Jat jơnau yal bơh Ƀộ Văn hóa- Thể thao mờ Zu lịc dê, tus tŭ do, neh geh 51 hìu sền sră kâp càr, 541 hìu sền sră kâp kơnhoàl mờ mờr 2 rbô 200 hìu sền sră kâp xã tàm ală càr, ƀòn dờng geh làng bol jơi bơtiàn kòn cau dùl êt nă cau ơm kis tŭ do geh ală bơta sră 2 dà đơs mờ dà kòn cau- dà yoan. Kuơmàng, uă hìu sền sră neh lơh ngan lơh gơs sồ sră nggal mờ dà đơs kòn cau nàng prap gàr jŏ jòng, bè: Hìu sền sră càr Yên Bái neh lơh gơs sồ 100% sră nggal mờ dà kòn cau; Hìu sền sră càr Sơn la geh rlau 1 rbô pang sră mờ dà Thái yau, lơh gơs sồ geh rlau 23 rbô pang sră nggal mờ dà kòn cau; Hìu sền sră drơng làng bol in bơdìh dà lơgar tàm ală hìu yàng Phờk Khmer bơyai lơh drơng sră nggal mờ dà kòn cau ai làng bol kòn cau Khmer ală càr, ƀòn dờng tiah đah jum dà lơgar in.

Tŭ do, tàm ală càr, ƀòn dờng, dà đơs mờ akhar cih bơh uă jơi bơtiàn kòn cau dùl êt nă cau dê bulah geh dờp mơya mìng geh ngui uă tàm dùl khà êt lơm, geh uă cau jơi bơtiàn kòn cau dùl êt nă cau ờ geh tŭ niam nàng ngui dà đơs kòn cau he dê. Den tàng, prap gàr, ngui niam dà đơs, akhar cih ală jơi bơtiàn kòn cau dùl êt nă cau dê ờ di là broă bơh mìng is dùl nă cau lơi dê, mờ kờñ pal geh bơta pơgồp bal bơh gùt mpồl bơtiàn dê. Bè hơ̆ den tàng, tơngai lài, uă càr, ƀòn dờng neh geh ală broă lơh geh cồng nha. Pơn rơ bè càr Khánh Hòa pờ ơdŭ bơsram dà đơs, akhar cih bơh cau Rơlgai ai kwang bàng, công chức, viên chức in; càr Phú Thọ prap gàr dà đơs, akhar cih bơh làng bol jơi bơtiàn kòn cau dùl êt nă cau dê bơh broă bơto ală jơnau đơs crih, ală gùng đơs pơnđik, ală jơnau nhơl ñŏ bơh yau kòn cau dê; halà bè càr Ninh Thuận kơlôi sơnơng, jòi tơrgùm, cih sră mờ akhar cau Prum, lam lơh jàu dờp Thư tịch yau kòn cau Prum mờ geh Anih tờm prap gàr dà lơgar 2 ƀòn dờng Hồ Chí Minh lơh niam wơl, lơh gơs sồ.

Bi Bhling Thị Tuyền ơm tàm xã Cà Dy, kơnhoàl Nam Giang, càr Quảng Nam là kòn cau Cơ Tu neh geh tŭ tus bal ơdŭ bơto pơlam đơs nền, tàm ală ơdŭ bơsram, cau bơsram geh ală cau jak chài, cau atbồ mờ nghệ ñân bơto wơl mờ pơlam bè bơta chài đơs, bơta chài cih dà đơs kòn cau he dê. Bơta do ngan ngồn geh kuơ gơ wèt mờ làng bol kòn cau: “Tus bal ơdŭ bơto pơlam añ chờ hờp mờ pơn iờ să ngan. Do là dơ̆ sơn rờp añ geh tus bal bơto pơlam bè prap gàr dà đơs, akhar cih kòn cau Cơ Tu he dê. Kung bè uă ngan làng bol tàm xã Cà Dy, añ mìng git đơs ờ hềt git akhar cih. Kơp kờñ do geh là tŭ niam nàng añ jòi git mờ bơsram uă rlau tai bè akhar cih kòn cau Cơ Tu he dê đơs is mờ niam chài bơh yau kòn cau dê đơs bal”.

Bal mờ hơ̆, Ƀộ Giáo zụk mờ Đào tạo kung neh geh uă broă lơh nàng rề ơnàng broă lam lơh, tơnguh bơta niam bơto dà đơs jơi bơtiàn kòn cau dùl êt nă cau tàm hìu bơsram. Tŭ do, gùt lơgar geh 6 dà đơs jơi bơtiàn kòn cau dùl êt nă cau geh lam lơh bơto ngan ngồn tàm hìu bơsram, geh: dà kòn cau Mông, dà kòn cau Rơđê, dà kòn cau Jrai, Bahnar, Prum mờ dà kòn cau Khmer tàm 21 càr, ƀòn dờng gơ wèt dà lơgar. Pah nam, geh mờr 600 hìu bơsram mờ 4 rbô 500 ơdŭ bơsram mờ rlau 110 rbô nă kơnòm bơsram geh bơsram dà đơs jơi bơtiàn kòn cau dùl êt nă cau. Kuơmàng, broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030 geh tai priă jền drơng ai broă prap gàr dà đơs, akhar cih ală jơi bơtiàn kòn cau dùl êt nă cau.

Jat ồng Trần Mạnh Hùng, Phó kwang atbồ Vụ niam chài kòn cau (Ƀộ Văn hóa, Thể thao mờ Zu lịc) pà git, tŭ do, ală càr, ƀòn dờng tàm gùt lơgar neh pờ uă ơdŭ bơsram bè broă lơh prap gàr dà đơs, akhar cih ai làng bol jơi bơtiàn kòn cau dùl êt nă cau in, tàm hơ̆ geh ală cau kra ƀòn, cau atbồ ƀòn kung bè cau geh bơngă pin dờn tàm mpồl bơtiàn. Ală ơdŭ bơto pơlam bè prap gàr dà đơs, akhar cih ờ mìng là broă lơh geh kuơ nàng tơnguh jơnau git wă bơh ală kâp gơnoar atbồ mờ làng bol dê bè bơta kuơ niam chài bơh yau bơh ală jơi bơtiàn kòn cau dê mờ gam nàng drơng rài kis pah ngai, pơgồp bơnah bơtàu tơnguh lơh sa- mpồl bơtiàn tàm ƀòn lơgar: “Broă pờ ală ơdŭ bơto pơlam là broă lơh bè prap gàr niam chài bơh yau tàm gùt lơgar gơ wèt mờ ală tiah geh làng bol jơi bơtiàn kòn cau dùl êt nă cau. Vụ niam chài kòn cau kơp kờñ do geh là bơnàng jă, cèng bơta sơn đờm ai bơta tàm pơgồp bal đah dà lơgar mờ kâp hơ đơm nàng kờñ lơh bè lơi prap gàr niam chài ală jơi bơtiàn kòn cau dùl bă geh cồng nha ngan rlau jơh”.

Bè hơ̆, bơh ală bơta lơh ngan tàm gah niam chài neh lơh gơlik bơta niam nàng dà đơs, akhar cih bơh ală jơi bơtiàn kòn cau dùl êt nă cau dê geh ngui uă rlau tàm rài kis mpồl bơtiàn, pơgồp bơnah lơh jat Nghị quyết Đảng dà lơgar dơ̆ 5, khoă 13 bè bơt bơtàu mờ bơtàu tơnguh niam chài Việt Nam gơguh jak, cèng bơta niam chài krơi is jơi bơtiàn kòn cau dê.