Tàm 02 nhai lồi sơnam, càr Lâm Đồng rơ̆p bơyai lơh uă broă lơh lơh gơlik geh nùs nhơm duh hồl hô hơng, gơ hòi gơ jà năc lòt nhơl tàm dơlam mờ bơdìh lơgar bal mờ bơta tờm là Lơh chờ Cing mồng Tiah đah jum măt tơngai Lik câu Á nam 2025, Lơh chờ Cê ală lơgar, Lơh chờ wă rò nam pa 2026…Bal mờ hơ̆ càr kung lơh pràn broă lơh hòi jà, yal uă lòt nhơl bơh broă lơh sồ jơh anih tus, rề ơnàng lơh broă bal ală lơgar mờ tus bal ală broă lơh lòt nhơl dờng.

Tàm hơ̆ ròt broă lơh Lơh chờ Cê Ală lơgar – World Tea Fest 2025 geh lơh dờng, dơ̆ sơnrờp bơyai lơh tàm lơgar Việt Nam, geh lơh tàm càr Lâm Đồng bơh ngai 11/11 tus ngai 07/12/2025, digơlan gơhòi gơ jà pơgăp 20 rbô dơ̆ năc tàm dơlam mờ bơdìh lơgar. Tàm do, uă broă lơh kâp ală lơgar rơ̆p geh bơyai lơh, bè: Ràng tơlik, yal tơnggĭt phan bơna cê mờ măy mŏk lơh phan pa ngan; Pơrjum bơyai bè broă rơndăp lơh tơngguh bơngă măt kă bro cê Việt Nam; Tìp măt lơh kwèng cê lơh bơyô cau ala măt mờ năc ală lơgar dê; Ngai chờ gùng drà mờ niam chài cê; Gùng lòt lòt nhơl ƀòn brê bơnơm tiah cê; bal mờ ală broă lơh đơs crih tam ya. Ồng Nguyễn Văn Lộc, Kwang Lam bồ Sờh Niam chài, Tàp pràn să jan mờ Lòt nhơl càr Lâm Đồng, pà gĭt: “Bol hi pơn jăt tai bơyai lơh ală broă lơh dờng nàng gơhòi gơ jà năc lòt nhơl. Bal mờ hơ̆, bol hi lơh broă mờ Tơrgùm ală mpồl lòt nhơl geh ală dơ̆ lòt nhơl, gơl gùng lòt nhơl, geh broă lơh ai pà pơn jờng, tơrmù giă hìu năc kung bè ală anih ơm bĭc nàng rò năc tàm dơ̆ lồi sơnam, Noel, Sa tềp Tây. Ală broă lơh niam chài, tàp pràn să jan mờ lòt nhơl bơyai lơh rơ̆ rŭ ngan, uă ngan dơ̆ lồi sơnam”.

Mùl màl ngan chờ hờp wă rò tơngkah kir sơnrai 85 nam Ngai tơnggơs Đảng ƀộ càr Dăk Lăk (23/11), Ngai chờ Tam klăc dờng jơh gùt jơi bơtiàn (18/11), tơngkah kir sơnrai 20 nam Ngai Phan lời wơl niam chài Việt Nam (23/11), càr Dăk Lăk bơyai lơh Tơngleh Phan lời wơl niam chài ală jơi bơtiàn càr Dăk Lăk nam 2025 bal mờ tơngume “Săp mpong cing mồng –Tam klăc đềt mềr mpồl bơtiàn”, geh lơh bơh ngai 18/11 tus ngai 23/11/2025, tàm Hìu prăp gàr phan kwơ yau càr Dăk Lăk (sơnah ƀòn Buôn Ma Thuột), mờ Hìu prăp gàr phan kwơ yau Phú Yên (sơnah ƀòn Tuy Hoà). Tơngleh Phan lời wơl niam chài là ròt ală broă lơh geh gơtha jrô ơnàng ngan, nàng kờn yờ tơngguh jờng rơ ală bơta kwơ niam bơnĕ ngan bơh ală phan lời wơl niam chài tàm ù tiah càr Dăk Lăk dê đơs bal mờ phan lời wơl Ù tiah niam chài cing mồng đơs is; lơh tơngkah wơl nùs nhơm hừh nùs, gĭt wă kơnòl bơh mpồl bơtiàn dê tàm broă prăp gàr mờ ngui niam bơhiàn niam chài ờs mờng bơh yau; mơkung yal uă rùp hin Dăk Lăk- bă ù bơh săp mpong brê bơnơm dờng dê, tiah tìp bal bơhiàn niam chài krơi is mờ kơ̆p kờñ ngan brồ guh pơgồp bơnah lơh pràn bơtàu tơngguh lòt nhơl niam chài kơnhăp jŏ, rề ơnàng tŭ niam tìp măt lơh kwèng, lơh broă bal mờ lơh gơlik broă lơh broă sa ai mpồl bơtiàn ƀòn lơgar in bơh ală broă lơh niam chài – đơs crih tam ya – lòt nhơl niam bơnĕ ngan. Do kung là dơ̆ tơngkah kir sơnrai 20 nam Ù tiah niam chài cing mồng Tây Nguyên geh UNESCO cih măt là phan lời wơl mờ bơr mờ Phan lời wơl niam chài ờ di phan bơna ala măt kòn bơnus gùt plai ù dê.

Tơngleh geh lơh ròt broă lơh lơh gơkờñ ngan, pơnrơ ngan là Pơrlòng Niam chài Cing mồng mờ phan ngui đơs crih ờs mờng bơh yau ală jơi bơtiàn càr Dăk Lăk dê, mờ bơta tus bal bơh ală mpồl cau chài jơnau yau tus bơh ală sàh, sơnah ƀòn tàm ù tiah càr, lơh tơngŏ wơl bàr pe broă lơh yàng, lơh chờ ờs mờng bơh yau pơn jăt bal mờ tàp lơh phan lời wơl Cing mồng. Mơkung là Famtrip gùng lòt lòt nhơl “Tàm tơrbŏ Phan lời wơl – Tam klăc bal mpồl bơtiàn”, yal tơnggĭt ală dơ̆ lòt nhơl sền gŏ, lòt sền gĭt niam chài ƀòn lơgar, ală broă lơh mùl gŏ is bơh mpồl bơtiàn ală jơi bơtiàn dê, lùp ală bơta niam chài yau tàm ù tiah càr dê.

Ai tàm càr Khánh Hoà, Tơrgùm ală mpồl Lòt nhơl lam lơh Dơ̆ pơrlòng Sră ƀăl mờ Video vlip bè lòt nhơl nam 2025 bal mờ tơngume “Lòt nhơl Khánh Hoà – Pang rùp uă rùp să”. Do là broă lơh gơ ơm tàm broă lơh hòi jà, yal uă lòt nhơl càr dê, Tơnơ̆ tơrgùm bal dùl sră pơ àr gơnoar ătbồ, ù tiah lòt nhơl càr Khánh Hoà dê geh rề ơnàng, lơh pang rùp lòt nhơl sơlơ gơgơs “uă rùp să” rlau mờ tŭ lơi jơh. Bơdìh mờ ală anih tus mờng kwèng bè pòt dà lềng Nha Trang – dùl tàm ală pòt dà lềng niam ngan rlau jơh dunia, dồ đah bồt Cam Ranh bal mờ ală anih ơm rlô pràn să pas mơda, kwơ̆ Mò Ponagar, ƀòn dờng yau Diên Khánh halà ală show lơh đơs crih tam ya, bơta geh măt bal bơh ù tiah Ninh Thuận yau dê dong pang rùp lòt nhơl Khánh Hoà geh tai uă rùp să niam bơnĕ is ngan.