Tàm ală bơhiàn lơh sa suơn sre cau M’nông dê, bơhiàn lơh yàng ñô lir bông gam hòi là sa tềp piang kòi pa geh gơtha kuơmàng ngan rlau jơh. Bơhiàn lơh yàng do ờ mìng cèng bơta kuơ niam chài đah huềng krơi is ngan kờñ jờng rơ tờm kòi mờ gam ai gŏ nùs nhơm tam klac bal, kơp kờñ bơta ring lơngai ai jơh hìu bơnhă, ƀòn lơgar in tàm nam pa. Ồng Y Tiêng (kòn cau M’nông) ơm tàm xã Nâm Nung, kơnhoàl Krông Nô, càr Dăk Nông pà git, lơh yàng Ñô lir bông là ngai sa tềp: “Lơh yàng hòi yàng kòi, rò huềng kòi rài yau là kuơmàng ngan, là ngai chờ ƀòn lơgar dê, bè ngai sa tềp tŭ do. Tơnơ̆ tŭ neh rò huềng kòi rê tàm hìu, kac kòi sơn rờp tàm mìr cèng rê ƀŏ gơs phe, trŭ piang mờ phe kòi pa sơn rờp nàng jà jơh làng bol tus sa chờ hờp. Lài ngan là lơh yàng ñô lir bông hơ̆ sồng tus lơh yàng hòi dan pràn kơldang ai kòn sau tàm hìu in mờ ală sơlàu ơn phan geh mbar, poac sur, tơrnờm… pơ dơng ai yàng in”.

Bi Rơ Châm Nguưr, ơm tàm Jut 1, xã Ia Dêr, kơnhoàl Ia Grai, càr Gia Lai pà gĭt, lài do, kòn cau Jrai ờ gŏ sa tềp dà lơgar bè cau Yoan ờ. Nam pa bơh kòn cau Jrai dê geh sơnđờm mut tàm nam pa, sùm là nhai 3 pah nam, tŭ làng bol neh tơnhào jơh phan tam. Kòn cau Jrai mŭt tàm nam sa nam, hùc nhai bal mờ uă dơ̆ lơh yàng duh khoai niam ngan, bè dơ̆ lơh yàng ñô lir bông, dơ̆ lơh Yàng sa pơ thi... Jat tơngai, tŭ mpồl bơtiàn kòn cau Jrai mờ cau Yoan ơm kis bal, geh bơta tàm bơr lŭ bơta niam chài, kòn cau Jrai kun bơyai lơh sa tềp dà lơgar sơl. Tàm dơ̆ do, ală hìu bơnhă rcang ală phan bơh yau nàng wă năc, cau tàm jơi bơtiàn bơh tiah ngài rê còp. Jơh ală bơta geh rcang lài niam ngan, nùs nhơm wă rò nam pa sùm chờ hờp, chờ hờñ, nàng wă rò rài tơnơ̆ niam bơnĕ, lơngai lơngai rlau.

Bi Rơ Châm Nguưr đơs: Hìu bơnhă añ mờ làng bol tàm ƀòn, ƀòn lơgar bơh añ dê tàm Ia Dêr do sùm chàng nha bùm blàng, gơm biăp pài halà biăp ndai tàm suơn. Hìu bơnhă pas đau den lơh iar, sur, lơh dờng rlau tai den là lơh kơn rồ jat bơta bơh hìu bơnhă dê. Sùm den ngai dơ̆ 1 sa tềp kòn cau Jrai kung lơh dơ̆ lơh yàng duh khoai ồng mò, ồng pàng in, ngai hơ̆ kung là ngai oh kòn kòn sau ưn ngài ồng mò, mè bèp. Nam pa gờm chờ bal mờ gơ̆p, lùp còp bal nàng geh bơta chờ hờp, tam klăc dong kờl bal tàm broă lơh kung bè tàm rài kis hìu bơnhă, ƀòn lơgar ngai sơlơ bơtàu tơnguh kơ̆ kơljap. Cau dờng den lơh krơh nàng oh kòn kòn sau in jat bơsram, nàng oh kòn in pơnđơl pràn lơh ngan, tryang tryồng tàm broă bơsram sră nàng geh rài tơnơ̆ do niam bơnĕ rlau dong geh kwơ ai să tờm, hìu bơnhă mờ mpồl bơtiàn in ngai sơlơ bơtàu tơnguh rlau.