VOV4.K’ho- Càr Lâm Đồng gam sơrbac mhar rơcang bơyai lơh Festival bơkàu Dà Làc dơ̆ 9 nam 2022. Do là broă geh bơyai lơh dờng ngan rlau jơh bơh lài tus tŭ do mờ tơngai lam lơh jŏ jòng tus 2 nhai. Mờ tơngume “Dà Làc- Ƀòn dờng 4 kàl bơkàu”, Festival bơkàu Dà Làc dơ̆ 9 nam 2022 geh lơh tàm 2 nhai, bơh ngai 01/11 tus jơh ngai 31/12.

Festival bơkàu Dà Làc dơ̆ 9 jŏ jòng tàm tơngai 2 nhai

Bơdìh mờ 10 broă lơh tờm geh lơh uă ngan tàm ƀòn dờng Dà Làc, Festival bơkàu Dà Làc dơ̆ 9 gam geh 41 broă lơh lam lơh jat rah rài tàm 2 ƀòn dờng là Dà Làc, Bảo Lộc mờ làm gùt ală kơnhoàl tàm càr. Jat ồng Ngô Văn Ninh, Kwang atbồ cơldŭ lơh broă, cau sơ pơ̆ bơr bơh Ủy ƀan Ñân zân càr Lâm Đồng dê yal, Festival bơkàu Dà Làc là tŭ nàng sơlơ chồl pràn mờ tơnguh bơta kuơ bơh mat kă bro “Dà Làc- Ƀòn dờng Festival bơkàu dê”, yal tơnggit rùp hin nhơl chờ Dà Làc- Lâm Đồng, mat kă bro “Dà Làc- bơta bơ tòm tơrgùm crih crài bơh ù niam”, gơ jat bal mờ bơta broă lơh nhơl chờ lòt sền suơn sre mờ uă phan lơh gơs bơh suơn sre tiơng pơn rơ bơh càr dê. Tŭ do, broă rơcang bơyai lơh gam geh ală anih lơh broă, mpồl lơh broă tàm càr jơh nùs lam lơh.

VOV Tây Nguyên/Cau mblàng K’Duẩn