VOV4.K’ho- Nàng dong kơnòm dềt geh tai uă bơta jòi git ngan ngồn chờ hờp mờ geh kuơ, uă broă lơh nhơl chờ, lòt sền ngan ngồn niam chài ală jơi bơtiàn kòn cau ơm kis bơh jŏ tàm càr Dăk Lăk neh geh bơyai lơh. Bơh ală broă lơh, ală oh geh tai uă tŭ niam nàng jòi git bè niam chài ală jơi bơtiàn kòn cau mờ ală bơta niam krơi is.

Ală oh dềt tus bal broă lơh trŭ sa mờ ală phan mờng quèng phan bơh biap blơn bơtang dê

Dùl ngai lồi poh nhai 8, tàm hìu jòng Jenny, tàm ƀòn Ako Dhông, ƀòn dờng Buôn Ma Thuột gơ gơs chờ hờp tài ală jơnau nhơl ñŏ mờ jơng tê. Tơl mpồl ală oh dềt bơh 8 tus 12 sơnam bal mờ gơp tus bal ală jơnau nhơl ñŏ bè jun dà rê tàm ƀòn, mblàng sră pơyua ndơp ndơr mờ dà Mỹ, ƀŏ phe, pơgồp bal bơta pràn gơm piang sàu ngai ai jơh mpồl in mờ phan trŭ gơm là ală bơta biap, plai mờng quèng tàm ală dơ̆ sàu sa pah ngai bơh cau Rơđê dê. Sap driau pơn jờng, sap ntas ƀŏ phe bơrlŭ bal mờ ală jơnau tàm boh bơr dà Mỹ- dà yoan sơlơ lơh nùs nhơm chờ hờp rlau. Oh Tô Trần Pha Lê, 12 sơnam, tus bơh ƀòn dờng Kon Tum, càr Kon Tum tus bal broă lơh chờ hờp đơs: “Do là broă lơh sơn rờp mờ oh geh tus bal, lơh sàl kàl rlô bơkang, Farmtrip mờ broă lơh sền git ngan ngồn ală rơ was dềt. Chờ hờp ngan, mờ oh kung git uă rlau tai bè rài kis bơh cau Rơđê dê. Oh kơp kờñ he gơtùi sền git uă rlau tai nàng git bè ală niam chài bơh ală jơi bơtiàn kòn cau ndai”.

Jòi git niam chài ồi kòn cau mờ broă tàñ ồi bơh kòn cau Rơđê dê

Ờ mìng geh trŭ sa mờ tus bal ală jơnau nhơl ñŏ mờ jơng tê, tàm broă lơh, ală oh gam geh lòt sền ƀòn Ako Dhông, jòi git bè niam chài mờ niam chài mòn hìu jòng, broă tàñ ồi kòn cau, iat mờ sền đơs crih, teh phan nhơl gùng đơs crih kòn cau, sềr rùp mờ tus bal uă broă lơh ndai. Do là broă lơh sền git ngan ngồn nhơl chờ niam chài lời ai kơnòm dềt in mờ mat sơnđan “Ală oh rơ was dềt” bơh dùl anih tờm bơto dà đơs lơgar ndai ƀòn dờng Kon Tum, càr Kon Tum bơyai lơh tàm càr Dăk Lăk.

Bi Nguyễn Thị Tuyết Nhung, kwang atbồ Anih tờm bơto dà đơs lơgar ndai Sunshine, tàm càr Kon Tum yal: Tàm tơngai ơm rlô bơkang, bal mờ broă bơsram sră tàm ơdŭ, ală cau bơsram bơh anih tờm dê geh tus bal lòt nhơl sền git niam chài tàm ală càr tàm tiah Tây Nguyên. Bơh hơ̆, dong ală oh dềt geh tŭ niam bơsram ndang, nhơl ndang mờ prap gàr is tai he in ală jơnau git wă bè niam chài, dà đơs mờ akhar cih. Tàm ală càr bè Gia Lai, Kon Tum halà Dăk Lăk, ală gùng lòt sền git niam chài bơh ală jơi bơtiàn kòn cau ơm kis bơh jŏ dê niam ngan mờ gơ hòi gơ jà bơta sền gròi, jòi git bơh ală oh dềt dê tŭ tus bal: “Ờ duh pal lòt tềng lơi ngài, mơya ală oh gơtùi sền git jơh ală broă lơh hơ̆ mờ bol hi ờ di mìng là lam lơh mờ dà yoan halà nhơl ñŏ bè ờs mờ bol hi ngui dà Mỹ, tơmut tàm dà đơs bơto he dê nàng ală oh in gơtùi git là tàm rài kis ngan ngồn bè hơ̆ den ală oh ngui dà Mỹ bè lơi nàng gơ in di ngan rlau jơh”.

Jòi git broă ƀĕ tơrnờm

Tàm Dăk Lăk, tàm kàl rlô bơkang nam do, uă tiah nhơl chờ mpồl bơtiàn nàng rơcang lài bơyai lơh tai ală broă lơh sền git niam chài lời ai ală mpồl nac là kơnòm dềt in bè jòi git bè bơta chài mòn phan nhơl gùng đơs crih đing năm (hơ̆ là kơl wờk geh 6 ding đơr), đing buôt, bơta chài ƀĕ tơrnờm, bơta chài tàñ ồi, bơta chài gơm biap blơn bơtang, prùh piang tàm ding đơr. Ờ mìng jòi git, ală oh gam geh lơh ngan ngồn, lơh is tơn. Geh tŭ, geh bal mờ ală tour lơh cau lơh broă sa mờ broă lơh ơm kis tàm hìu làng bol, đì rơndeh lơ òr lòt tàm suơn kơphe, mù tàm tơnau kup ka halà bơsram uh kơ wào.

Sền git phan nhơl gùng đơs crih kòn cau mờ bơsram uh kơ wào

Bi Y Thiên Adrơng, Kông ty nhơl chờ Siam Tour tàm ƀòn dờng Buôn Ma Thuột, càr Dăk Lăk pà git, mờ ală bơta ƀuơn bơh ală ƀuơn geh bơhiàn bơh jŏ lơh nhơl chờ, kông ty neh lơh ngan tàm tơrbŏ ală broă lơh cèng bơta niam chài krơi is nàng dong nac nhơl chờ, ngan là kơnòm dềt geh tai uă jơnau sền git niam ngan bè niam chài ù tiah do dê: “Ală oh dềt geh sền git niam chài hìu rơng, phan soh, bơh ală broă lơh gơ jat bal mờ niam chài kòn cau. Mờ ală oh geh pơrlòng trŭ gơm phan sa. Ală phan sa do den ală oh bơceh is. Bulah bè hơ̆, ală phan nàng trŭ gơm hơ̆ ndrờm là bơh niam chài mờng quèng cau Rơđê dê, gơtùi tơrbŏ bal bơta niam chài tàm hơ̆. Añ kờñ tơrbŏ jơh ală cau tàm ƀòn do, tơl ƀòn gơs dùl mpồl dờng mờ li la, ờ mìng là kơphe, ờ mìng là hìu jòng, ờ mìng là tàñ ồi kòn cau mờ gam uă ngan bơta ndai nàng ngui tàm niam chài he dê”.

Mờ broă lơh ngac ngar nhơl ndang bơsram ndang, ală broă lơh sền git niam chài lời ai kơnòm dềt in tàm càr Dăk Lăk neh gơ hòi gơ jà uă oh dềt tus bal. Ờ mìng dong ală oh geh tai ală broă lơh geh kuơ tàm tơngai ơm rlô bơkang, ală broă lơh do gam pơgồp bơnah dong ală oh geh tŭ niam nàng jòi git uă rlau tai bè niam chài bơh ală jơi bơtiàn kòn cau tàm càr dê, bơh hơ̆ dong lơh wơl mờ pơn jat tai gàr ală bơta kuơ niam chài niam bơnĕ bơh ală jơi bơtiàn kòn cau dê.

Cau mblàng K’Duẩn