“Ơ brah yàng! Ngai do, hìu bơnhă bol hi jơh nùs lơh yàng, dan hòi huềng kòn sau dê rê bal mờ să jan, rê wơl mờ hìu bơnhă. Tài tŭ lòt gùng, ờ bơtuah gơtìp gơ pừ, huềng gam gơ pơr wề tềng lơi ờ hềt rê. Hìu bơnhă pơ dơng iar, drăp tơrnờm, hòi dan Yàng sền gŏ, tề lam ai huềng in mhar rê wơl, gơ mut bal mờ să jan nàng sau in geh pràn kơldang, lơngăp lơngai. Ơ huềng lơi. Bañ hàm kờñ phan bơkah cau ndai dê, tài tàm hìu bơnhă neh geh wil tơl. Gờñ rê wơl tĕ mờ să jan cau tờm dê, nàng să jan mờ huềng nùs geh wil tơl”.

Hơ̆ là jơnau rac yàng bơh kra ƀòn – cau chài jak ngan ồng Ksor Lol dê, mat mờng hòi là ồng Sơ dê tàm hìu mè H’Guan tàm ƀòn Rbai, sàh Phú Thiện, càr Gia Lai. Jơnau rac yàng kung đơs loh jơnau bơh tài bơyai lơh yàng, hơ̆ là bi H’Guan tŭ lòt gùng ờ bơtuah gơtìp gơ pừ, huềng gam gơ pơr wề lòt lềng tềng lơi ờ hềt rê wơl, den tàng hìu bơnhă pơ dơng iar, drăp tơrnờm, hòi dan yàng sền gŏ, sơño io gùng, tề lam ai huềng in mhar rê wơl.

Dơ̆ lơh yàng geh bơyai lơh tàm gùl hìu rơng, phan pơ dơng lơh yàng geh 2 drăp tơrnờm, dùl nơm iar buh, 2 nơm bùm hồl geh rơndap ơn tàm đồng geh lă nha ju lir; rềp kềng hơ̆ là blah àu yau bơh H’Guan dê neh geh tŭ soh tŭ gơtìp rềs àr. Cau bơ jơu là kra ƀòn ồng Ksor Lol it dà tàm drăp tơrnờm ndăng, rac yàng ndăng. Tŭ drăp tơrnờm neh bềng, ồng Ksor Lol jàu ding bồp ai H’Guan in ñô. Tơnơ̆ tŭ ñô dùl bơngàn tơrnờm, H’Guan bè geh bơ tơl tai bơta pràn nùs nhơm, geh tai bơta pin dờn huềng neh rê wơl mờ he:

“Ngai do, hìu bơnhă bơyai lơh yàng nàng hòi huềng rê wơl mờ să jan, rê wơl mờ hìu bơnhă, mờ kung hòi dan să tờm in gơtùi pleh jơnau ờ bơtuah, gơtìp uă bơta bơtuah bơtuài mờ kis ring lơngai”.

Dơ̆ lơh yàng hòi huềng H’Guan in geh bơta sền gŏ bơh mè bèp mờ cau pròc mhàm tờm tàm hìu bơnhă dê. Tàm pơn jat tai jơnau rac yàng bơh kra ƀòn dê, mè H’Guan dê kung rac yàng nàng ai tơnggŏ bơta dờp huềng kòn ùr dê rê wơl. Mè H’Guan dê pà git, tơnơ̆ tŭ kòn ùr gơtìp rềs àr gùng lòt, sền gŏ gơ lơh ờ huan đơs, bồ tơngoh ờ iang. Jat jơnau kơlôi sơnơng cau Jarai dê, hơ̆ là tài huềng gơtìp pơr wề, den tàng hìu bơnhă lơh yàng jat bơhiàn bơh yau nàng kòn ùr in iang nùs, ai wơl bơta ring lơngai tàm nùs:

“Hìu bơnhă bơyai lơh yàng hòi huềng sau in. Pa do sau đì rơndeh gơtìp gơ pừ, jat bơhiàn bơh yau den pal lơh yàng nàng bơtrơh bơta ờ bơtuah mờ hòi huềng rê wơl, rơngòt huềng gam lòt lềng tiah ndai ờ hềt thàn rê wơl mờ să jan. Bol hi jà bơ jơu tus lơh yàng, hòi dan huềng in rê wơl mờ sau nàng sau in mhar pràn kơldang, ring lơngai”.

Ồng Nay Wih, mat mờng hòi là bèp H’Guan dê pà git, dơ̆ lơh yàng hòi huềng là bơhiàn bơh yau cau Jarai dê geh bơh jŏ rài ngan. Dơ̆ lơh yàng geh bơyai lơh dờng halà dềt gơ wèt tàm bơta aniai mờ cau gơtìp. Dilah mìng gơpừ halà sồt dồ êt, hìu bơnhă sùm lơh yàng dềt mờ dùl nơm iar, dùl drăp tơrnờm. Mơya tŭ cau pròc mhàm tờm gơtìp rềs àr kơn jơ̆ rlau den dơ̆ lơh yàng rơp geh lơh dờng rlau, geh dùl nơm be mờ dùl nơm sur. Be geh tề tus gah dà dờng nàng lơh yàng, geh gơtha ting bơ trơh bơta ờ bơtuah, ai sur bal mờ drăp tơrnờm geh lơh tàm hìu nàng kờñ hòi dan pràn kơldang, ring lơngai mhar gơ rê wơl ai cau gơtìp rềs àr in:

“Dơ̆ lơh yàng hòi huềng geh bơyai lơh nàng kờñ lam huềng rê wơl mờ să jan, rê wơl mờ hìu bơnhă. Bơhiàn lơh yàng do geh bơh rài mò pàng rài yau, prap gàr wơl tus tŭ do. Jat bơhiàn bơh yau, tŭ cau lơi ờ bơtuah gơtìp gơpừ rơndeh halà gơtìp jơnau ờ niam, hìu bơnhă rơp lơh yàng hòi huềng nàng huềng ờ lòt lềng hờ bơdìh, mhar rê wơl mờ cau tờm. Do là dùl bơta niam chài bơh yau kuơmàng ngan geh sền gàr bơh git nđờ rài do”.

Dơ̆ lơh yàng hòi huềng bơh cau Jarai dê là bơhiàn gah huềng nàng kờñ hòi huềng rê wơl mờ să jan, rơpua nùs tồr cau gơtìp rềs àr in. Tơl jơnau rac yàng, tơl phan pơ dơng lơh yàng ndrờm cèng bơta pin dờn tàm bơta bơrkuăt bal đah huềng mờ să jan, đah hìu bơnhă mờ brah yàng, đah kòn bơnus mờ trồ tiah, brê bơnơm.

Tŭ do, bơdìh mờ broă jun cau gơtìp rềs àr lòt sơm tàm anih kham sơm kòp, tơnơ̆ hơ̆ cau Jarai tàm Phú Thiện, càr Gia Lai kung gam lơh yàng do bè dùl bơta pin dờn gah huềng nàng tơl nă cau sơlơ kơnhăp cơnđuà lòt tềng đap ală bơta aniai gơlik geh tàm rài kis.