Ƀộ Văn hóa, Thể thao mờ Zu lịc kung neh tơlik kơrnuat bè broă bơt bơtàu Rơndap broă lơh prap gàr, lơh wơl mờ ngui niam bơta kuơ jơnau pơnđik, tamya, gùng đơs crih bơh ală jơi bơtiàn kòn cau dùl êt nă cau dê, pơgồp bal mờ bơtàu tơnguh nhơl chờ tơngai bơh nam 2021 tus nam 2030. Gơ wèt mờ tơl jơi bơtiàn kòn cau, jơnau pơnđik, tamya kòn cau là bơta tơrgùm bơh ală bơta kuơ niam chài, kah yau, bơhiàn ờs mờng niam ngan.

Jat Ƀộ Văn hóa, Thể thao mờ Zu lịc pà git, Rơndap broă lơh geh lơh nàng kờñ sền sơ wì bơta geh ngan broă lơh prap gàr, lơh wơl mờ ngui niam bơta kuơ jơnau pơnđik, tamya, gùng đơs crih bơh ală jơi bơtiàn kòn cau dùl êt nă cau dê, pơgồp bal mờ bơtàu tơnguh nhơl chờ. Bơh hơ̆ ai tơlik ală broă lơh ngui, gàr niam bơta kuơ prap gàr dùl bă geh cồng nha. Bulah bè hơ̆, nàng lam lơh ală bơta do den ngan kung pal gơtìp uă ngan kal ke. Mò Nguyễn Thị Hải Nhung, kwang atbồ Vụ niam chài kòn cau, Ƀộ Văn hóa, Thể thao mờ Zu lịc yal: “Tài bơta chài git wă bồ tơngoh làng bol dê ờ ndrờm bal den tàng broă hòi jà tă pơgồp priă jền, phan bơna bơh gơnoar atbồ kung bè tiah làng bol ală jơi bơtiàn kòn cau dùl êt nă cau dê tàm broă gàr sùm, sền gàr ală bơta kuơ niam chài gam gơtìp uă kal ke. Den bơta sền gròi bơh ală kâp, ală gah broă lơh dê tàm broă lơh prap gàr niam chài, bơhiàn bơh yau bơh ală jơi bơtiàn kòn cau dùl êt nă cau dê geh tŭ, geh tiah ờ hềt nền nòn mờ ờ hềt ring bal mờ ờ hềt git wă dipal mờ tơl làm bơta kuơmàng tàm broă lơh niam chài kòn cau, ngan là broă lơh mblàng yal, hòi jà làng bol kòn cau geh lơh sùm mờ làm uă”.

Tàm càr Thái Nguyên, kơnờm bơta jơh nùs bơh ală cau git đơs crih tayma tàm càr dê mờ ală oh dềt cau Dao tàm ƀòn Suối Bốc, xã Yên Ninh, kơnhoàl Phú Lương gam rơhời git wă broă bơsram dà đơs kòn cau, bơsram đơs pơnđik Pả Dung là dùl broă nàng git rlau tai bè tơngu rơyas jơi bơtiàn kòn cau he dê. Bal mờ ală ơdŭ bơsram bơto đơs pơnđik Pả Dung, dùl tàm ală broă lơh prap gàr niam chài đơs crih tamya mờ cau Dao tàm Thái Nguyên neh gàr sùm geh cồng nha, hơ̆ là lơh ală kâu lạk ƀộ. Do là ală anih niam chài bơh cau Dao kờñ đơs crih tamya, kờñ gùng đơs pơnđik, tamya kòn cau bơh yau, pơgồp bơnah lơh niam rlau tai rài kis nùs nhơm, bơt bơtàu rài kis niam chài tàm ƀòn lơgar. Mò Phạm Thị Lan Anh, kwang atbồ Cơldŭ niamc hài yal tơnggit jơnau kơnhoàl Phú Lương, càr Thái Nguyên pà git: “Bơh broă lơh ală kâu lạk ƀộ prap gàr do den bol hi dong lơh wơl ală gùng đơs pơnđik, tamya kòn cau, ală broă lơh yàng, lơh chờ bơh làng bol kòn cau Dao dê. Mờ kung là dùl gah nàng bol hi pơn jat tai bơto pơlam, dong tơnguh uă ală nghệ ñân kòn cau”.

Geh lơh bơh jŏ ngan, sơn đờm bơh tàm broă lơh sa, tàm pin dờn duh khoai mò pàng, gùng đơs pơnđik Pả Dung cèng dùl bơta kuơ niam chài, nùs nhơm mờ gơtha kuơmàng ngan gơ wèt mờ cau Dao. Bơta niam bơh Pả Dung dê gơ ơm tàm ală bơta đơs. Tơl bơta geh ai tơlik jơnau sồr bè tŭ tơngai, jơnau đơs is, ai tơnggŏ nùs nhơm krơi is. Ồng Đặng Phúc Lương, lài do là Củ tịc Mpồl cih sră niam chài đơs crih tamya ală jơi bơtiàn kòn cau dùl êt nă cau càr Thái Nguyên pà git: “Ală gùng đơs Pả Dung bơh ală mpồl cau Dao dê krơi is lơm. Mìng geh Dao Quý Lâm mờ Dao Pơrhê là rềp mờ gơp. Bơta ai ai sap, sap đơs lơyah, jòng, gơguh gơmù đơs bal là krơi ngan. Mơya bơta niam ngan rlau jơh bơh Pả Dung dê kung gam là gùng đơs bơh cau Dao Pơrhê dê”.

Tàm ală nam do, geh bơta sền gròi bơh gah niam chài dê, làng bol kòn cau Dao dê tàm Thái Nguyên neh geh tai tŭ niam nàng tìp mat lơh kwèng yal tơnggit ală gùng đơs pơnđik, tamya kòn cau he dê tàm uă broă lơh bơh càr dê. Gùng đơs pơnđik Pả Dung neh geh dờp là phan lời wơl niam chài ờ di phan bơna kâp dà lơgar. Hơ̆ là bơta pơn iờ să, là dùl tàm ală hiòng dà pơlam ală rơnàng cau Dao bal mờ gơp git wă mờ gàr niam tàm mpồl bơtiàn ală bơta kuơ niam chài krơi is, tàm hơ̆ geh đơs pơnđik, tamya kòn cau.

Gơtùi đơs, prap gàr jơnau pơnđik, tamya, gùng đơs crih kòn cau mờ broă pơgồp bal mờ bơtàu tơnguh nhơl chờ geh sền là broă lơh niam. Tài bè hơ̆, ală gùng đơs pơnđik do geh kis tàm rài kis pa tŭ do. Mơya lài ngan pal rơhời bơt bơtàu ală mpồl lơh broă, ală broă lơh mùl màl. Tàm hơ̆, sền gròi tus broă bơto bơtê, dong kờl ală nghệ ñân prap gàr niam chài: “Dong kờl ală nghệ ñân, cau geh bơngă pin dờn tàm mpồl bơtiàn tus bal lơh kơnòl lam lài tàm ală kâu lạk ƀộ bơto niam chài, đơs crih tamya kòn cau halà bơceh gơs ală bơta kuơ niam chài pa nàng drơng làng bol mờ ală jơi bơtiàn kòn cau in pơgồp bal mờ nhơl chờ mờ tơnguh khà dờp niam chài ai làng bol ală jơi bơtiàn kòn cau dùl êt nă cau in”.