Tơryang tơryồng sơng ka sền gàr suơn bơkao tềng đăp hìu, bi Y Doan pà gĭt, rcang ai dơ̆ Sơntờm Dà lơgar 2/09, kòn cau Sơdàng ơm tàm ƀòn Kon Jong neh crăp rcang ală bơta nàng wă rò năc. Bơh tŭ lơh bal tơnggơs Mpồl lơh broă bal Lơh broă sa suơn sre drơng broă, lòt ngơl Ngọc Réo, làng bol neh gĭt sền gàr ù tiah ơm kis, ngui niam bơta niam chài ờs mờng bè cing mồng, đơs jơnau pơnđick, bơtàu tơnguh broă ƀĕ tơrnờm, tàñ ồi kòn cau, lơh ală phan sa jơi bơtiàn... drơng broă năc lòt nhơl in. Bi Y Doan chờ hờp đơs:‘Bol añ neh rcang crăp rcang tơl làm bè yăng tơrnờm, ală phan sa ờs mờng, phan hùc ai năc lòt nhơl tus tàm do lòt nhơl nàng sa. Bol añ crăp rcang drơng broă tơl làm nàng năc lòt nhơl in geh bơta nhơl chờ wil tơl tàm ngai Sơtờm Dà lơgar 2/09 ngan là geh bơta chờ hờp ngan rlau jơh, nàng tơnơ̆ do năc lòt  nhơl kah bè bol añ, năc lòt nhơl neh tus tàm do 1 dơ̆ rao, den rơ̆p tus tàm do dơ̆ 2, dơ̆ 3 tai..”.

Wă chờ hờp năc lòt nhơl, bi Y Hoa bal mờ ală oh mi tàm thôn neh bơka wơl tiah tăc phan lời kir sơnrai tàm tiah lòt nhơl dà croh Đăk Lôi. Tàm do geh li la uă ngan ală phan bơna OCOP tàm ƀòn lơgar dê, bè dà lơwe, ƀăng ro, kơphê... mờ ngan là tơrnờm ờs mờng- dùl phan bơkah pơn rơ tàm Kon Jong dê. Bi Y Hoa pà gĭt, bơh sơnrờp bi ƀĕ tơrnờm nàng tăc ai làng bol tàm tiah do in lơm. Tơnơ̆ hơ̆ ngai sơlơ geh uă cau dan blơi bơh tàm internet, den tiah lòt nhơl pờ geh, ƀĕ tơrnờm gơ gơs dùl broă lơh geh priă jền ai uă cau ùr tàm ƀòn in. Bi Y Hoa, Lam bồ Mpồl lơh broă bal ƀĕ tơrbờm Kon Jong chờ hờp yal: tơrnờm lơh bơh mbar jù bơh làng bol tàm ƀòn dê tam, ngui kañ nha brê, ai geh bơta ƀô bơkah is ồn lơh bơñul nùs nhơm cau dê ngan:“Nàng drơng broă niam ngan ai lòt nhơl in, añ ƀĕ tơrnờm jat broă lơh sền gàr bơta ƀô bơkah ờs mờng, gàr niam sàng goh phan ngui sa, geh mat kă bro, kơldung sền niam mat. Bơh ngai ƀĕ tơrnờm añ gŏ gơ ờ mìng cèng wơl bơta kwơ lơh sa lơm, bơh hơ̆ gơ hòi gơ jà ală oh mi tàm thôn lơh bal ƀĕ tơrnờm. Bol añ neh pờ ơnàng bă ù tam mbar jù là phan tờm nàng ƀĕ tơrnờm drơng broă năc lòt nhơl in”.

 Tàm tiah dà croh Đăk Lôi, sàh Ngọc Réo, geh uă nai lŭ dờng, 2 gah dà croh tờm chi brê glòm, nhơm sàng goh, lơngơm mrềt gùt nam, ù tiah niam ngan. Tiah do neh geh gơnoar atbồ ƀòn lơgar rơndăp ù tiah lơh tiah lòt nhơl mpồl bơtiàn. Mờ bơta dong kờl bơh Dà lơgar dê, làng bol bal mờ gơ̆p tơnggơs Mpồl lơh broă bal Broă lơh sa suơn sre drơng broă, lòt nhơl Ngọc Réo, bơ̆t gĭt nđờ jơ̆t nơm hìu rơnŭ mờ ală phan geh lài is tàm brê, pờ tiah ràng tăc phan bơna bơkah pơn rơ drơng năc lòt nhơl in.

Bi A Thảo, Ƀí thư Ci ƀộ thôn Kon Jong, pà gĭt, lòt nhơl mpồl bơtiàn gam pờ geh gùng lòt pa gơwèt mờ kòn cau Sơdàng dê. Tŭ do là Kwang lam bồ Mpồl lơh broă bal Broă lơh sa suơn sre drơng broă, lòt nhơl Ngọc Réo, bi A Thảo pà gĭt: lơh geh cồng nha dờng ngan rlau jơh bơh broă lơh do dê là dong làng bol rơ hời tam gơl bồ tơngoh kơlôi sơnơng, broă lơh, bơh rài kis pah ngai tus broă lơh sa:‘Ngan ngồn bè tàm ù tiah tàm thôn, añ lam ờng tờm bơkào, tờm geh mƀur mờ pà ai tơl hìu bơnhă in nàng tam jat kềng gah gùng mờ gùt dar ù tiah hìu bơnhă dê sơl. Tàm dà croh Đăk Lôi kung gàr sùm broă pơs wàs sàng goh, tam tờm chi, lơh hìu rơnŭ mờ dan mờ kấp hơđang dong kờl priă jền nàng bơt bơtàu phan bơna. Tus tŭ do làng bol tàm thôn tus bal lơh broă bal lơh lòt nhơl dà croh Đăk Lôi neh gơguh tus 20 nă cau tàm mpồl rao”.

Tus lòt nhơl mpồl bơtiàn dà croh Đăk Lôi di dơ̆ do, năc lòt nhơl geh tram să he mờ ù tiah brê bơnơm, sền gĭt niam chài, phan sa ờs mờng bơh làng bol kòn cau Sơdàng dê. Ù tiah brê bơnơm niam ngan mờ bơhiàn niam chài jơi bơtiàn krơi ngan gam dong kòn cau Sơdàng tàm Kon Jong, Ngọc Réo, càr Quảng Ngãi, rơ hời geh rài kis hờm ram.