VOV4.K’ho- Ngai 25/8, tàm xã Dăk Phơi, kơnhoàl Lăk, Sở Văn hóa- Thể thao mờ Zu lịc càr Dăk Lăk pơgồp bal mờ Cơldŭ Niam chài- Yal tơnggit jơnau kơnhoàl Lăk mờ Ủy ƀan Ñân zân xã Dăk Phơi lam lơh wơl dơ̆ bơyai lơh yàng dờp lơh oh mi bơh cau Mnông Gar dê. Do là dùl tàm ală broă lơh tàm rơndap broă lơh “Prap gàr mờ ngui niam bơta kuơ niam chài cing mồng tàm ù tiah càr Dăk Lăk” Bơh anih tờm lơh broă bal dunia càr Jeollabuk-do, lơgar Hàn Quôk dong kờl.

Cau bơ yơu lơh yàng ai 2 hìu bơnhă dờp lơh oh mi in

Broă lơh yàng geh lơh tàm hìu ồng Y Thiêng Cil tàm ƀòn Jiê Yuk, xã Dăk Phơi, kơnhoàl Lăk, càr Dăk Lăk, dờp lơh oh mi mờ ồng Y Nam Pan Ting ơm tàm thôn bal. Jat hơ̆, ồng Y Thiêng Cil mờ ồng Y Nam Pan Ting là bơyô rềp mềr tàm uă nam do. Broă lơh yàng geh lơh bơh 5 bơnah, mờ 2 bơhiàn tờm là lơh yàng hòi dan pràn kơldang să jan, yal mờ brah yàng bè bơta tàm tơrbŏ bal đah 2 hìu bơnhă mờ bơhiàn sàu piang pơgồp bal nùs nhơm đah 2 hìu bơnhă geh dờp lơh oh mi dê.

Dơ̆ sàu piang pơgồp bal nùs nhơm bơh 2 hìu bơnhă dờp lơh oh mi dê mờ bơta sền gŏ bơh tơl nă cau dê

Tàm jơh gùt tơngai lơh yàng, sap cing Bor mpong ntas chờ hờp, ală klau pơnu ùr ơruh tamya jơnau nting bơr gờm chờ mờ sền gŏ bơta dờp lơh oh mi đah 2 hìu bơnhă. Tơnơ̆ bơhiàn lơh yàng do, bơh bơta ờ bal jơi nòi, ờ geh bơta gơ rềng jơi nòi, 2 hìu bơnhă gơ gơs oh mi tờm dùl hìu, geh bơta gơ rềng rềp mềr, tàm dong kờl bal mờ gơp tŭ kal ke, rềs àr ờ kờp dà kơl hề, ờ kờp dồs.

Cau mblàng K’Duẩn