Bi Nguyễn Thúy Linh, cau tờm hìu tac phan Coffee mờ homestay Hoa Sứ tàm thôn Hữu Đức, dàh Phước Hữu, càr Khánh Hoà neh bơka tai 2 cơldŭ ơm wơl bic mang ai nac lòt nhơl in tàm dơ̆ lơh yàng lơh chờ Katê. Hìu tac phan gam ràng tai ală phan tiơng pơn rơ is ồn bơh ƀòn lơgar dê tai bè dà màn, vang ño, poac rơpu ìs 1 tơngai, iar ting lềng tàm suơn mờ ală phan bơh ồi kòn cau Prum là kơldung triau, kơldung àñ, àu ram…

Nàng lơh gơlik nùs nhơm chờ hờp ai ngai lơh chờ Katê in, sàh Phước Hữu neh sồr mờr 300 nă kơnòm bơsram, ơruh pơnu mờ cau ùr tus bơh ală thôn tàm sàh tus bal ală jơnau tamya mpồl bơtiàn. Bulah trồ tiah ờ niam mơya nùs nhơm pơlam tàp tàm ƀlàng coh plai thôn Hữu Đức kung gam duh hồl ngan mờ bềng lìu bơta jơh nùs. Bi Nguyễn Thúy Linh pà git:

“Tàm ală ngai do, ală oh mi cau ùr tàm thôn tơrgùm wàs kloh niam tiah kis gùt dar tàm ală gơl gùng tàm ƀòn, ai ală kơnòm bơsram den rơndap is broă bơsram sră he dê nàng trồ mho lòt tàp đơs crih tamya nàng tus ngai lơh chờ Katê tus bal mpồl tamya rò Y trang. Ai tàm tơl hìu bơnhă kung pơs wàs sơl, bơka wơl hìu đam, rơcang ƀañ, plai chi, ngan là ƀañ ờs mờng cau Prum dê. Bơdìh hơ̆ tai, gŏ uă ƀòn cau Prum ndai kung tàp tamya mpồl bơtiàn sơl, tàm hơ̆ geh bơta rơcang lơh pa ală jơnau đơs crih tayma, sền gŏ niam ngan. Ală nam lài mìng geh 2, 3 ƀòn lơh, nam do lơh dồ ròt bal tơn”.

Bal mờ tàp đơs crih tamya, ală ngai do, ală cau tàm Mpồl lơh broă bal phan ù buh cau Prum Bàu Trúc tơrgùm uă rlau jơh nàng mòn gơs uă phan ù buh thàn drơng nac lòt nhơl in tàm ngai lơh chờ Katê do.

Ồng Phú Hữu Minh Thuần, Cau lam bồ Mpồl lơh broă bal phan ù buh kòn cau Prum Bàu Trúc, sàh Ninh Phước, càr Khánh Hòa pà git, tŭ do, kờp bal pah ngai geh rlau 1 rbô dơ̆ nac lòt nhơl tus ƀòn mòn phan ù buh Bàu Trúc nàng sền mờ blơi. Nam do, mpồl lơh broă bal neh khin cha bơcri priă lơh tai anih ràng phan ù buh kòn cau Prum Bàu Trúc. Anih ràng phan ù buh ờ mìng là anih yal tơnggit bơta niam chài broă mòn phan ù buh bơh yau mờ gam là anih niam chài kòn cau Prum dê niam ngan, pơgồp bal nhơl đờngg oòng kòn cau, đơs crih tamya ờs mờng bơh yau, dong nac lòt nhơl git rlau tai bè rài kis, bơhiàn bơh yau mờ lơh ngan sền gàr bơta niam chài cau Prum dê. Ồng Thuần pà git tai:

“Nam do, nac gal ngan, bè hơ̆ den tàng Mpồl lơh broă bal bơcri tai priă nàng lơh hìu ràng tơlik phan ù buh nàng drơng nac lòt nhơl in nàng ngai lơh chờ Katê do. Dilah mpồl nac lòt nhơl geh jơnau kờñ den kung rơp geh mpồl cau mblàng yal tàm anih ràng tơlik, sền git ngan ngồn kung bè nhơl đờng goòng bơh yau kòn cau Prum dê nàng drơng nac lòt nhơl in. Tŭ càr Khánh Hòa pa geh crơng gơs den ngan là khà nac rơp gơguh uă, tài bơta bơhiàn yau gơ pơgồp bal mờ càr Ninh Thuận yau mờ càr Khánh Hòa pa, bè hơ̆ den tàng bơta gơ rề gơ dê rơp ơnàng rlau”.

Ai tàm càr Lâm Đồng, ală ngai do, ală tiah tềl kah yau bè Hìu duh khoai Pô Nit tàm sàh Bắc Bình, Hìu duh khoai Pô Klaong Mơ-nai tàm sàh Lương Sơn, anih prap ơn pờ Jơi bơtiàn bơtau cau Prum tàm sàh Hồng Thái, làng bol neh lam lơh pơs wàs tiah ơm kis mờ yồng bồng bi dà lơgar tàm hìu bơnhă. Is ồn, tàm hìu kuơ̆ Pô Sah Inư tàm sơnah ƀòn Phú Thủy, càr Lâm Đồng rơp geh bơta tus bal bơh 9 sàh geh gal làng bol kòn cau Prum dê mờ uă broă lơh niam chài geh bơyai klơh geh: uh rơkèl Sanarai, pơrlòng ƀŏ phe, pơrlòng tiă dà sơrlèt phan kang, nhơl kơt mat pờng glah mờ lơh phan ù buh ờs mờng bơh yau, tàñ ồi kòn cau Prum, is ồn là tiah ràng tơlik phan sa cau Prum.

Ồng Trần Đức Dũng, Lam bồ mpồl atbồ tiah tềl kah yau hìu kuơ̆ Pô Sah Inư pà git:

“Broă rơcang lơh tŭ do kung neh geh lam lơh mờr sir jơh. Nam 2025 là nam sơn rờp mờ dơ̆ lơh yàng lơh chờ Katê geh lơh tơnơ̆ tŭ càr Lâm Đồng pa geh crơng gơs. Ală broă lơh ndai bơh ngai lơh chờ dê kung gam lơh jat bơhiàn ờs mờng bơh yau mờ bơta pin dờn jat yàng bơh làng bol kòn cau Prum dê neh geh lơh wơl mờ geh lơh bơh lài tus tŭ do tàm tiah tềl lời wơl hìu kuơ̆ Pô Sah Inư. Bơdìh hơ̆ tai, bol hi kung bơyai lơh 2, 3 broă lơh is ồn là bơnah lơh chờ nàng drơng nac lòt nhơl in tŭ lòt sền, jòi git”.

Katê là dơ̆ lơh yàng lơh chờ bơh yau pah nam bơh làng bol kòn cau Prum dê. Do ờ mìng là dơ̆ nàng cau Prum ai tơnggŏ nùs nhơm kah ưn ngài mò pàng, jờng rơ ală brah yàng mờ gam là rùp pơrya niam ngan bơh rài kis niam chài, pin dờn jat yàng mờ nùs nhơm tam klac bal mpồl bơtiàn dê. Bơh pah dơ̆ lơh yàng lơh chờ, ală bơta kuơ niam chài cau Prum niam ngan pơn jat tai geh sền gàr, lơh gơ rề uă, pơgồp bơnah lơh li la tai pang rùp niam chài li la bơh càr Khánh Hòa mờ Lâm Đồng dê. Do kung là tŭ niam nàng yal tơnggit niam chài kòn cau Prum tus mờ nac lòt nhơl tàm lơgar mờ bơdìh lơgar, pơgồp bơnah bơtàu tơnguh gah lòt nhơl bơh càr dê dồ bă kơnhăp jŏ.