Neh rơlao 35 nam crơng gơs mờ bơtàu tơnguh, Mpồl cau Kŭp rùp cau ùr Hải Âu, do là mpồl bal bơh ală cau ùr chài kŭp rùp mờ geh bơngă tàm mpồl cau chài neh geh ai tơngŏ mờ ală cồng nha tàm broă kŭp rùp jăk ngan, uă cau tàm mpồl geh khà kwơ màng tàm mpồl cau chài kŭp rùp Việt Nam mờ Ală lơgar dê. Di tàm dơ̆ tơnkah 35 nam ngai crơng gơs, Mpồl Hải Âu geh tơlik măt pang sră rùp geh tơngu me: “Rùp să rài kis ală jơi bơtiàn lơgar Việt Nam. 54 pang rùp niam ngan geh ràng tơlik tàm dơ̆ ràng tơlik rùp do là ală pang rùp rơwah bơh 298 pang rùp bơh 25 nă cau tàm mpồl lơh gơs pang sră rùp “Rùp să rài kis ală jơi bơtiàn lơgar Việt Nam”.

Mò Nguyễn Hồng Nga, cau tàm Mpồl đơng lam Mpồl cau chài kŭp rùp Việt Nam, Phó Củ tịc Mpồl cau chài kŭp rùp ƀòn dờng Hồ Chí Minh, Phó Kwang lam bồ mpồl kŭp rùp Hải Âu pà git: “Nàng geh ală pang rùp mờ rùp lip tàm pang sră “Rùp să rài kis ală jơi bơtiàn kis tàm lơgar Việt Nam; Mpồl bol añ neh pal lơh tàm 2 năm mờ rơwah bơh git nđờ rơbô pang rùp, nàng rơwah geh ală pang rùp tơmŭt tàm pang sră mờ ràng tơlik. Do là tơngu me kal ke ngan, dơ̆ do geh 36 jơi bơtiàn bol añ ai rùp tơmŭt tàm pang sră là dùl broă lơh ngan. Tài tàm tơl jơi bơtiàn den geh uă ngan mpồl dềt, bol añ kờñ ai jơh ală jơi bơtiàn bơh Tiah đah tô tus Tiah đah jum, bơh tiah Tây Nguyên, tiah ring tus tiah ngài, ală tiah mờ bol añ neh tus tàm 35 nam”.

Tus bal ràng tơlik, làng bol geh sền bơta niam uă bơta bơh ù tiah geh is, kòn bơnus mờ bơta niam chài tàm gùt lơgar bơh măt sền geh uă nùs nhơm gơboh kờñ mờ geh uă bơta chài rơgơi bơh ală ca ùr kŭp rùp tàm mpồl Hải Âu dê. Ồng Nguyễn Trùng Nhị, bơh ƀòn dờng Hồ Chí Minh đơs bè do: “Nùs nhơm bơh ală oh mi cau ùr tàm mpồl kŭp rùp Hải Âu pà1 gŏ geh ală jơnau đơs, nùs nhơm geh ai bè cau jơi bơtiàn ờ gal cau niam bơnĕ ngan, pal geh sền ngềr ngan, geh cèng tus ală bơta niam chài, krơi is bơh tơl jơi bơtiàn dê tàm bơta niam chài bal lơgar Việt Nam dê”.

Lŏ Trà My, cau bơsram dờng Hìu bơsram Đại họk Rmit pà git: “Tus mờ ràng tơlik ngai do, añ gơlơh niam ngan dùl bơnah là bơta rùp săi, jơh ală pang rùp ndrờm niam bơnĕ lơm. Kòn bơnus geh lơh gơs ờ mìng bè bơta niam tàm muh măt mờ gam geh lơh tàm pang rùp, kòn bơnus tàm tiah geh is mờ kòn bơnus tàm bơta mờ kòn bơnus geh kis mờ dờng pràn”.

Bơdìh mờ broă ràng tơlik, Mpồl Hải Âu gam tăc dùl bơnah priă geh bơh broă tăc ală pang rùp, sră rùp mờ ràng tơlik nàng lơh geh kes priă nùs nhơm dong kờl, tus bal dong kờl ală cau gơtìp kal ke, tàm hơ̆ uă ngan là cau gơtìp sơnơm khih tàm rài tam lơh, lơh aniai. Ràng tơlik “Rùp să rài kis ală jơi bơtiàn kis tàm lơgar Việt Nam” pờ mpồng khăt gơboh tàm Hìu prăp gàr phan kwơ yau Cau ùr Việt Nam tus jơh ngai 15 nhai 10 nam 2025.