Lài mờ tŭ bơyai lơh dơ̆ lơh Yàng duh khoai, bal mờ broă rcang phan ơn pơdơng, hìu bơnhă cau tờm mìr jà tơl làm cau kra, cau kơnòm să, ùr klau tàm ƀòn nàng dong hìu bơnhă lòt tùc kòi. Hìu bơnhă cau tờm mìr rcang ală bơta gar sơntìl, bè: sơntìl kòi, sơntìl tơngời, sơntìl rơpung, sơntìl plai bùñ, sơntìl plai blơn mờ mrĕ. Bè phan ơn pơdơng, gơ jat tàm ală bơta lơh sa bơh tơl hìu bơnhă dê geh, digơlan geh sur halà iar, mờ tơrnờm. Cau tàm ƀòn tus dong den cèng bal ding ơn gar sơntìl nàng piah kòi.

Mè Nư ơm tàm sàh Ea Wer, càr Dăk Lăk pà gĭt, dơ̆ tùc kòi mìr là dùl bơnah kwơ màng tàm rài kis niam chài bơh kòn cau M’nông dê, tơngŏ bơta tam klăc mpồl bơtiàn: “Tơnơ̆ tŭ wàs jơh rŭ rơm den hìu bơnhă rơ̆p rcang tùc kòi. Lài ngan là pal rcang sơntìl kòi niam ngan, den yal mờ tơl nă cau tus bal dong kờl he tùc kòi. Tơnơ̆ tŭ lơh Yàng duh khoai jơh den cau klau sơnđờm chŭt trồm, cau ùr jat bơh ngkời tùc kòi. Tơnơ̆ dùl ngai tùc tàm mìr den hìu bơnhă kung gơm biăp piang nàng jà tơl nă cau sa bal, ñô bal. Hìu lơi kung bè hơ̆ lơm, sền bè tam pơgơl ngai lơh broă. Tơnơ̆ tŭ kòi dum den lòt kăc kòi kung lơh ndrờm bè hơ̆ sơl”.

Drim gờñ, cau tờm hìu rơwah dùl ƀàng ù geh tiah jơnhoa tàm tiah mìr dê, wàs sàng goh nàng lơh rơnŭ dềt ơn sơlào phan duh khoai. Kềng gah geh dùl nơm sơ̆ ơn bềng gar sơntìl, là drăp tơrnờm neh geh tuh bềng dà, dùl nơm iar neh lơh poăc, dùl nơm glah piang mbar, bal mờ phan ngui lơh broă bè, wâu (geh tiah hòi là jơlèng) gai chŭt trồm, ding piah kòi. Cau tờm hìu sơnđờm lơh đơs ală jơnau răc dan mờ Yàng. Jơnau răc dan yal ai Yàng brê bơnơm, Yàng mìr, kơ̆p kờñ ai mìu càl niam, nàng kòi in hòn gơs, ờ gơtìp kòn il, kòn sềm, kòn prò tus aniai mìr, ai dùl kàl tàm phan geh tơnhào uă. Lơh Yàng duh khoai jơh, cau tờm hìu sơn đờm tuh gar sơntìl tàm ding, chŭt trồm mờ tùc kòi. Pơn jat hơ̆ là tus làng bol tàm ƀòn tus dong ngai lơh broă hơ̆ rơ̆p piah gar sơntìl jat bơh ngkời. Mè Ly ơm tàm sàh Ea Wer, càr Dăk Lăk, pà gĭt, bơhiàn do bơh kòn cau M’nông dê neh geh bơh jŏ rài ngan: “Lài do làng bol mìng kơnờm tàm trồ tiah, ờ geh phơng sih den tàng làng bol tơnơ̆ tŭ wàs tiah mìr pa den khi ndrờm tùc kòi tàm mìr bơh 2 tus 3 nam, tơnơ̆ tŭ ù neh klàr den khi tam gơl tus dùl tiah mìr ndai mờ tam phan bơh 3 nam mờ tơnơ̆ hơ̆ den rê wơl tàm mìr yau, khi kung ờ mus kơl brê tai nàng lơh mìr ờ. Tŭ do mìr ndrờm tam khoah, tơngời mờ tào, ai kòi den lơh kòi sre lơm, làng bol bơtàu tơnguh uă rao, lơh jat Dà lơgar ờ gŏ mus kơl brê, mơya bơhiàn lơh Yàng duh khoai kòi mìr tàm tŭ mut tàm kàl sih tam pa khi kung gam lơh jat sơl, di mờ bơhiàn lài do dê”.

Tơn jơh dùl ngai lơh broă kal ke tàm mìr, jơh hìu bơnhă mờ tơl nă cau rơ̆p bal mờ gơ̆p sa ñô mờ tus bal ală broă lơh nhơl chờ, đơs crih tam ya, tơngŏ nùs nhơm tam klăc dong kờl bal. Tŭ do, pah nam tàm ală ƀòn bơh kòn cau M’nông dê ết ngan rlau jơh kung lơh bơhiàn do tàm bồ kàl sơnđờm tam phan, nàng tơngŏ nùs nhơm gĭt ưn ngài Yàng neh ai khi in dùl kàl tam phan geh tơnhào uă.