VOV4.K’ho- Tus mờ ƀòn dờng Pleiku tàm dơ̆ ơm rlô chờ Sơn tờm Dà lơgar ngai 02/9, nac nhơl chờ ờ gơtùi ờ tus mờ ù tiah niam tiơng pơn rơ Biển Hồ niam bơnĕ ngan, geh tiơng pơn rơ là “Mat Pleiku”. Bal mờ broă triang sền bơta niam ù tiah gam bè ờs ngan, lòt sền ală ƀòn lơh broă bơh yau bè tàñ phan mờ gle đơr, tàñ ồi kòn cau, nac nhơl chờ gam geh sa ală phan sa bơkah ngan bơh cau Jrai dê mờ geh iat, sền ală gùng đơs crih bơh yau.

Ơm ngài Biển Hồ mờr 1 kơi sồ, hìu tac iar buh Plit tàm ƀòn Têng 1, xã Tân Sơn, ƀòn dờng Pleiku, càr Gia Lai bơh 1 hìu bơnhă cau Jrai pờ pơgap mờ do rlau 10 nam. Nàng drơng nac nhơl chờ in tàm dơ̆ ơm rlô chờ Sơn tờm Dà lơgar ngai 02/9, Yă H’Nach bal mờ cau lơh broă pơs wàs hìu tac phac sàng goh mờ rơcang lài ală phan sa bơkah krơi is ngan bơh cau Jrai dê: “Tàm ală ngai chờ dờng tàm lơgar, mờ kuơmàng là sa tềp lơngăp lơngai is 02/9, làng bol tàm ƀòn sùm rơcang lài uă ngan phan sa bơkah. Bol hi rơcang iar, poac jơrke ròng mờ 2, 3 bơta phan sa ờs mờng bơh làng bol kòn cau Jrai dê bè biap pài mờ 2, 3 bơta phan sa bơh ală biap pic tàm mìr, lòt jòi tàm brê. Pơn yơu bè biap nha bùm blàng, piang prùh tàm ding đơr mờ ală phan sa mờ ƀang geh làng bol pơ̆ tàm brê. Mìng is gơ wèt mờ phan sa bơh ƀang den tŭ wă nac, bol hi gơtùi trŭ gơm gơs uă bơta biaơ krơi is, gơtùi wơr mờ poac halà gơm biap pài kung gơtùi sơl”.

Bèp Kiệt yal bè anih niam chài cau Jrai dê

Hìu tac iar buh Plit tàm ƀòn Têng 1, xã Tân Sơn, bơdìh ƀòn dờng Pleiku geh lơh tàm bă ù ơnàng mờr 4 sàu. Mùl màl hơ̆ là suơn bơh 1 hìu bơnhă cau Jrai dê, bơh bèp Kiệt lơh tờm. Bă suơn do geh bơceh lơh bè dùl suơn nhơl dềt, mờ ală hìu rơng niam ngan, geh lơh krơi is. Tơl hìu rơng ơnàng 2, 3 jơt thơk vuông tơl nàng ai ală mpồl nac in bơ tòm tơrgùm bal mờ gơp nàng sa phan sa ƀòn lơgar bơh ƀòn dờng Pleiku dê. Bèp Kiệt yal: “Bol hi pờ hìu tac phan ñô sa kung jat niam chài phan sa bơh cau Jrai dê sơl. Tàm do, drơng nac nhơl chờ ală phan sa kòn cau Jtai dê, hơ̆ là biap nha bùm blàng. Sùm den nha bùm blàng bol he wơr mờ klung iar, tĕ tai plang, prền mờ bơkàu bơl hong dam. Dơ̆ 2 tai là biap brê gơm bal mờ tàm sre. Gơ wèt mờ piang prùh tàm ding đơr den ngui mbar geh tùc tàm mìr. Bol hi blơi phe làng bol dê, sùm den bol hi rơ wah ală gar phe bơkah, ƀô thồm ngan rlau jơh. Phe lài mờ tŭ mơl tàm ding đơr den bol hi tram tàm dà dùl thoa, tơnơ̆ hơ̆ mut tàm brê koh đơr. Bơdìh mờ piang prùh tàm ding đơr den gam geh iar tai. Iar geh blơi bơh làng bol tàm ală ƀòn dê. Bơh àng drim gờñ, làng bol neh cèng tus, sùm den bơh 10 tus 20 nơm. Do là iar làng bol ròng tàm ală ƀòn tàm xã H’bâo, xã Chư Dang Ya. Phan tĕ nàng cik ală poac buh bè ờs den bol hi ai nha é pic bơh tàm mìr, bơrlŭ tai nha ƀô lò ƀŏ bal mờ boh mrĕ, cik poac buh”.

Tàm nggùl suơn là ƀlàng nhơt ơnàng. Tềng nggùl ƀlàng geh tờm chi gơ nơng jơnhua ngan, là anih nàng bơyai lơh yal tơnggit ală dơ̆ lơh yàng ờs mờng cau Jrai dê, mờ ală broă lơh bè dròng cing, jañ mồng, tamya xoang gùt dar bơnhă ồs mờ nhơl ală bơta phan nhơl gùng đơs crih bơh yau: “Tŭ wă nac bol he rơcang lài ală jơnau đơs crih tamya, nhơl ñŏ bal mờ nac mơya kung jat jơnau sồr bơh nac dê lài hơ̆, hơ̆ là dròng cing jañ mồng, nhơl đờng t’rưng, đờng ting ning, tamya xoang gùt dar gơnru ồs hơng. Kung gơ jat tàm jơnau sồr bơh nac dê, geh tŭ khi sồr bol hi đơs ală jơnau đơs crih bè Tây Nguyên nàng nac gơtùi tamya xoang mờ cau đơs crih”.

Yă H’Nach gơm ală phan sa bơh ƀang gle

Bơdìh mờ yal tơnggit niam chài niam ngan bơh cau Jrai dê, hìu bơnhă bèp Kiệt tàm ƀòn Têng 1, xã Tân Sơn, bơdìh ƀòn dờng Pleiku kung là anih lơh gơlik broă lơh ai uă oh kòn tàm ƀòn lơgar in. Bal mờ hơ̆, do kung là anih blơi phan lơh gơs bơh làng bol kòn cau Jrai dê lơh gơlik bơh broă ròng phan, tam phan halà pic bơh tàm suơn mìr: “Tơnơ̆ dơ̆ bơtờp kòp Kovid-19, geh uă ngan ơruh pơnu ờ geh broă lơh. Uă oh lik klờng mơya kung ờ hềt jòi geh broă lơh, lòt lơh broă ngài den kung kal ke uă ngan, halà ờ hềt jòi geh broă lơh jat bè bơta kơp kờñ he dê. Bè hơ̆ den tàng añ dong kờl ai geh broă lơh ală sau in tus ndo lơh broă nàng geh priă jền kơlôi rơcang rài kis pah ngai in. Dùl broă tai là añ mờng blơi iar làng bol dê, tŭ làng bol kờñ geh priă, kờñ tac den tŭ lơi añ kung blơi lơm”.

Bulah mìng là dùl hìu tac phan ñô sa dềt bơh hìu bơnhă cau Jrai dê, mơya ală broă lơh tàm do gam pơgồp bơnah bơtàu tơnguh gah nhơl chờ bơh ƀòn dờng Pleiku, càr Gia Lai dê. Bơh hơ̆, pơgồp bơnah lơh gơlik broă lơh ai làng bol tàm ƀòn lơgar in, mờ kung sền gàr, ngui niam bơta niam chài krơi is bơh cau Jrai dê.

Cau mblàng K’Duẩn