Tŭ tờm kòi sơnđờm să gar halà mờr dum, kòn cau Jrai “ngă Yàng Hri” hơ̆ là duh khoai yàng kòi. Tàm ƀlàng sre, tiah bơyai lơh duh khoai Yàng Hri, cau ơn dùl yăng tơrnờm tàm tiah đah mat tơngai lik. Jat cau bơjơu ồng Y Phĭ Mjâo ơm tàm ƀòn A1, thị trấn Ea Sup, kơnhoàl Ea Sup, càr Dăk Lăk, yăng tơrnờm ơn tàm tiah đah mat tơngai lik do lời ai Yàng-gah-ngŏ, gơtha là ală yàng tơrgùm bal gùt dar mờ bal mờ yàng hơđang trồ sền gàr ƀòn lơgar, sre mìr. Cau bơjơu Y Phĭ Mjâo pà gĭt: Hơ̆ là tŭ sih tam gar kòi, gar tơngời. Duh khoai Yàng Hri yàng kòi. Do là bơhiàn bơh yau òr bơh kòn cau Jrai dê, duh khoai Yàng Hri, Yàng Hrai, kòn cau Jrai sơnđan là Trum, bơh rài ồng pàng yŭt yau òr ngan. Kòn cau Jrai duh khoai yàng kòi nàng hòi dan mờ yàng kơ̆p kờñ lơh sa ƀuơn ƀoài, blàng sre, bă mìr ờ gơtìp đe kăp, đe sa aniai.

Nàng lơh dơ̆ lơh yàng duh khoai Yàng Hri, kra ƀòn tàm ƀòn geh sac rơ wah “ngai niam nhai niam” den hơ̆ sồng yal pơrjum ƀòn, ring bal ngai bơyai lơh dơ̆ lơh yàng. Kra ƀòn tam pà ală ơruh pơnu tàm ƀòn rcang ală bơnah broă krơi is. Cau den rcang bĕ tơrnờm, cau den rcang iar halà sur, biăp brê, piang mbar buh... Tus ngai lơh yàng duh khoai, tơnơ̆ tŭ rcang tơl làm ală phan ơn pơdơng, cau bơjơu sơnđờm đơs jơnau duh khoai, jà ală yàng rê nàng sền gŏ nùs nhơm bơh làng bol ƀòn lơgar dê. Cau bơjơu Y Phĭ Mjâo, đơs: Tŭ duh khoai Yàng Hri bol he pal rcang phan ơn pơdơng. Ală cau bơjơu hơ̆ sồng geh lơh yàng duh khoai. Tàm jơi bơtiàn lơi den pal jòi cau lơh yàng duh khoai jat jơi khi dê. Duh khoai mờ dùl nơm iar mờ dùl yăng tơrnờm. Dilah ờ geh iar, yăng tơrnờm den ờ gơtùi lơh yàng duh khoai ờ. Kơnrồ den ờ gơtùi lơh phan ơn pơdơng ờ tài bơh jat bơta pin dờn bơh kòn cau Jrai dê hơ̆ dùl phan duh. Ai sur den gơ tùi lơh phan ơn pơdơng duh khoai yàng.

Tŭ neh jpơ duh khoai, ală kra ƀòn, cau duh khoai hòi ơruh pơnu mờ làng bol tur sơngơr, dròng cing jañ mồng tĕ. Jơh ƀòn lơgar sa bal, chờ hờp bal, tam ya xoang, tơl nă cau ñô bal tơrnờm jài đơs pơnđick jài. Dơ̆ lơh yàng duh khoai Yàng Hri là bơhiàn kwơ màng, geh hìu bơnhă mờ mpồl bơtiàn bơyai lơh mờ kơ̆p kờñ mìu niam, càl niam, phan tam hòn gơs niam, tơngŏ bơta tam klăc bal đềt mềr bal tàm ƀòn lơgar, lơh geh bơta pràn bơh mpồl bơtiàn dê. Cau bơjơu Y Phĭ Mjâo pà gĭt tai: Broă duh khoai Yàng den jơh tơl nă cau pal lơh jat. Dilah cau kra chơ̆t tĕ den ală cau kơnòm să kung pal lơh yàng duh khoai jat bè cau kra sơl. Bañ lơh roh tĕ bơhiàn bơh yau jơi bơtiàn he dê. Lài do ndrờm lơh yàng duh khoai Yàng, kòn cau Jrai, Rơđê, M’nông ndrờm duh khoai Yàng lơm.

Dơ̆ lơh yàng duh khoai Yàng Hri bơh kòn cau Jrai ơm tàm kơnhoàl Ea Sup dê là dùl bơhiàn niam bơnĕ bơh yau dê cèng bal jơnau niam chài uă ngan geh làng bol tàm tiah do sền dờng màng mờ prap gàr bơh rài do tus rài ndai. Do là dơ̆ nàng cau tàm hìu bơnhă, ƀòn lơgar tơrgùm bơtòm mat bal tam pà bal mờ gơ̆p tàm broă bơtàu tơnguh lơh sa, bơt bơtàu hìu bơnhă chờ hờp mờ sơlơ tam klăc bal tai mpồl bơtiàn.