VOV4.K’ho- Tàm broă lơh Ngai chờ Añ kờñ dà lơgar añ, Tỉñ đoàn Dăk Lăk neh bơyai lơh pơrlòng mblàng yal jơnau đơs crih kac màng, ơruh pơnu đơs pơnđik mờ nhơl đờng gòong kòn cau. Bơh hơ̆, uă jơnau bơyai lơh bơh ơruh pơnu ală kơnhoàl dê neh geh rơcang lài nền nòn, jơh nùs, ai tơnggŏ bơta krơi is niam chài ù tiah loh làng ngan.

Sap ntas cing gle mờ jơnau cing Wă nac mpong ntas chờ hờp lơh jơh anih bơyai lơh pơrlòng mblàng yal jơnau đơs crih kac màng, ơruh pơnu đơs pơnđik mờ nhơl đờng gòong kòn cau gơ lơh duh hồl rlau tơn. Ală klau pơnu, ùr ơruh kòn cau Rơđê tàm phan soh ờs mờng kòn cau dê teh cing gle pơgồp bal mờ tamya xoang, lơh wơl bơhiàn jà ñô tơrnờm bơh cau Rơđê dê. Do là jơnau tus bal pơrlòng nhơl đờng gòong kòn cau bơh Đoàn ơruh pơnu kơnhoàl Krông Buk tus bal pơrlòng dơ̆ do. Bi Y Thu Mlô, ơm tàm ƀòn Tlan, xã Cư Pơng, kơnhoàl Krông Buk yal, tơnơ̆ mờr 2 nam pal ơm ing tàp tài gơ rềng bơh kòp bơtờp dê, pơrlòng là tŭ nàng jơh mpồl bơ tòm tơrgùm, tàp wơl ală jơnau cing neh bơsram: “Tus mờ pơrlòng dơ̆ do là tŭ nàng ală bơyô tàm thôn, ƀòn tìp mat lơh kwèng bơh ală kơnhoàl ndai bè niam chài cing mồng, hơ̆ sồng ală jơnau đơs crih kac màng. Uă ngan cèng bơta tìp mat lơh kwèng, bơsram đòm jat là tờm. Sền gŏ tơnơ̆ dùl tŭ tơngai ơm ing tài gơ rềng bơh kòp bơtờp den ală srơh niam chài, đơs crih tamya kung ờ huan geh bơyai lơh. Bơh do den kung là tŭ nàng lơh wơl ală srơh niam chài đơs crih tamya tàm ƀòn”.

Jơnau nhơl đờng gòong kòn cau bơh mpồl Krông Buk dê

Mờ 48 jơnau tus bal pơrlòng tàm 3 bơta là đơs crih kac màng, đơs pơnđik mờ nhơl đờng gòong kòn cau, mờr 300 nă cau ờ mờng chài là ală đoàn viên, ơruh pơnu, kwang bàng đoàn, mpồl tàm 16 mpồl geh ală kơnhoàl, hìu bơsram kao đẳng kông nghệ Tây Nguyên mờ Mpồl cau tề lam jơnau đơs bơh càr dê tus bal. Tơl mpồl ndrờm rơ wah ală jơnau tus bal pơrlòng cèng bơta krơi is bơh ù tiah he dê, bơta krơi is niam chài bơh mpồl bơtiàn làng bol ơm kis tàm ƀòn lơgar dê nàng bơyai lơh tàm dơ̆ pơrlòng. Bal mờ đơs pơnđik mờ đờng gòong krơi is bơh ală jơi bơtiàn kòn cau ơm kis bơh jŏ tàm ƀòn lơgar dê bè: eirei, cing gle bơh kòn cau Rơđê dê, đơs pơnđik cau M’nông, Bahnar den ală gùng đơs pơnđik krơi is bơh quan họ Bắc Ninh, kơmbuat nha, kơ wào halà jơnau đơs Then bơh kòn cau Tày dê kung geh uă mpồl rơ wah nàng đơs mờ nhơl.

Mpồl Buôn Đôn lời wơl jơnau kah kir niam ngan mờ jơnau nhơl đờng gòong cau Lào pơgồp bal mờ tam ya Lăm Vông

Kuơmàng, mpồl kơnhoàl Buôn Đôn bơyai lơh jơnau nhơl đờng gòong lơgar Lào pơgồp bal mờ jơnau tam ya Lăm Vông, mờ ală sap ntas chờ hờp, niam ngan. Bi Y Nô Ly Kbuôr, kòn cau Rơđê ơm tàm xã Krông Na, kơnhoàl Buôn Đôn là cau atbồ mpồl nhơl đờng gòong cau lơgar Lào xã Krông Na yal, mờ bơta kờñ gơboh jòi git niam chài mờ gùng đơs crih lơgar Lào, Mpồl ală bơyô kơnòm să tàm xã Krông Na neh tơrgùm gơs mpồl nhơl đờng gòong cau Lào, tàp is mờ lòt nhơl tàm ală broă lơh bơh xã, kơnhoàl bơyai lơh. Bulah tơl nă cau dùl broă krơi is, bulah ờ ru, ală cau tàm mpồl kung rơndap tŭ jơ nàng tàp sùm: “Lài mờ dơ̆ pơrlòng bè do, mpồl kung neh tàp rlau 1 poh tàm ală ngai bè ngai lồi poh halà trồ mang den ală bơyô geh tŭ jơ nàng tus bal tàp. Mpồl geh crơng gơs nàng gàr sùm bơta niam chài cau Lào dê nàng drơng ai làng bol cau Việt Nam jơi Lào tàm xã Krông Na in, kung bè tus bal ală dơ̆ pơrlòng hơ̆ sồng ală ngai chờ bè Bounpymay, gam hòi là sa tềp lơgar Lào dê”.

Bơta niam chài krơi is bơh ù tiah đah tô dà lơgar tàm dơ̆ pơrlòng

Tơn jơh dơ̆ pơrlòng, mpồl bơyai lơh neh jàu 3 khà A, 6 khà B mờ 9 khà C ai ală jơnau pơrlòng niam ngan in tàm 3 bơta tus bal pơrlòng. Jàu khà dùl gùt mpồl ai mpồl kơnhoàl Cư Mgar in. Jat jơnau đơs bơh mpồl ai điểm dê, uă mpồl tus bal pơrlòng neh geh bơta rơcang lài, bơyai lơh jơnau pơrlòng niam ngan, wil tơl jat tơngume bơh mpồl bơyai lơh dê, rơcang lài đờng gòong, phan soh mờ rùp hin bơyai lơh mờng chài ngan. Kuơmàng tàm 2, 3 mpồl, cau pơrlòng tàm sơnam kơnòm dềt, kơnòm bơsram kung tus bal tàm jơnau pơrlòng sơl, ngan là ală jơnau nhơl đờng gòong kòn cau, lời wơl uă jơnau kah kir niam, pơgồp bơnah tàm cồng nha dơ̆ pơrlòng dê. Ồng Lê Văn Hồng, Phó kwang atbồ Khoa gùng đơs crih – tamya, hìu bơsram Kao đẳng Văn hóa Nghệ thuật càr Dăk Lăk, Kwang atbồ mpồl ai điểm dơ̆ pơrlòng đơs: “Mpồl bơyai lơh mờ Mpồl ai điểm kung ngoh rơngac ngac mờ chờ hờp ngan là ală cau kơnòm să jơi bơtiàn kòn cau dùl êt nă cau, đoàn viên ơruh pơnu neh git sền gàr bơta niam chài, dròng cing jañ mồng niam ngan. Hơ̆ sồng 2, 3 bơta đờng gòong kòn cau, pơn yơu bè kơmbuat nha do, kơ wào, kuơmàng là geh dùl mpồl nhơl đờng gòong cau Lào kung niam ngan, bơyai lơh li la ngan. 2, 3 mpồl den geh bơta rơcang lài nền nòn hơ̆ là bè đơs pơnđik, ngan là đơs pơnđik Tây Nguyên dê. Hơ̆ sồng 2, 3 nă bơyô đơs pơnđik tiah đah tô dà lơgar, ai tơnggŏ ală bơta chài he dê, ngan là sap đơs bơh ală bơyô dê geh ai tơnggŏ tàm ală gùng đơs pơnđik hơ̆”.

Uă ơruh pơnu ai gŏ bơta chài đơs pơnđik pơgồp bal mờ nhơl đờng gòong

Mờ uă jơnau tus bal pơrlòng niam ngan, cèng tềl krơi is bơh ù tiah dê, pơrlòng mblàng yal jơnau đơs crih kac màng, ơruh pơnu đơs pơnđik mờ nhơl đờng gòong kòn cau neh lơh gơlik anih nhơl gùng đơs crih niam ngan ai đoàn viên ơruh pơnu ală jơi bơtiàn kòn cau tàm càr Dăk Lăk in. Bơh hơ̆, tơnguh bơta kờñ gơboh gơ wèt mờ ală bơta gùng đơs crih, pơgồp bơnah sền gàr mờ bơtàu tơnguh niam chài bơh ală jơi bơtiàn kòn cau tàm càr dê.

Cau mblàng K’Duẩn