Do là dơ̆ 2, ơdŭ bơto dròng cing ai cau bơsram dờng in geh lơh tàm Hìu bơsram Đại họk Tây Nguyên. Ơdŭ geh pờ bơh ngai 05/10 pa do mờ 30 nă cau bơsram (geh 5 nă cau klau mờ 25 nă cau ùr) là cau bơsram dờng bơh Hìu bơsram Đại họk Tây Nguyên dê lòt bơsram. Tàm tơngai rlau 1 nhai, tàm ală mang ngai dơ̆ poh mờ ngai rlô, ală cau bơsram geh 2 nă cau chài dròng cing bơto dròng ală jơnau bè gĭt săp ntas, dròng săp ntas tàm cing gle mờ cing lơngô; đơs pơnđik mờ dròng bàr pe jơnau cing bơh ală cau Rơđê, Bahnar dê. Bal mờ hơ̆, mpồl bơyai lơh gam pơgồp bal ală jơnau bè bơsram nàng gĭt bè bơta niam chài mờ sền nàng gĭt bơta chài ngui cing mồng pơgồp bal đơs pơnđik, tam ya. Bơyai lơh ai cau bơsram in tus bal tàm ală dơ̆ broă pơrlòng, dơ̆ đơs crih tam ya, tàm tơrbŏ bal drơng ƀòn lơgar in tàm hìu bơsram, Anih tờm niam chài càr mờ hìu bơsram Đại họk Văn Lang, ƀòn dờng Hồ Chí Minh.