VOV4.K’ho- Sa tềp Trung thu geh lơh tàm nhai 8 nam he pah nam là dơ̆ lơh chờ lời ai kơnòm dềt in, mơya kung geh uă kơ̆p gơn sơl. Do ờ mìng là tŭ nàng kơnòm dềt in geh khăt gơboh nhơl chờ hờp mờ ală bơta phan nhơl, jơnau nhơl, bè: Đèng gŭ sơrmañ, tiến sĩ pơ àr, phan srồm muh mat klìu triă, tam ya đang grài tàm mang chờ àng kơnhai ndar me...mờ gam là tŭ nàng ală cau tàm tơl hìu bơnhă Việt Nam ơm lềr wềl bal nàng sa ală ƀañ trung thu bơkah lơngồt ngan. Gơtùi đơs, tơl tiah tàm jơh gùt lơgar geh dùl broă lơh sa tềp Trung thu krơi is mơya niam bơnĕ krơi is ngan rlau jơh pal yal tus broă mờ làng bol càr Tuyên Quang bơyai lơh mờ wă rò Trung thu pah nam.

Ờ gŏ di mìng bàr ngai 14 mờ 15 àng kơnhai ndar me nhai phàm lơm, Dơ̆ lơh chờ Tiah Tuyên neh ngan ngồn geh lơh bơh ngai 04/09 tây tàm càr Tuyên Quang bal mờ uă broă lơh niam chài niam bơnĕ krơi is ngan, bềng bơta lơh gơkờñ ngan cau. Tàm sùm uă poh do, mang lơi ală oh tàm càr Tuyên Quang kung geh hàu tềng ală rơndeh bơka rùp đèng trung thu niam bơnĕ krơi is ngan lòt rò mờ jun lòt pơndik lòt pơdar ală gơl gùng tờm bơh ƀòn dờng dê. Geh driau dờng, tam ya jăt săp ntas pờ jơnau đơs crih tàm ală rơndeh bơka gơklŏ gơcrà ngan rùp să, geh tus bal nhơl ală phan nhơl wèt tus mang chờ àng kơnhai ndar me, ală oh dềt cau lơi cau hơ̆ ndrờm kờñ ngan, chờ hờp chờ hờñ ngan.

Nam do mpồl kòn dê lơh rơndeh rùp mòn đăng grài, kòn kờñ ngan geh lòt tàm rơndeh bơka rùp lòt làm gùt ƀòn dờng sền ală rùp niam, kòn gơlơh kờñ ngan. Nam do, kòn geh lòt 6 dơ̆ tàm rơndeh bơka rùp lòt làm gùt ƀòn dờng do.

Ai do là jơnau đơs bơh dùl nă oh dềt ndai dê: Ƀòn kòn dê nam do lơh rơndeh bơka rùp ka cĕp tam gơl să gơ gơs đăng grài. Do là dơ̆ 2 kòn geh hàu tềng rơndeh bơka rùp do, ală rơndeh bơka rùp mòn niam ngan kờñ ngan, kòn kờñ nam do uă cau jờng rơ rơndeh bơka rùp mòn ƀòn kòn dê.

Rơndeh bơka rùp mòn đăng grài lòt pơdar tàm gùng

Ală rơndeh bơka rùp mòn đèng trung thu geh làng bol bơceh lơh ai bơh jơnau gơdan bơh rùp pơrya tàm ală jơnau yal yau kah yau, yal yau bơh rài yau mờ bơh bơta geh ngan tàm rài kis, lơh broă lơh sa bơh làng bol dê tàm tơl tŭ tơngai kah yau, bè: Đăng grài biàng lòt nhơl chờ Tiah Tuyên, Bàr nơm Rơmis lòt nhơl chờ, Ka Cĕp tam gơl să gơ gơs đăng grài, ñô bau ùr bơkau đe dê, sềm klàng sơngơr lơngô...Uă rơndeh bơka rùp mòn geh ngui bơta jak chài măy mok pa rài do dê mơkung gam sền gàr geh bơhiàn niam chài krơi is bơh yau bơh ƀòn lơgar tờm Tuyên Quang mờ jơi bơtiàn Việt Nam dê. Tơl broă lơh cèng bơta gơtha mờ làng bol ơn pơyua tàm hơ̆, hơ̆ là kơ̆p kờñ kơnòm dềt- ală ƀang pa bŭt cau rài tơnơ̆ do gĭt wă geh jơnau kah yau, bơsram ồng pàng bơ̆t bơtàu dà lơgar.

Rơndeh bơka rùp mòn bơh mpồl dùl sơnah ƀòn Tân Quang dê là jơi nòi Lạc Hồng, rơndeh bơka rùp mòn geh bơta gơtha nàng ai kơnòm dềt in gĭt geh nggu rơyas là kòn đang grài sau gơnrơh dê, kơ̆p kờñ ală kòn cơnđòa lòt jăt rơnàng ồng pàng he dê nàng dà lơgar sơlơ pas sơlơ pràn bơtàu tơnguh rlau tai.

Rơndeh bơka rùp mòn bơh bol añ dê là rơndeh bơka rùp mòn ƀòn lơgar, tài bơh bol he tŭ do gam tơrgùm tàm lơh broă sa sươn sre, cau lơh broă sa mờ ƀòn lơgar, geh ngui măy mok 4.0 nàng ai ngui tàm sươn sre, lơh bè lơi nàng dong tă bơta pràn lơh broă, mờ cồng lơh geh gơguh uă rlau tai. Jăt tàm bơta hơ̆, bol añ kờñ rơnàng kơnòm să gĭt dà kơlhề bơh ală cau lòt lài dê, lơh geh bơta pin dờn ai rơnàng kơnòm să in, geh rài tơnơ̆ pa nàng oh kòn kòn sau in tŭ dờng kah tus ală gar phe neh ròng siam nàng tih dờng, nàng bơtàu tơnguh tus bơta pa.

Bal mờ rơndeh bơka rùp mòn đèng trung thu lòt pơdar tàm gùng gùt dar ƀòn dờng, làng bol soh ală phan bơh ală kòn cau dê, bal mờ gơ̆p tam ya lơh gơs rài kis nùs nhơm duh hồl ngan. Uă làng bol đơs là bơta do tơngŏ bơta tam klăc bal đah ală jơi bơtiàn kòn cau ơm kis bal tàm bă ù Tiah Tuyên. Mò Phùng Thị Hoan ơm tàm mpồl 15, sơnah ƀòn Tân Quang, ƀòn dờng Tuyên Quang, pà gĭt: Añ soh phan kòn cau Mèo. Do là phan soh cau Thái dê. Oh mi cau ùr ndrờm soh phan kòn cau lơm, tơl mpồl, tơl sơnah ƀòn ndrờm geh rùp să krơi is, bol añ soh phan kòn cau ala măt ai ală jơi bơtiàn kòn cau càr Tuyên Quang in, kơ̆p kờñ càr Tuyên Quang sùm prăp gàr geh bơta tam klăc bal mờ gơ̆p ai càr ngai sơlơ pas sơm pràn kơldang.

Rơndeh bơka rùp mòm ka cĕp lòt pơdar tàm gùng lơh kơnòm dềt mờ năc lòt nhơl kờñ ngan

Ală ngai do, gal ngan năc lòt nhơl bơh làm gùt ù tiah Dà lơgar tus mờ ƀòn dờng Tuyên Quang nàng tus bal dơ̆ lơh chờ mờ sa ală phan sa bơkah pơnrơ ngan bơh tiah do dê. Ală rùp mòn geh rùp să, dờng dềt, huềng nùs gơlơh bè ngan ngồn ngan neh lơh gơkờñ ngan ờ mìng mờ kơnòm dềt lơm mờ gam lơh geh bơta kah kờñ uă ngan gơwèt mờ năc lòt nhơl: Lòt tus Tuyên Quang gŏ gơlơh rài kis nùs nhơm duh hồl hô hơng ngan bơh dơ̆ lơh chờ dê, gơlơh nrơ̆t ndơl ngan broă lơh dờng ngan bơh broă lơh dê. Ală rùp mòn li la ngan, bơh ală rùp mòn rềp mềl mờ bơhiàn ờs mờng bơh yau bè ka cĕp, đèng gŭ, halà rùp mòn đang grài, rùp mòn đềt mềr mờ làng bol rài yau bơh ñô bau đe dê, he hơ̆ sồng gŏ làng bol tàm Tuyên Quang jơh tơl nă cau sền gàr mờ prăp gàr niam ngan bơhiàn kwơmàng bơh jơi bơtiàn dê, dơ̆ lơh chờ trung thu geh làng bol sền gròi tus den añ kơlôi là jơh tơl nă cau sền gròi ngan tus kơnòm dềt.

Uă hìu bơnhă neh lam kòn dềt tus nàng sền bè trung thu ờs mờng bơh yau bơh kòn cau dê tàm ƀòn dờng Tuyên Quang, dơ̆ lơh chờ mờ ờ huan ngan geh tàm tiah ndai. Bi Nguyễn Thị Thu Trang ơm tàm Hải Phòng mờ ală kòn yal: Lòt nhơl Trung thu Tuyên Quang, oh gŏ kòn dềt kờñ ngan kơ̆p gơn ngan chờ hờp chờ hờñ ngan, trung thu cau dờng lời ai ală oh dềt in, ngan ngồn geh tŭ añ geh lòt nhơl tàm Tuyên Quang tàm dơ̆ trung thu, nàng ală kòn in kung geh sơl kir sơnrai, rê nàng yal ai ală bơyô dùl nrơh rơnàng bal in tàm Hải Phòng.

Nùs nhơm bơh Dơ̆ lơh chờ Tiah Tuyên nggồr nggàc duh hồl hô hơng ngan làm gùt gùng drà sơnah ƀòn, bềng lìu rùp să, săp ntas gùng đơs crih ngai chờ dê- dùl bơhiàn niam chài niam bơnĕ krơi is ngan, pơgồp bơnah nàng Tuyên Quang yal tơngĭt mờ làng bol in bal mờ năc lòt nhơl bơh tàm lơgar mờ lơgar ndai in bè ù tiah ƀòn lơgar, kòn bơnus mờ kwơmàng là ală bơta kwơ niam chài, kah yau, bơhiàn ờs mờng bơh yau bơh ƀòn lơgar kăc màng dê.

Cau cih VOV1- Cau mblàng Lơ Mu K’Yến