Neh uă dơ̆ lơh cau tờm lơh yàng bơyai lơh dơ̆ lơh yàng dờp lơh mè mờ kòn ròng, ồng Sên dê ơm tàm ƀòn Tơng Jŭ, sơnah ƀòn Ea Kao, càr Dăk Lăk pà git: Dơ̆ lơh yàng dờp lơh mè mờ kòn ròng bơh cau Rơđê dê là bơhiàn cèng gơtha niam chài kòn bơnus, cèng bơta kuơ bơto bơtê mpồl bơtiàn, tŭ 2 nă cau krơi sơ ƀơi tàm bơrkuăt wơl gơs mè mờ kòn dùl hìu. Bơhiàn lơh yàng dờp lơh mè mờ kòn ròng pal geh rơcang lài nền nòn, wil tơl mờ geh lơh yŭ rơyùm: “Lơh yàng dờp lơh bèp mờ kòn ròng, mè mờ kòn ròng bơh kòn cau Rơđê dê den lài ngan bơdìh mờ bơta geh mat bơh jơi nòi 2 gah dê kờñ pal geh ală cau wă wờng bè bơhiàn bơh yau, bơhiàn lơh yàng nàng mblàng git loh mờ lơh loh rlau tai bè bơta gơ rềng bơh bơhiàn do dê kung bè kơnòl bơh jơh bal 2 gah dê tơnơ̆ tŭ dờp lơh mè mờ kòn, geh bè hơ̆ den hơ̆ sồng gơtùi dong 2 gah tàm bơrkuăt bal jŏ jòng”.

Tŭ do, bơhiàn lơh yàng dờp lơh mè mờ kòn ròng bơh cau Rơđê dê kung gam geh lơh sơl. Phan pơdơng lơh yàng kung ờ duh pal uă ir, geh sur dềt, iar dam, dùl drăp tơrnờm mờ 2 nơm kòng lơngô tơn dò tê nàng lơh phan kir sơnrai 2 đah in. Dilah cau geh dờp lơh mè mờ kòn ròng gơtìp kal ke, mờ kung gam kờñ dờp lơh mè mờ kòn ròng mờ nùs nhơm niam den kung gam gơtùi bơyai lơh yàng dờp lơh mè mờ kòn ròng, mìng kờñ jà ñô tơrnờm wil tơl jơi nòi 2 gah mờ geh cau lơh cơng, ờ duh pal geh phan pơ dơng lơh yàng uă.

Tŭ ồng Sên dê ala mat jơi nòi yal bơr: “Dơ̆ lơh yàng dờp lơh mè mờ kòn ròng neh geh lơh tềng đap bơta sền gŏ bơh 2 đah hìu bơnhă dê, cau dờp lơh kòn ròng ntàu ai bơngàn tơrnờm bơh cau ala mat nàng jà cau ùr dờp lơh mè ròng, ai tơnggŏ bơta ki ngàm. Pơn jat hơ̆, cau kòn jà ñô tơrnờm ală cau pơn jat tai tàm jơi nòi.

Jat bơhiàn bơh yau cau Rơđê dê, cau geh dờp lơh kòn ròng rơp geh dờp ală bơta kuơ bè nùs nhơm mờ phan bơna. Bal mờ hơ̆, cau dờp lơh kòn ròng kung rơp geh kơnòl gơ wèt mờ mè bèp ròng, halà oh mi ròng he dê. Cau mè ròng pal geh kơnòl bơto tơngkah, kờñ gơboh mờ sền gròi kòn ròng. Sơ lơŭ wơl, kòn ròng kung pal git ki ngàm, ròng siam mè bèp.

Mè H’Ước dê, ơm tàm ƀòn Tơng Jŭ, sơnah ƀòn Ea Kao, càr Dăk Lăk pà git: “Tŭ he dờp lơh kòn ròng den he sền mè bèp ròng kung bè mè bèp tờm he dê sơl. Tơl bơta chờ hờp, moat jrùm, bòl glar, kal ke tàm rài kis ndrờm tam pà bal mờ gơp. Mè bèp gơtìp kòp jê de oh kòn pal geh kơnòl sền gròi, kơlôi rơcang, tàm hìu bơnhă gơlik geh broă lơi den kung pal tàm pà bal, geh kơnòl ndrờm bal. Bè hơ̆ den tàng tŭ 2 gah dờp lơh mè mờ kòn ròng den ndrờm geh cau ala mat bơh jơi nòi dê sền gŏ, kung bè là cau yal tơn ală jơnau hơ pơrgon bơh 2 gah dê nàng ring bal mờ gơp, hơ̆ là bơta kuơmàng ngan rlau jơh”.

Jat bơhiàn bơh yau cau Rơđê dê, cau geh dờp lơh kòn ròng gơ gơs là cau pròc mhàm bal, bè mè tờm, kòn tờm, kis jŏ geh gơp, bòl glar, chờ hờp bal mờ gơp, tàm kờñ gơboh, tàm dong kờl tŭ kal ke. Nàng gơtùi lơh bơta do, pal geh gơnoar broă bơh cau tờm lơh yàng dê. Ồng Sên dê ơm tàm sơnah ƀòn Ea Kao, càr Dăk Lăk pà git: “Dilah tơnơ̆ neh lơh bơhiàn lơh yàng dờp lơh mè mờ kòn ròng mờ dùl tàm 2 gah ờ gam kờñ geh bơta tàm bơrkuăt tai, kung bè kờñ sang tĕ jơnau hơ pơrgon lơh mè mờ kòn ròng den gah lơi tìs den gah hơ̆ rơp pal kong kơnòl lis cràs gah gam wơl in. Tŭ do, cau tờm lơh yàng bè bol hi pal mblàng lơh loh nàng 2 gah in wă wờng mờ ală broă lis cràs, bơdìh mờ ală jơnau hơ pơrgon bơh 2 gah dê den dilah gah lơi lơh tìs pal kong dùl nơm sur nàng lis cràs lài ală cau lòt sền in, ngan là ală cau tờm lơh yàng bè bol hi”.

Bơhiàn lơh yàng dờp lơh mè mờ kòn ròng bơh cau Rơđê dê là dang che tàm bơrkuăt bal ƀòn lơgar, sơlơ tơrbŏ kơ̆ nùs nhơm đah ală cau krơi sơ ƀơi gơ gơs cau pròc mhàm tờm dùl hìu. Tàm rài kis tam gơl pa, bulah lơh yàng dờp lơh mè mờ kòn ròng digơlan ƀuơn rlau bè broă bơyai lơh, mơya jơnau gơtha dờng màng bè nùs nhơm, kơnòl mờ bơta tàm bơrkuăt kung gam geh sền gàr mờ ngui niam, gơ gơs dùl bơta niam chài kờñ pal geh sền gàr mờ ki ngàm.