Dơ̆ lơh Yàng duh khoai là bơhiàn ưn ngài trồ tiah, ưn ngài ală Yàng ù tiah mờ cau lòt lài neh ai lơngăp lơngai mìu càl niam, dà lơgar ring lơngai, pas gơs, làng bol lơngăp lơngai, phan tam geh tơnhào uă. Dơ̆ lơh Yàng duh khoai geh Mpồl duh khoai Nam quan lơh jat bơhiàn bơh yau, pơdơng phan ơn pơdơng duh khoai mờ chu ñàng kah kơlôi ală cau neh lòt lài. Ală cau ala mat mờ làng bol kung dơ̆ dô dơ̆ chu ñàng, tơngŏ nùs nhơm ưn ngài, kơ̆p kờñ mìu càl niam, trồ tiah lơh aniai mìu càl rơbŭt dờng mhar lòt gan, rài kis lơngăp lơngai, pas gơs.

Jat mò Võ Thị Phượng, Kwang lam bồ Hìu ơn prăp phan kwơ yau càr Dăk Lăk pà gĭt, broă lơh do ờ mìng nàng kờñ prap gàr, lơh jat niam ală bơta kwơ niam chài ờs mờng lơm, mờ gam kờñ yal tơngĭt, yal uă tiah tềl lời wơl kah yau pơgồp bal mờ bơtàu tơnguh lòt nhơl niam chài đah hwềng tàm tiah do dê.