VOV4.K’ho- Đơs pơnđik kòn cau Rơđê geh 2 gùng đơs mờng quèng ngan là đơs Kưt mờ Eirei. Tơngume ală jơnau pơnđik sùm jờng rơ brê bơnơm, jờng rơ rài kis ƀòn lơgar, bơta tàm kờñ ùr klau, nùs nhơm hìu bơnhă nting tơngkah bơto bơtê kòn sau... Kuơmàng, geh ală jơnau đơs Kưt mờ gùng đơs jòng ngan ai tơnggŏ bơta kah kơlôi bè Bác Hồ. Bal mờ hơ̆, kung geh uă jơnau đơs Eirei bal mờ gùng đơs ndang, chờ hờp, jờng rơ dà kơl hề dờng màng bơh Bác Hồ kờñ gơboh dê.

Nghệ ñân H’Lan Niê (mat mờng hòi là mò Thoại), ơm tàm ƀòn Kla, xã Dray Sáp, kơnhoàl Krông Ana, càr Dăk Lăk pà git: Neh bơh jŏ, rùp să Bác Hồ tàm đơs pơnđik kòn cau Rơđê bè sơmañ àng gơ crà lam gùng jat Đảng, tam lơh ai wơl lơngap lơngai is, khat gơboh jơi bơtiàn in, bè sơm pòl ồs pơn đàng sòl tàm trồ mang klăm jơngo, ai làng bol geh rài kis hờm ram bè tŭ do. 

Nghệ ñân Y Nguk Niê mờ H’Ƀim Kbuôr đơs pơnđik jờng rơ Bác Hồ tàm VOV Tây Nguyên

Ală jơnau pơnđik bè Bác Hồ ƀuơn wă, ƀuơn iat, ƀuơn mut tàm nùs cau tai. Pah tŭ nghệ ñân đơs pơnđik, jơnau pơnđik geh bơrlŭ bal mờ sap ntas bơh đờng đinh buốt, đinh năm dê niam ngan. Mò Thoại yal: “Pah tŭ đơs pơnđik bè Bác Hồ, ală nghệ ñân sùm yal bè Bác Hồ là cau đơng lam bồ jak chài ngan. Bác Hồ lòt tus tềng lơi den bơta khat gơboh geh tàm hơ̆. Bác Hồ là cau dong làng bol kòn cau lik bơh bơta lơh dĭ bol sò tơm Tây, bol sò Mỹ dê rài yau. Geh ală jơnau đơs nrĭ bè Bác Hồ, bè: Nùs nhơm kah Bác Hồ uă ngan/ Tŭ do ƀòn lơgar hờm ram/ Kah ưn ngài Bác Hồ dờng màng/ Bác Hồ bơ trơh sềm Ktiă, gàr mìr tam tơngời, tam rơpung/ Bác Hồ ờ thàn njơr ram lòng niam/ Ờ thàn hùc dà croh mrềt/ Bác Hồ neh rê mờ Bơtau lời kòn cau in kah kơlôi”.

Nùs nhơm dờng màng bơh cau Rơđê dê gơ wèt tus mờ Bác Hồ ờ mìng tài bơh Bác Hồ là kwang đơng lam bồ jơi bơtiàn dê, mờ Bác Hồ gam là krơh niam bơh bơta phi să jơh rài kis ai dà lơgar, ai làng bol in. Nghệ ñân Y Nguk Niê (mat mờng hòi là ồng Suang), ơm tàm ƀòn Hŭk B, xã Čư Mgar, kơnhoàl Čư̆ Mgar, càr Dăk Lăk đơs: Bác Hồ neh pơyua jơh nùs nhơm kờñ gơboh he dê ai làng bol tiah đah jum dà lơgar in, tàm hơ̆ geh làng bol kòn cau Tây Nguyên. Cau Rơđê sùm tàm tơngkah gơp bơh jơnau đơs Kưt, Eirei kah jơnau Bác Hồ nting tơngkah làng bol tam klac, kờñ gơboh bal mờ gơp, bơt bơtàu ƀòn lơgar ngai sơlơ pas sơm, niam bơnĕ. Nghệ ñân Y Nguk Niê đơs: “Bác Hồ là cau tề lam dà lơgar Việt Nam pha lin bơta sơgràm phà ù tiah bơh bol sò tơm Tây, Mỹ dê mờ tŭ do geh kis hờm ram, gơboh gơbài. Bác Hồ nting tơngkah cau Tây Nguyên pal git kờñ gơboh ƀòn lơgar, dùl nùs jat Đảng mờ dà lơgar, bơt bơtàu ƀòn lơgar ngai sơlơ pas sơm, niam bơnĕ. Tàm jơnau pơnđik Rơđê ờ gơtùi ờ geh ală jơnau pơnđik bè Bác Hồ”.

Rùp să bơh Bác Hồ dê tàm jơnau pơnđik Rơđê geh ală nghệ ñân tàm pơndrờm, ai lơh pơn yơu mờ dà đơs rềp mềr, sàng goh mơya cèng tàm hơ̆ là nùs nhơm ki ngàm bơh cau Rơđê dê gơ wèt tus mờ kwang đơng lam bồ jơi bơtiàn dê. Nghệ ñân Y Bruăt Êban (mat mờng hòi là ồng Nhem) 83 sơnam ơm tàm ƀòn Ea Sut, thị trấn Ea Pô̆c, kơnhoàl Čư̆ Mgar, càr Dăk Lăk pà git, Bác Hồ là rùp hin bơh bơta kơp kơnờm geh kis, bơh bơta lơngăp lơngai is, khat gơboh mờ là bơta kờñ gơboh nàng ală nghệ ñân đơs pơnđik in đơs ală jơnau nrĭ: “Bác Hồ neh đơng lam bồ dà lơgar Việt Nam. Añ ờ hềt geh tŭ tìp mat Bác Hồ mơya pah tŭ đơs Kưt halà Eirei kòn sau in, tàm ală dơ̆ bơyai lơh añ sùm đơs jơnau pơnđik jờng rơ Bác Hồ. Geh ală jơnau đơs pơnđik bè do: Ờ geh cau lơi ndrờm bè Bác Hồ, kwang đơng lam bồ jak chài, koh sang ală tờm chir, nhơt ja ờ niam, cèng wơl bơta niam hèr ai ƀòn lơgar in, den tàng ngai do bol he geh rài kis hờm ram, ring lơngai. Tờm chir, nhơt ja ờ niam tàm do là đơs tus bol sò tơm, ling ngụy”.

Gơwèt mờ làng bol kòn cau Tây Nguyên, tàm hơ̆ geh cau Rơđê, bulah Bác Hồ neh ờ gam tai mơya Bác Hồ kung gam kis sùm tàm tơl dà dờng, dà croh, bă brê mờ làm gùt ală ƀòn lơgar. Nghệ ñân Rơđê sùm đơs pơnđik kah kơlôi Bác Hồ bơh gùng đơs Kưt jòng ngan bal mờ sap ntas đinh buôt lơbơn niam lơh cau iat ờ gơtùi ờ ngoh rơngac. Nghệ ñân H’Ƀim Kbuôr, ơm tàm ƀòn Ƀling, xã Čư̆ Mgar, kơnhoàl Čư̆ Mgar pà git, tŭ đơs pơnđik, ală nghệ ñân geh đơs mơ tơn bal mờ nùs nhơm kah ưn ngài Bác Hồ tài jơi bơtiàn mờ pơlai soh, kah kơlôi Bác Hồ neh ờ gam tai: “Bol he kah bè Bác Hồ mơya ờ geh tìp Bác Hồ tai den đơs pơnđik bè do: Ơ Bác Hồ, sau gam kah Bác Hồ. Kah muh mat lơbơn niam. Tŭ do lơh bè lơi nàng geh tìp tài bơh Bác Hồ neh ờ gam tai. Bác Hồ neh gơ gơs kong kìm, òng kơ ñut par làm gùt ală tiah. Bol sau kah sap đơs tŭ Bác Hồ boh bơr. Ờ geh cau lơi bè Bác Hồ là cau jak chài ngan. Bác Hồ neh lơh gơs dà lơgar in sơmañ rơmit àng gơ crà lam gùng”. 

Ală jơnau pơnđik là jơnau đơs bơh huềng, bơh plai nùs cau đơs dê. Cau Rơđê ai tơnggŏ nùs nhơm kah ưn ngài, kah kơlôi Bác Hồ bơh jơnau pơnđik rềp mềr, bal hiă. Gùng đơs mờ sap đơs lơh gơs bơh ală bơta ki ngàm kwang đơng lam bồ kờñ gơboh, jơh rài kis phi să ai jơi bơtiàn Việt Nam in. Bulah ờ hềt thàn mut còp Tây Nguyên, mơya rùp hin Bác Hồ kung gam kis sùm tàm nùs cau Rơđê dê bơh ală jơnau pơnđik niam ngan.

Cau mblàng K’Duẩn