VOV4.K’ho- Tàm Hà Nội pa geh lơh Broă lơh tìp mat đơs crih tamya “Sơmañ lơngăp lơngai is nam 2022” di tơngkah kir sơnrai 77 nam ngai Kac màng Nhai 8 pha lin mờ Tơn tờm Dà lơgar ngai 02/9 neh mblàng jơnau đơs jờng rơ dà lơgar, jơi bơtiàn bal mờ ală bơta kuơ kis sùm, ờ tŭ lơi roh bơh dùl jơi bơtiàn khin cha jak chài dê: Broă lơh geh tam pà gơs 2 bơnah tờm, dùl bơnah geh sơn đan “Việt Nam- Jơi bơtiàn khi cha jak chài, phi să tài broă dờng” mờ bơnah dơ̆ 2 là “Việt Nam- Jơnau kờñ  bơh ring lơngai mờ bơtàu tơnguh dê”. Mpồl bơyai lơh neh yal tơnggit ală phóng sự mờ tơngume “Dà lơgar bơh ală cau khin cha jak chài dê” mờ “Ală cau khin cha jak chài bơh tŭ tơngai pa dê” mờ uă rùp hin, sră nggal kuơmàng, lơh kah wơl ală jơnau kir sơnrai khin cha jak chài, ală gơl lơma đơs bè nùs nhơm pa, tŭ niam pa bơh dà lơgar dê tàm rài ring lơngai. Kuơmàng, tàm dơ̆ bơyai lơh broă lơh “Sơmañ lơngăp lơngai is” nam do, Mpồl bơyai lơh gam pà 20 bơnah phan là sră tềm pềr priă mờ ală guàng bơkàu niam ngan ai ală cau lơh broă kac màng dờng sơnam, ală mè Việt Nam khin cha jak chài, ală cau ling khin cha jak chài, ală cau ling kòp tê jê să, cau ling sồt să, cau ling yau bơh ală tŭ tơngai tam lơh. Tơl bơnah phan mờ priă mat kờp priă 10 tơlak đông bơh priă jền hòi jà mpồl bơtiàn tă pơgồp.

Ồng Võ Trọng Nam, Phó Kwang atbồ Sở Văn hóa- Thể thao ƀòn dờng Hồ Chí Minh pà git, nam do, ƀòn dờng geh broă rơndap lơh bơyai lơh chờ “Sa tềp lơngăp lơngai is”, tơngkah kir sơnrai 77 nam Kac màng Nhai 8 pha lin mờ ngai Tơn tờm Dà lơgar Kộng hòa xã hội củ nghĩa Việt Nam, 77 nam ngai Sài Gòn ntàu tam lơh ai wơl gơnoar atbồ mờ uă broă lơh lòt bal. Mìng is tàm ngai 02/9, ƀòn dờng geh uă broă lơh bè: ngui khiñ khí kầu dŏ bồng bi dà lơgar kềng gah dà dờng Sài Gòn;  zù par, tàp pràn să jan tàm dà dờng; tàp pràn să jan bal, đơs crih tamya. Kuơmàng là broă lơh đơs crih tamya tàm trồ mang tàm gùng lòt jơng Nguyễn Huệ drơng gal ngan làng bol in. Jat ồng Võ Trọng Nam đơs, tơngkah ngai Tơn tờm Dà lơgar nam do kung là dùl nam ƀòn dờng sơrlèt gan kòp bơtờp, ƀòn dờng ờ cuh phàu bơkàu bè ală nam lài mờ lời cuh tàm dơ̆ ndai. Jơh ală nàng tơrgùm gròi sền ai rài kis làng bol dê in geh uă rlau.

Uă broă lơh tơngkah 77 nam Ngai Sơn tờm Dà lơgar 02/9 tàm ƀòn dờng Hồ Chí Minh

Gờm chờ tơngkah 77 nam Ngai Sơn tờm Dà lơgar 02/9 mờ wèt tus tơngkah 190 nam ngai crơng gơs càr An Giang, kơnhoàl Tri Tôn bơyai lơh chờ Khiñ khí kầu Tri Tôn nam 2022 mờ Zù par, klềng par geh bồ măi, ờ geh bồ măi, pơgồp bal mờ dơ̆ lơh chờ tàm pơrlòng kơnrồ Bảy núi... mờ tơngume “Par tàm kàl lơh chờ”. Do là dơ̆ lơh chờ khiñ khí kầu sơn rờp geh bơyai lơh tàm tiah đah jum mat tơngai mut dà lơgar. Dơ̆ lơh chờ tơrgùm mờr 20 nơm khiñ khí kầu ală bơta. Tàm hơ̆, geh 14 nơm khiñ khí kầu kâp 1 par jơnhua bơh 20 tus 40 thơk geh crăp kơ̆ dùl bă tiah mờ 3 nơm khiñ khí kấu kâp 7; 2 nơm khiñ khí kầu par pơndiang nac lòt sền ù tiah Tri Tôn mờ bơta jơnhua 50 thơk... Kuơmàng, drim ngai 02/9, tơrgùm rlau 600 nă cau, geh: kwang bàng, viên cứk, mpồl ling, kwang àng, cau kơ đơng yàng phờk mờ ală rơnàng làng bol, sap sèng gơs rùp wac sềr ù tiah Việt Nam tàm ƀlàng pơrlòng kơnrồ, kơnhoàl Tri Tôn, nàng tus bal dơ̆ cào kơ, mờ dùl nơm bồng bi dà lơgar dờng 200 thơk vuông geh ơn jơnhua 50 thơk hơ đang trồ; lơh gơs rùp hin hàng niam ngan hơ đơm jơng Phụng Hoàng nàng gờm chờ ngai Sơn tờm Dà lơgar, ngai 02/9. Bơdìh hơ̆ tai, dơ̆ bơyai lơh chờ dơ̆ do gam bơyai lơh mang Bơkàu mờ ală broă lơh đơs crih tamya, broă lơh ràng tơlik, ală anih ràng tơlik phan sa mờ bơyai lơh ală jơnau nhơl ñŏ bơh yau bơh kòn cau Khmer dê nàng kờñ yal tơnggit rùp hin Tri Tôn tus mờ nac nhơl chờ.

Dơ̆ bơyai lơh chờ khiñ khí kầu tàm An Giang

Cau mblàng K'Duẩn