Hìu bơsram Kòn cau ơm tơn tàm hìu bơsram kơnhoàl Tu Mơ Rông, càr Kon Tum geh 372 nă kơnòm bơsram, jơh ală là oh kòn kòn cau Sơdàng dê. Bơh uă nam do, Mpồl Kwang ătbồ hìu bơsram neh pơgồp bal mờ ală cau chài bơto wơl dròng cing tam ya xoang ai kơnòm bơsram in. Tus bal tàm mpồl tam ya xoang hìu bơsram dê, oh Y Khin, kơnòm bơsram ơdŭ 11, pà gĭt: Bol oh lời tŭ jiơ là trồ mang. Trồ mang bơsram, bol oh bơsram pe dơ̆. Cau chài neh bơto den bol oh bơsram. Bol oh chờ hờp ngan tŭ geh bơsram dròng cing jañ mồng mờ tam ya xoang bal mờ gơ̆p.

Nàng kơnòm bơsram geh tŭ niam bơsram nàng gĭt, tơnguh tai nùs nhơm pơñiờ să mờ bơta niam chài bơh yau jơi bơtiàn he dê, Mpồl Kwang ătbồ Hìu bơsram Kòn cau ơm sa tơn kơnhoàl Tu Mơ Rông jà kơnòm bơsram tus bal tàm ală dơ̆ pơrlòng, dơ̆ bơyai lơh dròng cing mồng, mơkung ai tơl ală bơta nàng ală oh in lòt sền ngan ngồn tàm dơ̆ lơh chờ bơh yau bơh uă jơi bơtiàn kòn cau oh mi dê. Klau pơnu Văn Trọng Lưu, Kwang ătbồ Hìu bơsram đơs nền cồng nha bơh broă ai cing mồng mờ tam ya xoang bơto tàm hìu bơsram bè do: Broă bơyo bơh cau chài dê ai ală kơnòm bơsram in gơ là ƀươn ngan tài bơh khi bơto ală oh kòn khi dê in, khi bơto jăt tàm bơta chài mờ bơhiàn niam chài is bơh khi dê den tàng là geh cồng nha ngan. Cing mồng- tam ya xoang gơ gơs là broă lơh sùm bơh hìu bơsram dê nàng kờñ prăp gàr mờ ngui niam bơta kwơ cing mồng mờ tam ya xoang, lơh mpồl cau tờm nàng tus bal tàm ală dơ̆ lơh chờ tàm do.

Bal mờ bơta pơlam gùng, dong kờl, bơcri priă bơh ală kâp gơnoar ătbồ mờ gah niam chài dê, tus tŭ do, làng bol ală jơi bơtiàn dùl êt nă cau bơh càr Kon Tum dê neh prăp gàr geh 2 rbô 500 bòr cing mồng; pờ gĭt nđờ rhiang ơdŭ bơto dròng cing mồng, lơh niam wơl cing; ală jơnau cing yau geh kŭp săp mờ prăp gàr; lơh wơl gĭt nđờ rhiang hìu rông; jòi tơrgùm mờ lơh wơl 16 dơ̆ lơh yàng, dơ̆ lơh chờ bơh yau; yal tơngĭt, ràng tơlik bơta niam chài bơh yau bơh làng bol ală jơi bơtiàn dùl êt nă cau tàm càr dê ai gal ngan gơ̆p bơyô tàm lơgar mờ dunia in...Ală broă lơh do neh lơh kah wơl jơnau gơdan, lơh tơnguh tai nùs nhơm pơñiờ să, pơn jờng jơi bơtiàn mờ gơ gơs là bơta gơn kơnờm gơwèt mờ bơta bơtàu tơnguh bơh tơl nă cau dê kung bè mpồl bơtiàn. Bi A Uôn, ơm tàm ƀòn Mô Bành 1, xã Đăk Na, kơnhoàl Tu Mơ Rông pà gĭt: He lùp bơsram ală bơta niam, bơta jak, bơta kwơ bơhiàn niam chài krơi is kòn cau dê nàng tơnơ̆ do he bơto yal wơl ai oh kòn kòn sau he dê in pơn jăt tai lơh jăt bơhiàn niam chài kòn cau Sơdàng he dê.

Mờ bơta jơh nùs lơh ngan prăp gàr, ngui niam bơta kwơ niam chài bơh yau bơh làng bol ală jơi bơtiàn dùl êt nă cau dê tàm rài kis ờs mờng pah ngai tơn, bal mờ lơh jăt niam ală Rơndăp broă prăp gàr, uă phan niam pơnrơ is niam chài neh gơ gơs là phan bơna nhơl chờ lơh geh jơnau kờñ lòt sền nàng gĭt bơta niam chài kòn cau ơm kis bơh yau dùl bă tiah bơh năc lòt nhơl dê tŭ tus mờ càr Kon Tum. Pơlam gùng dà bơtàu tơnguh nhơl chờ tơlir kơ̆ kơl jăp mờ nhơl chờ niam chài, ală nam rềp ndo, càr Kon Tum sền gròi bơtàu tơnguh nhơl chờ mpồl bơtiàn. Uă dơ̆ lòt nhơl sền nàng gĭt niam chài cing mồng, gah broă lơh bơh yau, dơ̆ lơh chờ mpồl bơtiàn bè tàm ƀòn Kon Kơ Tu, ƀòn dờng Kon Tum; Kon Pring, kơnhoàl Kon Plông; Măng Ri, kơnhoàl Tu Mơ Rông...neh crơng gơs. Ồng Phan Văn Hoàng, Phó Kwang ătbồ Sở Văn hoá, Thể thao mờ Zu lịc càr Kon Tum pà gĭt, broă prăp gàr niam chài ală jơi bơtiàn dùl êt nă cau là dùl broă lơh bal mờ uă jơnau kờñ.

Bơh bơta kờñ gơboh mờ kờñ ngan tàm broă ngui niam ală bơta kwơ niam chài bơh yau bơh he dê den ngan ală cau chài bơto yal mờ jàu wơl ală phan lời wơl niam chài ai rơnàng kơnòm să in lơh gơlik geh bơta kờñ ngan, kờñ gơboh rlau bơta niam chài kòn cau he dê. Bal mờ hơ̆, tàm gùng dà bơtàu tơnguh nhơl chờ tàm ù tiah càr dê den jơnau bè niam chài bơh yau bơh làng bol jơi bơtiàn dùl êt nă cau dê là kờñ pal lơh niam yal tơngĭt, ràng tơlik ai năc lòt nhơl tàm lơgar mờ bơdìh lơgar in bơh hơ̆ bơtàu tơnguh bè nhơl chờ.

Bal mờ bơhiàn niam chài niam bơnĕ is ngan bơh 7 jiơ bơtiàn kòn cau oh mi, nam 2022 càr Kon Tum rò rlau 1 tơlak 100 rbô nă năc lòt nhơl, gơguh tus 3 dơ̆ pơndrờm mờ nam 2021. Bơtàu tơnguh pràn kơldang tơnơ̆ dơ̆ bơtờp kòp Kovid-19, priă lơh geh bơh gah kă bro lơh sa tơlir bơh càr Kon Tum dê lơh geh rlau 265 tơmàn đong gơguh rlau 3 dơ̆ pơndrờm mờ nam lài. Tus bal lơh broă kă bro nhơl chờ, priă lơh geh bơh uă cau dùl nă să mờ mpồl bơtiàn dê tàm càr Kon Tum geh bơtàu tơnguh là bơta pơn jờng uă ngan tàm broă prăp gàr, ngui niam ală bơta kwơ niam chài bơh yau làng bol dê.