Nam 2022, Ủy ƀan Ñân zân càr Kon Tum bơyai lơh dơ̆ jờng rơ pà sră chờ hờp Dà lơgar “Nghệ ñân ưu tú” tàm gah phan lời wơl niam chài ờ di phan bơna gơwèt mờ 15 nă nghệ ñân. Là dùl tàm 15 nă nghệ ñân geh dờp sră jờng rơ chờ hờp Dà lơgar “Nghệ ñân ưu tú” dơ̆ do, tềng đap nam pa 2023, ồng A Blung, 73 sơnam, ơm tàm ƀòn Kon Pao Kla, xã Đăk Pxi, kơnhoàl Đăk Hà đơs: “Añ chờ hờp ngan mờ ưn ngài geh Củ tịc lơgar lơh nền pà sră jờng rơ “Nghệ ñân ưu tú”. Tơnơ̆ do dilah gam pràn kơl dang, nam 2023 añ geh pơn jat tai mblàng yal wơl ai làng bol mờ ală oh kòn kòn sau tàm thôn, ƀòn in gĭt ngui cing mồng, tam ya xoang. Bol he pal gĭt sền dờng màng, prap gàr bơta niam chài bơh yau niam bơnĕ bơh bèp, ồng he dê lời wơl, bañ lời gơbàn roh tĕ. Tàm ală ngai chờ bol he pal ngui sùm cing mồng, tam ya xoang den hơ̆ sồng prap gàr bơhiàn niam bơnĕ niam chài jơi bơtiàn kòn cau dê, làng bol hơ̆ sồng geh nùs nhơm chờ hờp”.

Tàm dơ̆ jào khà pơn jờng “Cau chài ưu tú” tàm gah phan lời wơl chài rơgơi ờ di phan bơna dơ̆ III nam 2022, càr Lâm Đồng geh 6 nă cau chài geh jào pà khà pơn jờng do. Ală cau chài do geh uă broă lơh pơgồp bal lơh tàm broă prăp gàr, ngui bơta niam chài rơgơi ờs mờng bơh làng bol kòn cau K’Ho, Mạ, Chru. Cau chài Điểu K’ Bôi, kis tàm xã Đồng Nai Thượng, kơnhoàl Cát Tiên, do là dùl tàm 6 nă cau chài geh jào pà khà pơn jờng “Cau chài ưu tú” dơ̆ do pà git: “Să tờm añ pa geh Đảng, Dà lơgar jào pà khà pơn jờng pơnyờ să bơh Dà lơgar bè cau chài ưu tú, den tàng añ pơnyờ să ngan mờ ưn ngài Đảng, Dà lơgar. Añ hơ geh pơn jăt tai lơh ngan nàng prăp gàr, ngui ală bơta kwơ chài rơgơi ờs mờng bơh kòn cau Mạ dê. Tàm rài kis pah ngai, añ sùm bơto sồr làng bol git tàm broă lơh sa nàng brồ guh, nàng rài kis geh hờm ram, tơl ngui tơl sa. Bŭ lah rài kis geh tơnguh bơtàu sùm, mơya ală bơta chài rơgơi ờs mờng làng bol kòn cau dê kung gam pal sùm geh prăp gàr mờ lơh ngan bơto rơnàng kơnòm să in”.

Tàm nam 2022, càr Gia Lai chờ hờp bơyai lơh dơ̆ tơngkah kir sơn rai 90 nam crơng gơs càr. Tàm ală broă lơh tờm den ală mpồl dròng cing jañ mồng, nghệ nân tàñ phan, tàñ ồi... gơlơh bè “geh kàl tơnhào” mờ ală dơ̆ bơyai lơh sền niam ngan, chài ngan nàng drơng broă năc lòt nhơl in tŭ tus mờ càr Gia Lai. Bi Gơnh, ơm tàm ƀòn Ktu, xã Kon Chiêng, kơnhoàl Mang Yang đơs:  “Nam 2022, càr bơyai lơh dơ̆ tơngkah kir sơn rai 90 nam crơng gơs càr Gia Lai, geh uă broă lơh niam chài geh kwơ ngan, bè bơyai lơh dơ̆ lơh chờ dròng cing jañ mồng, bơyai lơh ală broă tàñ phan... añ kờñ ngan ală broă do. Do kung là dơ̆ nàng làng bol lam gùt ƀòn lơgar tơrgùm tìp mat bal, lơh kuèng bal, lùp bơsram bal mờ gơ̆p ală bơta niam tàm rài kis. Bơta do geh dong ai rơnàng kơnòm să in gĭt kờñ gơboh, prap gàr bơta kwơ niam chài bơh yau bơh jơi bơtiàn kòn cau tàm rài tơnơ̆ dê”.   

Lŏ Bloi, dùl nă cau chài tàñ ồi yau kis tàm ƀòn Chuet 2, sơnah ƀòn Thắng Lợi, ƀòn dờng Pleiku, càr Gia Lai sùm lơh ngan prăp gàr broă tàñ ồi yau kòn cau Jarai dê. Lŏ Bloi pơnyờ să ngan tài să tờm là dùl tàm ală cau gam kơnòm git mờ gam tàñ ồi yau sùm ờs mờng kòn cau dê: “Nàng tàñ gơs ồi yau, pal bơsram jăt mò, jăt mè neh bơto. Rơcang sền mò mờ mè tàñ nàng prăp gàr bơta chài rơgơi ờs mờng ồi yau bơh mò pàng lời wơl. Kơ̆p kờñ oh kòn, kòn sao rơnàng tơnơ̆ do, bol khi bañ sơbì, bañ huĭ mờ prăp gàr wơl bơta niam chài rơgơi kòn cau he dê. Mơya sền bè gah lơh sa den priă tăc ờ geh uă, bơta kwơ màng rơlao là nùs nhơm gơboh kờñ mờ broă tàñ nàng lời wơl bơta chài rơgơi kòn cau dê, kờñ bơto ai oh kòn kòn sau tơnơ̆ do in nàng git tàñ, kơ̆p kờñ ngan oh kòn bañ lơh roh bơta niam chài he dê”.