VOV4.K’ho - Tơnkah 77 nam ngai crơng gơs Anih pờ tơlik jơnau đơs Việt Nam, tàm Anih tờm Pờ tơlik jơnau đơs Dà lơgar sồ hìu 58, gùng Quán Sứ, ƀòn dờng Hà Nội, Anih jơnau đơs Việt Nam bơyai lơh đơs crih tamya tiah hờ đah tô dà lơgar.

Jơnau đơs crih bơh Mpồl yal tơngit jơnau VOV1 mờ broă tus bal bơh kwang bàng bal mờ gal cau ai tơngit jơnau, cau sền sơwì jơnau

Mờ tơngu me pơn jờng nùs nhơm kờñ gơboh ƀòn lơgar, dà lơgar, pơn jờng Đảng, Ƀác Hồ, pơn jờng bơhiàn bơh Anih pờ tơlik jơnau đơs Việt Nam dê, ală kwang bàng, cau cih jơnau tơngit, cau sền sơwì jơnau, kông ñân, viên cứk, cau lơh broă tàm ală gah, ală mpồl lơh broă sùm tàm gùt lơgar neh cèng tus dơ̆ đơs crih tamya ală jơnau đơs crih krơi is, geh uă bơta niam uă. Dơ̆ đơs crih tamya là dơ̆ nàng ală kwang bàng, kông cứk, viên cứk sền wơl rài lài do ờs mờng khin cha jăk chài bơh Anih pờ tơlik jơnau đơs Việt Nam lòt bal mờ dà lơgar bơh tàm ngai Sơn tờm, bơh bàr dơ̆ tam lơh, broă tam gơl pa mờ bơ̆t bơtàu, sền gàr dà lơgar tus tŭ do. Pơgồp bal tàm broă lam lơh geh nùs nhơm kờñ gơboh, nùs nhơm pơnyờ să broă lơh, lam sồr geh nùs nhơm gơboh kờñ, kơnòl bơh cau lơh ƀăo, prăp gàr mờ tơnguh bơhiàn ờs mờng niam, pơgồp bal tàm broă tơnguh bơtàu dà lơgar dê. Dơ̆ đơs crih tamya kung là dơ̆ nàng ală mpồl lơh broă tàm Anih pờ tơlik jơnau đơs Việt Nam tìp bal, bơsram bal broă mờng chài, tơnguh nùs nhơm tam klăc bal đah ală mpồl lơh broă, lơh gơs niam kơnòl cíñ trị geh jào.

Mang òr (06/09), geh bơyai lơh jào khà pơn jờng Jơnau đơs Việt Nam nam 2022. Ală jơnau đơs crih geh khà jăk chài ngan tàm ală tiah tàm gùt lơgar tus bal lơh, chờ gờm 77 nam crơng gơs Anih pờ tơlik jơnau đơs Việt Nam.

Cau mblàng Ndong Brawl