Do là dùl tàm uă broă lơh bơh ƀòn dờng Kon Tum dê nàng chờ gờm di tơnkah 110 nam ngai crơng gơs càr Kon Tum ngai (09/02). Tơnơ̆ mờ dơ̆ sơn đờm, cau năc bal mờ làng bol geh sền bơnah soh phan yau ờs mờng tờm bơh 7 jơi bơtiàn kòn cau càr Kon Tum dê, tàm hơ̆ geh: Sơdàng, Bahnar, Jeh Triêng, Jarai, Rơmăm mờ Hrê.

Bal mờ hơ̆ là bơnah tơlik soh phan yau ờs mờng tàm rài kis bè ờs mờ phan soh kòn cau geh lơh pa. Mpồl bơyai lơh neh jà 38 nă cau chài jăk ngan tus bơh 10 xã, sơnah ƀòn tàm ƀòn dờng Kon Tum geh tus bal lơh ală bơnah broă tàm broă tàñ yau. Kung di tàm dơ̆ do, UɃÑZ ƀòn dờng Kon Tum neh tơlik măt Ƀòn nhơl chờ mpồl bơtiàn Kon Jơ Dri, xã Đăk Rơ Wa. Do là ƀòn nhơl chờ mpồl bơtiàn dơ̆ pe tàm ƀòn dờng Kon Tum dê.