, ào tàñ is gơ gơs 2 pang ồi, dùl pang rlau 3 thơk, tŭ tàñ mai geh 2 nơm ào, mờ ồi.

Mò Ben pà gĭt tai, bơdìh mờ broă tàñ biài tàñ mai phan kòn cau bơh yau dê mò gam tàñ ală pang ồi mă kòn dềt, lơh kơldung ià, kơldung ơn phan. Nàng geh phan bơna niam mờ kơ̆ pal lơh ală phan bơka nền nòn ngan, kal ke ngan tàm pang ồi yau hơ̆ dê. Mò Ben yal: Broă lơh tàñ dùl nơm ào kal ke ngan rlau jơh là lơh phan bơka, nàng lơh geh phan bơka dờng mờ niam măt sền là kal ke ngan mờ roh uă tŭ tơngai ngan. Lơh phan bơka dềt den bal hiă mờ ờ hoan roh tŭ tơngai rlau. Geh phan bơka den pang ồi hơ̆ sồng niam mờ geh kwơ rlau.

Tàñ ồi yau neh gơ gơs broă lơh sùm, cèng wơl priă lơh geh uă đau sơl ai mò Ben in. Ờ mìng bè hơ̆ lơm, mò sùm bơto bơtê wơl broă tàñ ồi yau do ai oh kòn kòn sau tàm hìu bơnhă mờ tàm ƀòn lơgar in. Tàm hơ̆, bi H’Diệp, là kòn tờm bơh mò Ben dê neh geh mè lơh gơ kờñ mờ tàñ ồi jak ngan, den neh gĭt tàñ ală ồi, ào yau bè ờs. Bi H’Diệp đơs: Añ kờñ ngan mờ kờñ lùp bơsram broă tàñ ồi yau bơh kòn cau he dê bơh mè añ dê neh prap gàr broă bơh yau. Tŭ pa rơ̆p 19 sơnam añ neh gĭt tàñ rao, tŭ hơ̆ sùm sền mè tàñ den añ lùp bơsram bơh mè. Tŭ hơ̆ 19 sơnam añ neh gĭt tàñ biài lơh ồi mă kòn dềt, geh tŭ tàñ gơs ồi nàng tàñ mai ào, tŭ hơ̆ añ mìng gĭt tàñ, mai ală phan bè ờs lơm. Tŭ 20 sơnam añ neh gĭt săp sèng brài mờ tàñ is ồi mờ tàñ mai ào yau niam rlau. Añ mìng gĭt tàñ phan soh kòn cau drơng jơnau kờñ tàm hìu bơnhă lơm, tàñ nàng tăc den añ ờ hềt khin lơh tài bơh añ ờ hềt geh bơta mờng chài uă.

Phan soh kòn cau là phan soh bơh yau bơh kòn cau Sơdàng dê. Mò sùm soh phan yau tàm ală ngai lơh chờ, halà lòt tàm hìu jum. Ồng Vi Von, kwang atbồ ƀòn Kon H’Ring pà gĭt: gơlơh bè ală hìu bơnhă kòn cau Sơdàng cau lơi kung blơi ai he in dùl nơm phan soh yau niam ngan. Ồng Vi Von đơs: Ào, ồi bơh yau bơh kòn cau Sơdàng dê geh làng bol prap gàr bơh rài ồng mò lài do tus rơnàng tŭ do dê, geh làng bol prap lời wơl niam ngan tàm sơ̆, tàm tùh, pah tŭ geh dơ̆ lơh chờ den khi hơ̆ sồng ai nàng soh lơm. Tàm dơ̆ lơh chờ lơh yàng ñô lir bông làng bol sùm tơrgùm tàm hìu mpồl bơtiàn mờ soh phan soh bơh yau kòn cau he dê.

Tŭ do, tàm drà kă bro bulah geh uă ngan phan soh mờ uă ngan broă tàñ mai pa, dà sơng lila cau lơi kung gơtùi blơi di pal mờ bơta kờñ he dê. Bơdìh hơ̆, tŭ ƀòn lơgar geh dơ̆ lơh chờ, geh broă lơh kwơ màng den làng bol soh phan soh bơh yau kòn cau he dê nàng tơngŏ bơta niam bơnĕ bơh yau bơh jơi bơtiàn he dê.