Làng bol mờ gơ̆p bơyô pa iăt Nghệ ñân Y DJoan Mjâo 64 sơnam, ơm tàm ƀòn Wiâo, xã Ea Hồ, kơnhoàl Krông Năng, càr Dăk Lăk uh điñ tarta. Điñ tarta geh lơh bơh dùl nơm ding gle koàr 3 nơm loh, dùl nơm bồ geh lơm piăt iar geh pơnđềt tàm kơmnò plai nhồng ro. Nghệ ñân Y Djoan Mjâo pà gĭt: Ai gle kràñ, dùl nơm plai nhồng ro, nsồp lơwe nàng mòn lơh điñ tarta. Pal geh gle kràñ hơ̆ sồng geh jơnau ntas niam. Pal geh nsồp lơwe nàng pơnđềt, nhơm ờ gŏ gơlik bơdìh. Điñ tarta ndrờm bè Buôt Chok sùm geh uh tàm tŭ đơs kưt krơi is mờ điñ năm là uh tŭ đơs eirei. Do là dùl bơta niam bơnĕ bơh ồng mò dê lời wơl.

Nàng lơh geh dùl nơm kơwơu điñ tarta den plai nhồng ro tŭ pĭc rê pal geh ìs rañ tàm tơngai 6 nhai, hơ tềng hơđang bơnhă ồs 1 nam nàng geh dà jù geh is. Tơnơ̆ hơ̆ koàr 3 nơm loh tàm bơr mờ să plai nhồng ro dê, den hơ̆ tơmŭt ală mơng gle, ngui nsồp lơwe pơnđềt kơ̆ wơl nàng tŭ uh tàm lơmpiăt iar (lơh mờ mơng gle geh pơnđềt kơ̆ tàm bơr plai nhồng ro dê) den gơlik geh jơnau ntas gơguh gơmù krơi is. Nghệ ñân Y Djoan Mjâo pà gĭt: mòn lơh đờng gòng sồr pal geh bơta jak ngan mờ chài ngan.

Nghệ ñân Y Djoan Mjâo đơs: Nàng geh jơnau ntas bơh đờng tarta pah nhai pal tơlik nàng uh ết ngan rlau jơh 1 dơ̆. Tơnơ̆ tŭ uh jơh pal yồng wơl niam. Jơh tơl nă cau ndrờm gơ tùi mòn lơh điñ tarta lơm, ờ tam cah is cau kra, cau kơnòm tài bơh gam kơnòm den sền ngăc rlau geh mòn lơh niam rlau tai.

Jơnau ntas tarta hô hơng ngan den sùm geh uh tàm drim gờñ nàng hòi làng bol tàm ƀòn kah rơngal guh gờñ lòt lơh broă tàm sre tàm mìr. Bơh lài do, điñ tarta ngui tàm ală mang lơh chờ, ală mang geh àng ndar àng. Ală cau kra kung kờñ ngan uh điñ tarta đơs pơn đick nàng bơto bơtê oh kòn sau, nàng tơngŏ nùs nhơm he dê, nàng yal jơnau tàm nùs bal mờ cau lơi hơ̆ mờ kung nàng lơh rài bồ tơngoh, mờ lơh roh tĕ bơta muat jrùm. Nghệ ñân Y Djoan Mjâo pà gĭt tai, ntas điñ tarta dê geh jơnau ntas lơbơn niam mờ kung hô hơng ngan sơl, nàng lơh kah rơngal làng bol tàm ƀòn guh gờñ rcang phan lòt lơh broă tàm sre tàm mìr, mơkung pơniang oh kòn kòn sau bĭc lơhă.

Nghệ ñân Y Djoan Mjâo đơs tai: Àng drim gờñ, tŭ iar pa nrao, pơgap bơh 3 tus 4 jiơ drim, cau mè ƀŏ phe, bèp, halà ồng geh uh điñ tarta pơnđiang kòn sau in bĭc. Tài bơh lài do kòn cau Rơđê sùm ƀŏ phe tàm àng drim gờñ.

Tŭ tơngai lòt gan gơ jat bal gĭt nđờ bơta bòl glar kal ke rcang lơh broă sa tàm rài kis neh lơh bơta niam chài bơh yau kòn cau Rơđê dê hời rơ hời roh tĕ. Ală nghệ ñân kah wơl ală jơnau ntas mpong ntas, jê nùs ngan bơh đờng gòng jơi bơtiàn kòn cau he dê, ờ suk ơm ngan tŭ điñ năm, điñ buốt, điñ tut, jơnau ntas cing mồng dê.... gam hời rơ hời gơtìp hŭi tĕ. Bal mờ bơta kờñ ngan, jơh nùs ngan bơh ală nghệ ñân dờng sơnam dê den gah lơh broă niam chài kung kờñ geh ală broă lơh geh ngan, geh cồng nha nàng broă prap gàr mờ lơh jat ală bơta kwơ niam chài jơi bơtiàn kòn cau đơs is mờ ală đờng gòng niam ngan bơh kòn cau Rơđê dê ngai sơlơ geh lơh jat tàm uă tiah.