Ƀộ Văn hóa- Thể thao mờ Zu lịc kung neh ai tơlik Broă rơndap lơh lam lơh jat Jơnau pơn dut bơh Tổng Ƀí thư dê tàm Pơrjum Niam chài gùt lơgar mờ Broă rơndap lơh bơtàu tơnguh niam chài tus nam 2030. Ƀan Tuyên giáo dà lơgar đơng lam bơyai lơh Pơrjum dà lơgar “Ală bơta kuơ dà lơgar, ală bơta kuơ niam chài, ală bơta kuơ hìu bơnhă mờ tơl khà niam kòn bơnus Việt Nam tàm tŭ tơngai pa”.  Uă càr, ƀòn dờng tàm gùt lơgar neh ai tơlik ală Nghị quyết lam lơh jat jơnau pơn dut bơh Tổng Ƀí thư ồng Nguyễn Phú Trọng dê tàm Pơrjum Niam chài gùt lơgar. Hà Tĩnh là càr sơn rờp bơyai lơh Pơrjum niam chài kâp càr lam lơh jat jơnau pơn dut Pơrjum Niam chài gùt lơgar nam 2021.

Tàm pơrjum Niam chài nam 2022 mờ tơngume “Kơrnoat boh lam, broă lơh mờ bơta priă jền ai bơtàu tơnguh bơta niam chài”. Đơs tàm broă lơh do, Củ tịc Hội đồng Jơi bơtiàn kòn cau ồng Y Thanh Hà Niê K’Đăm pà gĭt, Việt Nam là dùl dà lơgar uă jơi bơtiàn kòn cau, mờ 53 jơi bơtiàn kòn cau dùl ết nă cau, tơl jơi bơtiàn kòn cau den geh ală bơhiàn, rài kis mờ ală bơhiàn niam bơnĕ is, cèng bơta mùl gŏ ngan. Bơta hơ̆ lơh geh ai Việt Nam in dùl rài niam chài lilia uă mờ ring bal. Den tàng bè hơ̆, prap gàr mờ ngui niam bơta kwơ niam chài mpồl bơtiàn ală jơi bơtiàn kòn cau dùl ết nă cau nàng kờñ gàr niam bơta li la, bơta ring bal, bơta bơnĕ bơnài bal mờ bơta kơ̆ kơljap tàm bơtàu tơnguh lơh sa- mpồl bơtiàn bơh dà lơgar dê sùm geh Đảng, Dà lơgar sền gròi mờ lơh jat. Jơnau sồr prap gàr mờ ngui niam bơta kwơ niam chài bơh yau niam bơnĕ ală jơi bơtiàn kòn cau dùl ết nă cau ngai sơlơ gơ gơs jal mhar tàm tơngai tìp mat lơh kwèng mờ mut gơ rờm bal dunia. Bal mờ broă sền gàr prap gàr mờ ngui niam bơta kwơ niam chài tàm broă lơh mut gơ rờm bal den broă lơh geh bơta tam klăc bal niam broă prap gàr mờ ngui niam ală bơta kwơ niam chài bơh yau ală jơi bơtiàn kòn cau dùl ết nă cau mờ ală broă lơh, rơndap broă lơh, broă lơh bơtàu tơnguh lơh sa- mpồl bơtiàn tiah làng bol kòn cau dùl ết nă cau, tiah kơh bơnơm kung kờñ geh ai tơlik.