Geh lơh bơh ngai 26/12/2022 mờ jŏ jòng tus jơh sa tềp Tây 2023, Poh niam chài- nhơl chờ Măng Đen nam 2022 geh Ủy ƀan Ñân zân kơnhoàl Kon Plông, càr Kon Tum bơyai lơh tàm Tiah nhơl chờ brê bơnơm dà lơgar Măng Đen neh gơ hòi gơ jà gal ngan nac nhơl chờ tus sền niam chài Tây Nguyên dê. Oh Lương Phạm Việt Anh, nac nhơl chờ tus bơh càr Dăk Nông pà git, tus Măng Đen oh geh sền  ală mpồl nghệ ñân kòn cau Sơdàng dròng cing, jañ mồng, tamya xoang, nhơl đờng goòng kòn cau mờ oh kờñ ngan làng bol tàm do: “Bơta sơnơng oh dê gơ lơh krơi sơ ƀơi ngan mơya kung mờng kwèng ngan sơl, tài bơh hìu bơnhă oh dê ntrờn mut tàm Tây Nguyên ơm kis den oh kung gơ gơs dùl nă cau bơh Tây Nguyên dê. Oh kờñ ngan làng bol tàm do. Tơl nă cau tàm do sơrmah sơrmài, lơ bơn niam ngan”.

Tàm uă broă lơh geh bơyai lơh tàm Tiah nhơl chờ brê bơnơm dà lơgar Măng Đen tàm dơ̆ ơm rlô chờ nam pa 2023 pa do, gơ hòi gơ jà nac nhơl chờ ngan rlau jơh là ù tiah niam chài “Ù tiah niam Tây Nguyên”. Tàm do, tềng hơ đơm mƀur brê nho, geh 5 nơm hìu Rông bơh yau kòn cau Sơdàng sơnĕ Mơ Nâm mờ Ca Dong dê geh lơh wơl. Bal mờ hơ̆ là git nđờ rhiang phan lời wơl gơ jat bal mờ rài kis làng bol dê geh ràng tơlik niam ngan. Oh Nguyễn Ngọc Thuỷ Trang, cau bơsram dờng nam dơ̆ 2 Hìu bơsram Đại học FPT tàm ƀòn dờng Hồ Chí Minh, pà git: “Do là dơ̆ sơn rờp oh geh tus Măng Đen, oh gŏ rài kis làng bol tàm do niam ngan. Bulah khu siơŭ siar bè phan bơnba mơya bè nùs nhơm den khi wil tơl ngan. Ală làng bol den khi sùm geh dùl dơ̆ sàu piang ram mhŭ mờ gơp. Oh neh tus Dà Làc mờ oh gŏ Măng Đen ờ ndrờm bè Dà Làc, gơ geh ală bơta krơi mờ Dà Làc. Tơnơ̆ do den ngan là oh geh tus wơl Măng Đen tai bal mờ dùl nă cau lơi hơ̆ digơlan kung geh sơl”.

Ồng Đặng Đình Toán, Kwang atbồ Cơldŭ niam chài mờ yal tơnggit jơnau kơnhoàl Kon Plông pà git, nàng gơ hòi gơ jà làng bol kung bè nac nhơl chờ tus sền niam chài Tây Nguyên tàm Tiah nhơl chờ brê bơnơm dà lơgar Măng Đen tàm dơ̆ ơm rlô chờ nam pa 2023, kơnhoàl Kon Plông neh geh broă bơcri priă ring niam ngan. Bal mờ hơ̆, pơgồp bal mờ cau bơceh phan soh Minh Hạnh mờ cau jòi phan yau Tây Nguyên Đặng Minh Tâm bơceh lơh, ràng tơlik 1 ù tiah niam chài Tây Nguyên lơh dềt tàm Măng Đen: “Bơh ù tiah niam chài bol hi dê, geh dùl jơnau đơs kờñ pơyua tus jơh ală cau nac lòt sền hơ̆ là broă prap gàr, ngui niam ală bơta kuơ niam chài bơh yau jat di gùng dà ai tơlik tàm Pơrjum niam chài gùt lơgar nam 2021 mờ Tổng Ƀí thư ồng Nguyễn Phú Trọng neh đơng lam, hơ̆ là niam chài là huềng bơh jơi bơtiàn dê, niam chài sòl gùng ai làng bol dà lơgar in lòt mờ niam chài gam den jơi bơtiàn kung gam. Do là ală bơta kuơmàng ngan rlau jơh mờ bol hi kờñ pơyua tus nac in tŭ lòt còp ù tiah niam chài tàm kơnhoàl Kon Plông”.