Tàm dà đơs kòn cau Prum mờ bàr pe dà đơs ală jơi bơtiàn tàm Tây Nguyên “Chum” geh gơtha “cum” kung bè kòn cau K’Ho dê sơl, tềl tơngŏ lơbơn niam bơh bơta tam pà bal mờ tam klăc bal mpồl bơtiàn. Mờ bơta jòng mờr 60 phuk “Chum Show” yal jơnau bè gùng lòt kòn bơnus lòt jòi wơl mò pàng kờñ gơboh, sơm bời mờ tàm tơrbŏ bal. Jơnau yal lơh cau sền uă dơ̆ nrơ̆t tài bơh ală gùng đơs crih mờ rùp hin kwèng ƀà krơi ƀà. Kwèng tàm săp ntas cing mồng, gùng sơnggơs, gùng tam ya bơh yau bơh mpồl bơtiàn kòn cau Prum, Rơđê, Raglai dê. Krơi tàm tiah là jơh ală bơta geh bơnĕ bơnài bal mờ bơta àng măi mok cah biài, cah tềng hơ đang jơnhoa dê.

Bơh ală dơ̆ ràng tơlik đơs crih tam ya xiếk cah tềng hơđang jơnhoa, pơgồp bal mờ gùng đơs crih, tam yau krơi ngan, niam ngan, cau sền geh kis tàm ală bơta ngoh rơngăc ndrờm bal đah rài lài do mờ tơngai tŭ do, đah să tờm mờ tơl nă cau, đah ù tiah mờ trồ tiah. Ồng Nguyễn Hồng Quang, ơm tàm sơnah ƀòn Nha Trang, càr Khánh Hòa đơs bơta ngoh rơngăc he dê:“Gùng đơs crih pa ngan, bơta àng pơgồp bal niam ngan mờ cau ràng tơlik geh ală bơta tam ya lơh geh  tiah ndơ̆p tŭ gŏ tŭ ờ. Tam ya pa pơgồp bal mờ xiếk, gùng đơs crih bơh yau ờs mờng bơh kòn cau Prum, ală jơi bơtiàn Tây Nguyên bơnĕ bơnài bal tàm tiah do dê”.

Mò Ngô Thanh Phương, Cau đơng lam dờng Chum Show pà gĭt, ală cau lơh broă lơh do kờñ lơh geh tiah đơs crih tam ya ờ tơrgùm tàm dùl tơngume, tiah cau đơs crih tam ya mờ cau chài bơceh lơh bal. Tơl dơ̆ bơyai lơh ndrờm gơ jat bal mờ rài kis nùs nhơm bơh làng bol tàm tiah Tây Nguyên mờ tiah đah Jum tàm gùl lơgar dê, mơya geh yal wơl mờ tiah ràng tơlik pa. Ngui ală bơta jrô niam chài bơh ală jơi bơtiàn dê rơ̆p dong ală mpồl bơtiàn gĭt wă loh làng, tam pà bal uă rlau tai: “Jơnau yal tơngĭt mờ bol añ kơ̆p kờñ cau sền mut tàm tiah Chum Show geh tàm tơrbŏ bal, sơm bời bal; jòi rê mờ mò pàng, nùs nhơm bơh he dê. Să tờm Chum tàm dà đơs bàr pe jơi bơtiàn geh gơtha là cum, hơ̆ là bơta tàm tơrbŏ bal, kờñ gơboh bal mờ sơm bời bal, tŭ mờ tàm đah bơdìh ne trồ tiah lơh aniai gơ rơndăp rơndồl, càl rơbŭt dờng, tam lơh”.

Tơnơ̆ bơta tơmŭt bal ală tiah Tây Nguyên- tiah dah Jum tàm gùl lơgar, tơngai pa do gah lòt nhơl tàm tiah do sùm gơguh lơh sa lơm. Gơwèt mờ Khánh Hoà, jơnau kờñ nam 2025 rơ̆p wă rò pơgăp 15 tơlak dơ̆ năc, priă lơh geh rlau 60 rơbô tơmàn đong. Lòt nhơl pơn jat tai geh càr Khánh Hoà là tiah tờm lam lài bơh lơh sa ƀòn lơgar dê; mờ pơgồp bal lòt nhơl mờ niam chài là gùng lòt ờ gơtùi pleh klàs.

Ală broă lơh bè “Chum Show” ờ mìng lơh li la uă tai sền gĭt bơh năc lòt nhơl dê, mờ gam tơnguh uă bơta kwơ bơhiàn niam chài dê, lơh geh bơta ƀuơn bơta pràn tàm pơrlòng ai tiah tus lòt nhơl. Mò Trần Thị Kim Yến, Kwang lam bồ Hìu đơs crih Đó đơs nền, Khánh Hoà ờ mìng geh “bơta niam ù tiah brê bơnơm” lơm mờ gam cèng bềng bơhiàn niam chài mờ bơceh lơh, nàng tơl dơ̆ lòt nhơl bơh năc lòt nhơl dê gơ gơs dùl gùng lòt sền gĭt wil tơl:“Kơlôi sơnơng sơn rờp là broă lơh pơgồp bal niam bơta niam bơnĕ bơh uă jơi bơtiàn tàm ù tiah do dê. Năc lơgar ndai gơ kờñ ngan, kờñ mờ dơ̆ bơyai lơh do dê. Mơya tơnơ̆ hơ̆ den cau Việt Nam bol he kờñ ngan sơl mờ tus uă ngan rlau jơh. Khi gŏ krơi mơya kwèng mờ gơlơh gơ kờñ ngan".