Jăt Anih tờm Dong kờl bơto pơlam lơh broă sa dà lơgar dê yal, rơndăp broă lơh tơrlòng lài “Tơnguh uă cồng nha lơh broă dong kờl bơto pơlam lơh broă sa jăt tàm broă pồ tơl cau tàm mpồl dong kờl bơto pơlam lơh broă sa ƀòn lơgar” geh anih tờm do lơh tàm nam 2021, tàm 13 càr gơwèt 5 tiah tam. Cồng nha neh lơh geh 26 mpồl dong kờl bơto pơlam lơh broă sa ƀòn lơgar, tàm hơ̆ geh 8 mpồl tàm Tây Nguyên.

Tơnơ̆ mờr 1 nam lơh broă, ală mpồl dong kờl bơto pơlam lơh broă sa ƀòn lơgar sền bal neh lơh jăt niam geh gơnoar broă he dê tàm broă lơh gơs tiah tam kơphê kơ̆ kơl jăp jŏ jòng, bơto yal bơta gĭt wă jak chài pa, măy mok ai cau lơh broă sa in, tus bal tàm mpồl rơndăp lơh wơl lơh sa, bơtơl bơta gĭt wă lơh sa drà kă bro ala tài wèt tus tam phan. Ală cau ala măt neh sồr geh bàr pe broă lơh nàng tơnguh uă cồng nha lơh broă bơh mpồl dê, bè tơnguh tai mpồl bơtiàn lơh bal lơh broă dong kờl bơto pơlam lơh broă sa, Anih tờm Dong kờl bơto pơlam lơh broă sa dà lơgar pơn jăt tai pờ ală ơdŭ bơto pơlam tơnguh uă bơta pràn jak ală cau bơh mpồl dong kờl bơto pơlam lơh broă sa in, ngan là bè ală tơngume gơrềng tus lơh sa bal, bơtàu tơnguh hợp tak xã, lơh bal ală broă lơh mờ tam gơl sồ.