Tus bal dơ̆ pơrlòng geh mờr 500 nă nghệ ñân bơh 15 kơnhoàl, thị xã mờ ƀòn dờng tàm càr Dăk Lăk dê. Tàm 3 măng bơyai lơh, ală mpồl geh ràng tơlik ală dơ̆ ràng tơlik mờ uă bơta bè: mìng dròng cing lơm, dròng 2 phan dròng, tàm dròng cing bal mờ phan teh kòn cau; đơs pơnđick, tam ya, ràng tơlik wơl bàr pe bơhiàn duh khoai ờs mờng bơh ală kòn cau dê, bè: kòn cau Rơđê, Mnông, Jrai.

Do là dơ̆ nàng ală nghệ ñân, cau bơyai lơh mpồl bơtiàn geh tŭ niam tìp mat, lơh kuèng niam chài, đơs crih tam ya pơgồp bal mờ ràng tơlik dròng cing jañ mồng, mblàng yal, yal tơngĭt phan lời wơl niam chài cing mồng Tây Nguyên dê. Mơkung sơlơ tơnguh bơta gĭt wă, geh kơnòl, bơta pơn yờ să bơh ală cau lơh broă sền gàr, prap gàr, mờ ngui niam bơta kwơ phan lời wơl niam chài jơi bơtiàn dê.