Lòt gan 80 nam, Anih jơnau đơs Việt Nam neh gơ gơs bơyô rềp mềr, mờng kwèng mờ ƀòn lơgar Tây Nguyên. Ờ mìng cèng tus ală jơnau yal tơngĭt pah ngai, ală jơnau đơs pơnđick, gùng đơs pơnđick, iăt ală Jơnau đơs bơh Anih jơnau đơs Việt Nam dê lơm, mờ gam dong làng bol geh tai bơta gĭt wă tam phan, ròng phan, sền gàr brê, sền gàr bơhiàn niam bơnĕ... Kơnờm bơh hơ̆, làng bol khin cha brồ guh bơt bơtàu rài kis hờm ram, gơboh gơbài. Làng bol ală jơi bơtiàn dồ ết nă cau Tây Nguyên sùm sền Anih jơnau đơs Việt Nam bè là bơyô đềt mềr bơh he dê.

Kra ƀòn Y Thành, 68  sơnam (ơm tàm sàh H’Ra, càr Gia Lai) ngoh rơngăc đơs:“Bơh tàm Anih jơnau đơs mờ să tờm añ iăt săp sền Jơnau yal bơr Lơngăp lơngai is bơh Wa Hồ dê tàm nam 1945. Ngan ngồn ngoh rơngăc ngan! Kung kơnờm Rơdio mờ ngai 30-4-1975, làng bol gĭt geh tiah đah Jum dà lơgar geh tơngklàs. Tŭ hơ̆ bol añ ơm tàm tiah pôs đồng, tŭ gĭt geh jơnau yal do jơh gùt làng bol nggồr chờ hờp ngan... Dơ̆ 2 tai là añ iăt Anih jơnau đơs Việt Nam geh jơnau đơs dà kòn cau Bahnar, Jrai, Sơdàng mờ bàr pe jơnau đơs jơi bơtiàn ndai... Añ chờ hờp ngan tŭ dà đơs mè deh dê geh sền gàr, geh sùm tàm săp pờ dờng. Anih Jơnau đơs Việt Nam gam bơto bơtê ai làng bol in gĭt ròng phan, tam phan, bơt bơtàu rài kis pa... Să tờm añ sùm iăt den mblàng yal wơl ai làng bol in ală bơta niam geh iăt bơh tàm Anih jơnau đơs dê.