VOV4.K’ho- Mho ngai 21/09, tàm hìu tàm pơrlòng Tàp pràn să jan càr Dăk Lăk geh bơyai lơh dơ̆ sơnđờm mŭt dar lồi dŭt tàm pơrlòng Coh plai kơnòm bơsram kấp dùl mờ kấp bàr gùt lơgar Cúp Milo nam 2022.

Sơnđờm mŭt dar lồi dŭt khà tàm pơrlòng coh plai kơnòm bơsram jơh gùt lơgar Cúp Milo nam 2022

Dar lồi dŭt tàm pơrlòng Coh plai kơnòm bơsram kấp dùl mờ kấp bàr gùt lơgar Cúp Milo nam 2022 geh bơyai lơh bơh ngai 21 tus ngai 27 nhai 9 nam 2022, mờ bơta tus bal bơh 248 nă cau pơrlòng tus bơh 16 Sở Giáo dục mờ Đào tạo tàm gùt lơgar dê. Tàm hơ̆, khà tàm pơrlòng bơh mpồl kấp dùl geh 12 mpồl, khà tàm pơrlòng mpồl kấp bàr geh 9 mpồl. Do là ală mpồl coh plai jak ngan geh mŭt tai tàm dar tàm cah is Tiah 1 tàm càr Phú Thọ mờ Tiah 2 tàm càr Bình Dương. Khà tàm pơrlòng coh plai kơnòm bơsram kấp dùl mờ kấp bàr jơh gùt lơgar Cúp Milo nam 2022 là ƀlàng nhơl ờs mờng, geh pin dờn, geh lam lơh sùm pah nam, là ngai chờ ai ală kơnòm bơsram kờñ mờ môn coh plai.

Cau mblàng K’Hạnh